اقش ەلشىسى قازاق تىلىندە ناۋرىز مەرەكەسىمەن قۇتتىقتادى (ۆيدەو)

استانا. 20 ناۋرىز. اقش-تىڭ قازاقستانداعى توتەنشە  جانە وكىلەتتى ەلشىسى دجوردج ا.كرول بارشا قازاقستاندىقتى ناۋرىز مەرەكەسىمەن قۇتتىقتاپ, قازاق تىلىندە ءوز تىلەگىن ءبىلدىردى. بۇل تۋرالى اقش ەلشىلىگىنىڭ Facebook-تەگى رەسمي پاراقشاسىندا جاريالانعان مالىمەتكە سىلتەمە جاساعان egemen.kz ءتىلشىسى حابارلادى. ەلشى ءوز قۇتتىقتاۋىندا: «قۇرمەتتى, قازاقستاندىقتار! قازاقستانداعى امەريكا قۇراما شتاتتارى ەلشىلىگىنىڭ اتىنان سىزدەردى ناۋرىز مەرەكەسىمەن قۇتتىقتايمىن. مىڭداعان جىلدار بويى ناۋرىز ايىندا تۋعان تۋىستار مەن دوس-جاراندار باس قوسىپ, جاڭا كوكتەمدى قارسى الادى. بۇل كوكتەم مەرەكەسى قارساڭىندا سىزدەرگە جانە وتباسىلارىڭىزعا زور دەنساۋلىق, مول باقىت, قۇت-بەرەكە تىلەيمىن. ۇلىستىڭ ۇلى كۇنى قۇتتى بولسىن!», – دەدى. ەسكەرە كەتەتىن جايت, اقش ەلشىسىنىڭ قۇتتىقتاۋ بەينەروليگىن ءتۇسىرۋ ءۇشىن قازاقتىڭ كيىز ءۇيى, ال مۋزىكالىق فونى رەتىندە بەلگىلى كۇيشى سەكەن تۇرىسبەكوۆتىڭ «كوڭىل تولقىنى» كۇيى تاڭدالىپ الىنعان. ەلامان قوڭىر. دەرەك, سۋرەت: facebook.com.