ەلباسى ەلشىلەردەن سەنىم گراموتالارىن قابىلدادى

استانا. 15 ناۋرىز. ەلباسى ەلشىلەردەن سەنىم گراموتالارىن قابىلدادى. بۇل تۋرالى akorda.kz حابارلادى. ءراسىم بارىسىندا قازاقستان پرەزيدەنتىنە بۇۇدب تۇراقتى وكىلى نوريماسا شيمومۋرا جانە يزرايل مەملەكەتىنىڭ توتەنشە جانە وكىلەتتى ەلشىسى ميحايل برودسكي, وزبەكستان رەسپۋبليكاسىنىڭ توتەنشە جانە وكىلەتتى ەلشىسى يكروم نازاروۆ, ازەربايجان رەسپۋبليكاسىنىڭ توتەنشە جانە وكىلەتتى ەلشىسى راشاد ماممادوۆ, تايلاند كورولدىگىنىڭ توتەنشە جانە وكىلەتتى ەلشىسى نات پينيوۆاتتاناچيپ سەنىم گراماتولارىن تاپسىردى. مەملەكەت باسشىسى بۇل ءراسىم ولاردىڭ جەكە ديپلوماتيالىق تاريحتارىنداعى جاڭا بەلەسكە اينالاتىنىنا نازار اۋداردى. «ءبارىڭىز دە ديپلوماتيالىق ميسسياعا العاش رەت باسشىلىق ەتكەلى وتىرسىزدار, قىزمەتتەرىڭىزدەگى جاڭا كەزەڭ قازاقستاننان باستالعالى تۇر. سىزدەردى قۇتتىقتاي وتىرىپ, قازاقستانداعى جاۋاپتى دا مارتەبەلى ميسسيالارىڭىز ەلدەرىمىز اراسىنداعى ىنتىماقتاستىقتى جان-جاقتى دامىتۋعا سەپتىگىن تيگىزەدى دەپ ۇمىتتەنەمىن», – دەدى نۇرسۇلتان نازارباەۆ. قازاقستان پرەزيدەنتى ديپلوماتتار ءوز قىزمەتتەرىندەگى جاڭا كەزەڭدى قازاقستان تاۋەلسىزدىگىنىڭ 25 جىلدىعى قارساڭىندا باستاپ وتىرعانىن اتاپ ءوتتى. «بۇل تاريحي تۇرعىدان قىسقا كەزەڭ ءبىزدىڭ ەلىمىز ءۇشىن اۋقىمدى وزگەرىستەردىڭ داۋىرىنە اينالدى. مەملەكەتتىلىكتى نىعايتۋ, زاماناۋي نارىقتىق ەكونوميكا قۇرۋ, قوعامدى جاڭعىرتۋ جونىندە وراسان زور جۇمىس اتقارىلدى. بۇگىندە ءبىزدىڭ ەلدىڭ باستى سيپاتتارى – ساياسي تۇراقتىلىق, ەتنوسارالىق جانە كونفەسسياارالىق كەلىسىم, حالىقارالىق ىستەردەگى سەنىمدىلىك پەن جاۋاپتىلىق, ءتيىمدى الەۋمەتتىك-ەكونوميكالىق وزگەرىستەر», – دەدى مەملەكەت باسشىسى. نۇرسۇلتان نازارباەۆ قازاقستان ۇكىمەتى مەن بىرىككەن ۇلتتار ۇيىمى اراسىنداعى 2016-2020 جىلدارعا ارنالعان نەگىزدەمەلىك سەرىكتەستىك باعدارلاماسى ىنتىماقتاستىقتىڭ جاڭا ساپالى دەڭگەيىنە شىققانىن كورسەتەتىنىنە نازار اۋداردى. «بىرىككەن ۇلتتار ۇيىمى دامۋ باعدارلاماسىمەن ءوزارا ءىس-قيمىل نەگىزگى ءۇش ۆەكتوردى قامتيدى. بىرىككەن ۇلتتار ۇيىمىنىڭ سەمەي وبلىسىن ايماقتىق دامىتۋ جونىندەگى بىرلەسكەن باعدارلاماسىن وڭ باعالايمىز», – دەدى قازاقستان پرەزيدەنتى. مەملەكەت باسشىسى يزرايلمەن ىنتىماقتاستىقتىڭ اياسىن كەڭەيتە تۇسۋگە ايرىقشا ءمان بەرەتىنىن ايتتى. «ساۋدا-ەكونوميكالىق ىنتىماقتاستىق ءبىزدىڭ قارىم-قاتىناسىمىزدىڭ ماڭىزدى بولىگى بولىپ سانالادى. بۇگىندە قازاقستاندا يزرايل كاپيتالىنىڭ قاتىسۋىمەن جۇمىس جۇرگىزەتىن 270-تەن استام كاسىپورىن تىركەلگەن. قازىرگى داعدارىس جاعدايىندا بارلىق باعىتتار بويىنشا قاۋىمداسۋدى كەڭەيتە ءتۇسۋ ءۇشىن كۇش جۇمىلدىرۋدىڭ ماڭىزى زور. اقپاراتتىق تەحنولوگيالار, يننوۆاتسيا, مەديتسينا جانە اۋىل شارۋاشىلىعى پەرسپەكتيۆالى سالالارعا اينالىپ وتىر. استانادا ەكسپو-2017 حالىقارالىق كورمەسىن وتكىزۋ تۇرعىسىنان ءبىز ءيزرايلدىڭ وزىق تەحنولوگيالارىنا جانە بالامالى ەنەرگەتيكا سالاسىنداعى جاڭالىقتارعا مۇددەلىمىز. ءيزرايلدىڭ ەۋرازيالىق ەكونوميكالىق وداقپەن ەركىن ساۋدا ايماعى جونىندەگى كەلىسىمگە قول قويۋعا ۇمتىلىسىن ءبىز قولدايمىز. ءيزرايلدىڭ پرەمەر-ءمينيسترى ب.نەتانياحۋدىڭ استاناعا جوسپارلانىپ وتىرعان رەسمي ساپارى ەكجاقتى بايلانىستاردى تەرەڭدەتۋگە سەرپىن بەرەدى دەپ سەنەمىن», – دەدى نۇرسۇلتان نازارباەۆ. قازاقستان پرەزيدەنتى ەلىمىزدى وزبەكستانمەن جانە ازەربايجانمەن تۋىسقاندىق قاتىناستار مەن عاسىرلار تاريحىنان تامىر تارتاتىن دوستىققا, ءوزارا قۇرمەتكە نەگىزدەلگەن بەرىك داستۇرلەر بايلانىستىراتىنىن اتاپ ءوتتى. «ەلدەرىمىز اراسىنداعى ورتاق شەكارا ەكىجاقتى قارىم-قاتىناستاردىڭ جان-جاقتى دامۋىن الدىن الا ايقىنداپ تۇرادى», – دەدى مەملەكەت باسشىسى. نۇرسۇلتان نازارباەۆ قازاقستان وزبەكستاندى ورتالىق ازيا وڭىرىندەگى ستراتەگيالىق سەرىكتەس رەتىندە قاراستىراتىنىنا نازار اۋداردى. «وتكەن اپتادا ەكىجاقتى ىنتىماقتاستىق جونىندەگى بىرلەسكەن ۇكىمەتارالىق كوميسسيانىڭ 15-ءشى وتىرىسى ءوتتى. قول جەتكەن ۋاعدالاستىقتاردى جۇزەگە اسىرۋ قازاقستان-وزبەك قاتىناستارىن جاڭا ساپالى دەڭگەيگە شىعارادى دەپ سەنەمىن. ساۋدا-ەكونوميكالىق جانە مادەني-گۋمانيتارلىق ىنتىماقتاستىقتىڭ بارلىق باعىتتارى بويىنشا ءبىزدىڭ ءتيىمدى ىقپالداسۋعا مۇمكىندىگىمىز بار. وزبەكستان پرەزيدەنتى يسلام كارىموۆتىڭ ءبىزدىڭ ەلگە ساپارى كەزىندە جاسالعان ۋاعدالاستىققا سايكەس, مەن ماۋسىم ايىندا تاشكەنتكە بارىپ, سوندا وتەتىن شانحاي ىنتىماقتاستىق ۇيىمىنىڭ كەزەكتى وتىرىسىنا قاتىسۋدى جوسپارلاپ وتىرمىن», – دەدى قازاقستان پرەزيدەنتى. مەملەكەت باسشىسى ازەربايجان قازاقستان ءۇشىن كاۆكاز وڭىرىندەگى ستراتەگيالىق سەرىكتەس ەكەنىن اتاپ ايتتى. «ءبىزدىڭ ەلدەرىمىز ەنەرگەتيكا جانە ترانزيت-كولىك, اۋىل شارۋاشىلىعى, تۋريزم, ءبىلىم بەرۋ سالالارىندا جانە باسقا دا باعىتتار بويىنشا بەلسەنە ىنتىماقتاسىپ كەلەدى. جاقىندا عانا ماعان ازەربايجان پرەزيدەنتى يلحام اليەۆتەن ازەربايجانعا رەسمي ساپارمەن بارۋ جونىندە شاقىرۋ كەلدى. مەن بۇل شاقىرۋدى ىقىلاسپەن قابىل الامىن. ديپلوماتيالىق ارنالار ارقىلى ناقتى مەرزىمىن كەلىسەرسىزدەر», – دەدى نۇرسۇلتان نازارباەۆ. قازاقستان پرەزيدەنتى تايلاند قازاقستاننىڭ وڭتۇستىك شىعىس ازياداعى ماڭىزدى سەرىكتەسى بولىپ سانالاتىنىنا توقتالدى. «استانا مەن بانگكوك اراسىنداعى ءوزارا ءىس-قيمىل ءوزارا تۇسىنىستىك جانە سەنىم ىڭعايىندا ءداستۇرلى تۇردە دامىپ كەلەدى. تايلاند باسشىلىعىنا ازياداعى ءوزارا ءىس-قيمىل جانە سەنىم شارالارى كەڭەسى ۇدەرىسىن, الەمدىك جانە ءداستۇرلى دىندەر ليدەرلەرى سەزى اياسىندا دىنارالىق ديالوگتى نىعايتۋعا قوسقان ۇلەسى ءۇشىن زور ريزاشىلىعىمىزدى بىلدىرەمىز. ءبىز تايلاندپەن تۋريزم, اۋىل شارۋاشىلىعى, ەنەرگەتيكا جانە كولىك لوگيستيكاسى سالالارى بويىنشا جەمىستى ىنتىماقتاستىقتى ارتىرا تۇسۋگە ءازىرمىز. دۇنيەجۇزىلىك ساۋدا ۇيىمى اياسىنداعى تىعىز قاۋىمداسۋ ساۋدا-ەكونوميكالىق ىنتىماقتاستىقتى دامىتۋ ءۇشىن كەرەمەت مۇمكىندىككە جول اشادى», – دەدى مەملەكەت باسشىسى. سوڭىندا نۇرسۇلتان نازارباەۆ راسىمگە قاتىسۋشىلاردى استاناداعى ديپلوماتيالىق جۇمىستارىنىڭ باستالۋىمەن جانە الداعى ناۋرىز مەرەكەسىمەن قۇتتىقتاپ, قوناقجاي قازاقستان جەرىندە وتكىزەتىن كۇندەرىنىڭ جايلى بولۋىنا تىلەكتەستىگىن ءبىلدىردى. «سىزدەردىڭ قىزمەتتەرىڭىز سەنىم مەن ءوزارا تۇسىنىستىكتى نىعايتۋعا, ەكىجاقتى ىنتىماقتاستىقتىڭ الەۋەتىن بارىنشا ارتتىرا تۇسۋگە باعىتتالادى دەپ سەنەمىن», – دەدى قازاقستان پرەزيدەنتى. نوريماسا شيمومۋرا ورنىقتى دامۋ ماقساتتارىنا قول جەتكىزۋ ءۇشىن قازاقستان مەن بۇۇ اراسىنداعى سىندارلى سەرىكتەستىكتىڭ جالعاسا بەرەتىنىنە سەنىم ءبىلدىردى. ميحايل برودسكي قازاقستان مەن يزرايل حالىقتارىن ورتاق مۇددە مەن ءوزارا ىلتيپاتقا نەگىزدەلگەن ءداستۇرلى دوستىق قارىم-قاتىناستار بايلانىستىراتىنىن ايتتى. «تاياۋدا قازاقستان العاش رەت العىس كۇنىن اتاپ ءوتتى. ءبىز ءۇشىن بۇل مەرەكە ۇلى وتان سوعىسى جىلدارى قازاقستانعا قونىس اۋدارعان ەۆرەيلەرگە كورسەتىلگەن قوناقجايلىلىق ءۇشىن ءسىزدىڭ حالقىڭىزعا تاعى دا العىس ءبىلدىرۋدىڭ ءبىر مۇمكىندىگىنە اينالدى. ءبىز ونى ەشقاشان ۇمىتپايمىز», – دەدى يزرايل ەلشىسى. يكروم نازاروۆ قازاقستان جانە وزبەك حالىقتارىنىڭ رۋحانياتى, تاريحى جانە مادەنيەتىنىڭ ورتاق سيپاتىن اتاپ ءوتىپ, ەكىجاقتى ىنتىماقتاستىق اياسىن ءوزارا ءتيىمدى نەگىزدە ودان ءارى كەڭەيتە تۇسۋگە سەپتىگىن تيگىزۋگە نيەتتەستىگىن جەتكىزدى. «قازاقستان – وزبەكستاننىڭ ماڭىزدى ساۋدا سەرىكتەسىنىڭ ءبىرى. 2015 جىلدىڭ قورىتىندىسى بويىنشا ەكىجاقتى تاۋار اينالىمىنىڭ كولەمى 3 ميلليارد دوللاردان استى. بۇل سالادا زور الەۋەت بار», – دەدى وزبەكستان رەسپۋبليكاسىنىڭ ەلشىسى. راشاد ماممادوۆ قازاقستان مەن ازەربايجان اراسىنداعى ساياسي, ەكونوميكالىق بايلانىستاردى نىعايتۋ, ءبىلىم بەرۋ, عىلىم جانە مادەنيەت سالاسىنداعى تىعىز قارىم-قاتىناستاردى جولعا قويۋ ءۇشىن ءوزىنىڭ بار كۇش-جىگەرىن جۇمسايتىنىن ايتتى. بۇدان بولەك, ەلشى بارشا قازاقستان حالقىن كەلە جاتقان ناۋرىز مەيرامىمەن قۇتتىقتادى. نات پينيوۆاتتاناچيپ قازاقستان مەن تايلاند اراسىنداعى سەرىكتەستىك قارىم-قاتىناس ءتۇرلى سالا بويىنشا قارقىندى ورىستەي بەرەدى دەپ ۇمىتتەنەتىنىن ايتا كەلىپ, ەلىمىزدىڭ حالقىنا يگىلىك پەن باق-بەرەكە تىلەدى. ەلامان قوڭىر. دەرەك, سۋرەت: akorda.kz.