مارەگە جەتتى

قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي ەلىمىزدىڭ بارلىق ءوڭىرىن ارالاپ, ىزگى ماقساتتا ساپار شەككەن «ماڭگىلىك ەل» الەۋمەتتىك پويىزى ءوزىنىڭ مەجەلى جەرى – الماتى شاھارىنا اتباسىن تىرەپ, ساپار بويى اتقارعان يگى ميسسياسى تۋرالى ەسەپ بەردى. «ماڭگىلىك ەل» پويىزىن قالا اكىمدىگى مەن قالادا ورنالاسقان ءتۇرلى ۇلت ەتنومادەني بىرلەستىكتەرىنىڭ وكىلدەرى, ونەر ادامدارى مەن جۋرناليستەر قاۋىمى سالتاناتتى تۇردە قارسى الدى. ەل مەن ەلدى, جەر مەن جەردى جاقىنداستىرعان ىزگىلىك ساپارشىلارى ەل تاۋەلسىزدىگىنىڭ مەرەيلى مەرەكەسىن جوعارى دارەجەدە اتاپ وتۋگە ۇيىتقى بولعان ميسسيا اتىنان يۋنەسكو تىزىمىندە ارنايى اتاپ ءوتى­لەتىن الماتى قالاسىنىڭ 1000 جىل­دىق مەرەيتويىمەن قۇتتىقتاپ ءوتتى. 15 اقپان مەن 18 ناۋرىز ارالىعىندا تەمىرجول تورابىمەن 11 مىڭ شاقىرىم جولدى ءجۇرىپ ءوتىپ, 33 كۇندە 33 ەلدى مەكەن حالقىمەن قاۋىشقان, ءار كەزدەسۋىندە ءتۇرلى ماسەلەلەردى ساراپتاپ, ەل-جۇرتتىڭ وزەكتى پروبلەمالارىنىڭ وڭ شەشىم تابۋىنا ءوز ۇلەستەرىن قوسقان ساپارشى توپ بۇل كۇندى دە جوسپارعا ساي ماڭىزدى كەزدەسۋلەر مەن پايدالى پايىمداۋلارعا ارنادى. الماتىداعى دوستىق ۇيىندە قالا جۇرتشىلىعىمەن كەزدەسكەن ميسسيا وكىلدەرى وزدەرىنىڭ اتقارعان جۇمىسىنان ەسەپ بەرىپ, ساپار بارىسىندا جيناقتاعان مالىمەتتەرىن ورتاعا سالدى. بۇل توپتىڭ سوڭعى جۇمىس كەستەسىن تياناقتاۋ ءۇشىن الماتى قالاسىنان «استانا وپەرا» مەملەكەتتىك مۋزەي-تەاترىنىڭ جەتەكشىسى, قازاقستان حالقى اسسامبلەياسىنىڭ مۇشەسى اپريزا حۋساينوۆا, قازاقستان پرەزيدەنتى جانىنداعى رەسپۋبليكالىق مەملەكەتتىك «قوعامدىق كەلىسىم» بىرلەستىگىنىڭ ساراپشىسى ءابدىمومىن اسيلوۆ, قحا مۇشەلەرى ليۋدميلا حوچيەۆا مەنليۋبوۆ ني سەكىلدى بىرقاتار ازاماتتار قوسىلدى. قالاداعى حالىققا قىزمەت كورسەتۋ ورتالىعىندا «ماڭگىلىك ەل» الەۋمەتتىك پويىزىنىڭ جۇمىس توبى اتالمىش مەكەمەنىڭ جۇمىس ىستەۋ تارتىبىمەن تانىسىپ, ەل ازاماتتارىن كوبىرەك مازالايتىن قۇقىقتىق, جەكەمەنشىك ماسەلەلەرگە قاتىستى كوپتەگەن ساۋالدارعا جاۋاپ بەردى. سونداي-اق, قالالىق №29 ەمحانادا دا وسى پويىزدىڭ اتقارعان ميسسياسىنا وراي حالىققا ساپالى قىزمەت كورسەتۋ ماقساتىندا «اشىق ەسىك» كۇنى جاريالانىپ, بىلىكتى دارىگەرلەر قالا تۇرعىندارىنا قىزمەت كورسەتتى. – ءبىز 33 كۇندە 33 ەلدى مەكەندە ايالداپ, تاڭنىڭ اتىسى, كۇننىڭ باتىسىنا قاراماستان, ءتىپتى, مەرەكە كۇندەرى دە حالىقتى قابىلدادىق. كوپتەگەن ماسەلەلەر قارالدى, پىسىقتالدى. ەلىمىزدىڭ بارلىق مينيسترلىگى مەن ۆەدومستۆولارىنان 300-دەن اسا ساراپشى-مامان وسى پويىزدا بىزبەن بىرگە بولىپ, حالىقتى قابىلدادى. ەلدىڭ جاي-كۇيىمەن ەتەنە تانىستى. ءبىراز ماسەلە وڭ شەشىمىن تاپتى. ساپار بارىسىندا 55 مىڭ ادامدى قابىلداساق, سونىڭ 13 مىڭنان استامى مەديتسينالىق سۇراقپەن حابارلاسقان ەكەن. بۇل پويىز ەلدىگىمىزدىڭ ەلەۋلى مەرەكەسىن جوعارى دارەجەدە اتاپ وتۋدەن وزگە, حالىقتىڭ ىزگى ارمان-ماقساتتارىنىڭ ءسوزسىز ورىندالاتىنىنا كەپىل بولعانداي ۇلكەن اسەر ەتتى, – دەدى «ماڭگىلىك ەل» پويىز شتابى جۇمىسشى توبىنىڭ جەتەكشىسى ءامىرجان الپەيىسوۆ. «ماڭگىلىك ەل» الەۋمەتتىك پويىزىنىڭ جۇمىسشى توبى الماتىدا مەكتەپ ءبىتىرۋشى ورەندەرمەن, تەحنيكالىق جانە كاسىبي ءبىلىم بەرۋ مەكەمەسىنىڭ وقۋشىلارىمەن كەزدەسىپ, «ماڭگىلىك ەل جاستارى – يندۋسترياعا!» اتتى الەۋمەتتىك جوبا اياسىندا قىزىقتى كەزدەسۋلەر مەن سەمينار-ترەنينگتەر وتكىزدى. ميسسيانىڭ سوڭعى جۇمىس كۇنى تىلشىلەر قاۋىمىمەن كەزدەسۋ مەن قازاقستان رەسپۋبليكاسى تاۋەلسىزدىگىنە 25 جىل تولۋىنا وراي ونەر قايراتكەرلەرىنىڭ ۇيىمداستىرعان مەرەكەلىك كونتسەرتىن تاماشالاۋمەن اياقتالدى. قانات ەسكەندىر, «ەگەمەن قازاقستان». الماتى. سۋرەتتى تۇسىرگەن ماقسۇت ەرجانوۆ.