استانا. 20 ناۋرىز. قازاقستان رەسپۋبليكاسى قارۋلى كۇشتەرى جەكە قۇرامىنىڭ 100 پايىزى بەلسەندىلىك تانىتىپ, پارلامەنت ءماجىلىسى مەن ءماسليحات دەپۋتاتتارىنىڭ كەزەكتەن تىس سايلاۋىنا داۋىس بەرۋگە قاتىستى. بۇل تۋرالى egemen.kz ءتىلشىسى حابارلادى.
ساعات 9.30-داعى جاعداي بويىنشا قازاقستان رەسپۋبليكاسى قارۋلى كۇشتەرى جەكە قۇرامىنىڭ 100 پايىزى داۋىس بەرۋدى اياقتادى. تاڭسارىدەن باستاپ قورعانىس مينيسترلىگى باسشىلىق قۇرامىنىڭ وكىلدەرى, گەنەراليتەت, قك قۇرلىق اسكەرلەرىنىڭ باس قولباسشىسى گەنەرال-لەيتەنانت مۇرات مايكەەۆ, اسكەري-تەڭىز كۇشتەرىنىڭ باس قولباسشىسى كونتر-ادميرال جانداربەك جانزاقوۆ جانە اۋە قورعانىسى كۇشتەرىنىڭ باس قولباسشىسى اۆياتسيا گەنەرال-مايورى نۇرلان ورمانبەتوۆ سايلاۋ ۋچاسكەلەرىندە ءوز تاڭداۋلارىن جاساپ, داۋىس بەردى. اسكەري قىزمەتشىلەر جوعارى بەلسەندىلىك تانىتىپ, بارشا وتباسىلارىمەن سايلاۋ ۋچاسكەلەرىنە كەلدى.
اسكەري بولىمدەر مەن مەكەمەلەردىڭ اۋماقتارىندا قۇرىلعان 20 سايلاۋ ۋچاسكەسىندە داۋىس بەرۋ ساعات 7.30-دا اياقتالعانىن ايتا كەتەيىك.
كەزەكتەن تىس سايلاۋدا داۋىس بەرۋگە قر قارۋلى كۇشتەرىنىڭ وكىلدەرى مەن ولاردىڭ وتباسى مۇشەلەرى قاتىستى. ولاردىڭ اراسىندا قورعانىس مينيسترلىگى, باس شتابى مەن قر قارۋلى كۇشتەر قۇرىلىمدىق بولىمشەلەرىنىڭ, ورتالىق باعىنىستاعى بولىمدەر مەن مەكەمەلەردىڭ, قر قك قۇرلىق اسكەرلەرى, اۋە قورعانىسى كۇشتەرى, اسكەري-تەڭىز كۇشتەرى اسكەري بولىمدەرىنىڭ, اسكەري وقۋ ورىندارى مەن جەرگىلىكتى اسكەري باسقارۋ ورگاندارىنىڭ اسكەري قىزمەتشىلەرى بار.
ءدال وسى ۋاقىتتا شەت ەلدەرىنىڭ جوعارى وقۋ ورىندارىندا, ياعني, رەسەي فەدەراتسياسى, بەلارۋس رەسپۋبليكاسى, ۋكراينا, تۇرىك رەسپۋبليكاسى, وڭتۇستىك كورەيا, امەريكا قۇراما شتاتتارى, قىتاي حالىق رەسپۋبليكاسى جانە ۇلىبريتانيادا ءبىلىم الىپ جۇرگەن 180-گە جۋىق اسكەري قىزمەتشى دە كەزەكتەن تىس سايلاۋعا قاتىستى.
اسكەري بولىمدەر مەن مەكەمەلەردىڭ اۋماقتارىندا قۇرىلعان سايلاۋ ۋچاسكەلەرىندە سايلاۋ زاڭناماسىنىڭ بۇزىلۋى بولعان جوق.
قازاقستاندىق ارميانىڭ اسكەري قىزمەتشىلەرى ازاماتتىق بورىشتى ورىنداۋ, تاڭداۋ جاساۋ جانە ءاربىر داۋىستىڭ ماڭىزدى ەكەنىن جەتە تۇسىنەدى. سوندىقتان قر قارۋلى كۇشتەرىنىڭ بارلىق اسكەري بولىمدەرى, قۇرىلىمدىق بولىمشەلەرى مەن مەكەمەلەرى جاپپاي كەزەكتەن تىس سايلاۋعا بەلسەنە قاتىستى.
داستان كەنجالين.
دەرەك, سۋرەت: قورعانىس مينيسترلىگى.
