استانا «جەر ساعاتى» دۇنيەجۇزىلىك ەكولوگيالىق اكتسياسىنا قاتىستى

استانا. 20 ناۋرىز. كەشە استانا قالاسى «جەر ساعاتى» حالىقارالىق اكتسياسىنا قاتىستى. الەم بويىنشا ميللياردتاعان ادام پلانەتامىزدىڭ بولاشاعىنا نەمقۇرايلى قاراماۋدىڭ بەلگىسى رەتىندە ءوز ۇيلەرى مەن پاتەرلەرىندە جارىق پەن ەلەكتر قۇرالدارىن ءبىر ساعاتقا ءوشىردى. سونىمەن قاتار, باستى وبەكتىلەر مەن تۋريستىك كورىكتى جەرلەردە دە جارىق ءسوندىرىلدى. بۇل تۋرالى استانا قالاسى اكىمدىگىنىڭ رەسمي سايتى – astana.gov.kz-كە سىلتەمە جاساعان egemen.kz ءتىلشىسى حابارلادى. استانادا ساعات 20:30-21:30 ارالىعىندا 300-دەن استام عيماراتتىڭ سىرتقى جارىقتاندىرىلۋى توقتاتىلدى. سونىڭ ىشىندە «بايتەرەك» مونۋمەنتى, «حان شاتىر» ويىن-ساۋىق ورتالىعى, بەيبىتشىلىك جانە كەلىسىم سارايى, «استانا وپەرا» مەملەكەتتىك وپەرا جانە بالەت تەاترى سىندى عيماراتتار بار. سونىمەن قاتار, شاراعا «قازاقستان» سپورت كەشەنى, «الاۋ» مۇز ايدىن سارايى, «بارىس ارەنا» سياقتى سپورتتىق نىساندار دا قوسىلدى. م.گوركي اتىنداعى مەملەكەتتىك اكادەميالىق ورىس دراما تەاترى, ەلوردالىق تسيرك, ق.قۋانىشباەۆ اتىنداعى قازاق مۋزىكالىق دراما تەاترى, «جاستار» سارايى, قۋىرشاق تەاترى مەن «ناز» بي تەاترى دا اكتسياعا قولداۋ كورسەتتى. «جەر ساعاتى» – دۇنيەجۇزىلىك جابايى تابيعات قورىنىڭ (WWF) بارشا الەمدە جۇزدەگەن مەملەكەتتى قامتىعان جانە تابيعاتتى ساقتاۋدىڭ, پلانەتامىزدىڭ شەكتەۋلى رەسۋرستارىنا قامقور بولۋدىڭ بەلگىسى بولىپ تابىلاتىن اۋقىمدى اكتسيا. ايتا كەتەيىك, وتكەن جىلى اكتسياعا 172 مەملەكەت پەن 2 ميللياردتان استام ادام قاتىسقان. ەلامان قوڭىر. دەرەك, سۋرەت: astana.gov.kz.