نادال فرانتسيانىڭ بۇرىنعى سپورت مينيسترىمەن سوتتاسپاق

استانا. 15 ناۋرىز. ايگىلى يسپان تەننيسشىسى رافاەل نادال فرانتسيانىڭ بۇرىنعى سپورت ءمينيسترى روزەلين باشەلونىڭ ۇستىنەن سوتقا شاعىمدانۋعا نيەتتى ەكەنىن مالىمدەدى. وعان بۇرىنعى شەنەۋنىكتىڭ سپورتشىنى دوپينگ قولداندى دەپ نەگىزسىز ايىپتاۋى سەبەپ بولىپ وتىر. بۇل تۋرالى BBC-گە سىلتەمە جاساعان egemen.kz ءتىلشىسى حابارلادى. وتكەن اپتادا ءوزىنىڭ رۇقسات ەتىلمەگەن ءدارى-دارمەكتەر قولدانعانىن مويىنداعان رەسەي تەننيسشىسى ماريا شاراپوۆانىڭ ارەكەتىنە بايلانىستى روزەلين باشەلو ءوز پىكىرىن بىلدىرگەن بولاتىن. سول كەزدە ول يسپان تەننيسشىسىنىڭ دە اتىن اتاپ: «نادالدىڭ 2012 جىلى جەتى اي دەمالىس العانى بەلگىلى. وعان رەسمي تۇردە مالىمدەلگەندەي جاراقاتى ەمەس, تىيىم سالىنعان پرەپاراتتاردى قولدانۋى سەبەپ بولۋى ابدەن مۇمكىن», – دەدى. دەسە دە, ەكس-مينيستر بۇل سوزىنە ەشقانداي دالەل كەلتىرگەن جوق. بۇعان دەيىن ءوز اتىنا ايتىلعان مۇنداي جالانىڭ سان ءتۇرىن ەستىگەن رافاەل نادال بۇل جولى شىدامىنىڭ تاۋسىلعانىن ايتىپ: «فرانتسيا سىندى الەمدەگى الپاۋىت ەلدەردىڭ بىرىندە سپورت ۆەدومستۆوسىن باسقارعان ادام ءار ءسوزىن ويلانىپ بارىپ سويلەۋى كەرەك. مەن 5 جاسىمنان بەرى وسى سپورت تۇرىمەن شۇعىلدانىپ كەلەمىن. سودان بەرگى جەتىستىكتەرىمە ءوزىمنىڭ ادال ەڭبەگىمنىڭ ارقاسىندا جەتتىم. سوندىقتان مۇنداي ناقاق جالاعا بۇدان ارتىق توزە المايمىن. بولاشاقتا كىمدە-كىم مەنى نەگىزسىز ايىپتاسا, ولاردىڭ ارقايسىسىمەن سوتتاسۋعا دايىنمىن», – دەدى. ەلامان قوڭىر. دەرەك: BBC. سۋرەت: AFP.