اقتوبەدە كورىسۋ مەرەكەسى اتاپ وتىلۋدە

اقتوبە. 15 ناۋرىز. قازاق حالقىنىڭ ەجەلگى سالت-ءداستۇرى بويىنشا اقتوبە وڭىرىندە 14 ناۋرىزدا كورىسۋ مەرەكەسى باستالادى. وسى داستۇرگە وراي وبلىس اكىمى بەردىبەك ساپارباەۆ ايماقتىڭ دامۋىنا زور ۇلەس قوسقان تانىمال اقساقالداردى قۇتتىقتادى. بۇل تۋرالى egemen.kz ءتىلشىسى حابارلادى. ءداستۇر بويىنشا, جاسى كىشىلەر ۇلكەندەردىڭ حال-جاعدايلارىن ءبىلىپ, وتباسى اماندىعىن سۇراستىراتىن بولعان. ەڭبەك ارداگەرى سماتۋللا بەركىمباەۆ وبلىس باسشىسىنا كورىسۋ مەرەكەسىن قازاقتار ەرەكشە سالتاناتپەن اتاپ وتەتىندىگىن جەتكىزدى. تاڭەرتەڭنەن ەڭ ادەمى كيىمدەرىن كيىپ, كورشى-كولەمدى جاعالاپ, مۇمكىن بولسا, جاقىن ماڭداعى اۋىل-ايماقتاردى ارالاپ, دەندەرىنىڭ ساۋلىعىن, اماندىعىن بىلەتىن بولعان. ۇزاق جىلدار بويى بايعانين, شالقار جانە تەمىر اۋداندىق پارتيا كوميتەتتەرىن باسقارعان اقساقالدىڭ ايتۋىنشا, «كورىسۋ» – قىستان امان شىعىپ, كوپتەن بەرگى كەزدەسۋدى بىلدىرەتىن بولسا كەرەك. سونداي-اق, بۇل مەرەكە كوكتەم مەن دوستىق, بەيبىتشىلىكتى بىلدىرەدى. كسرو جانە قازاق سسر حالىق اعارتۋ ءىسىنىڭ ۇزدىگى, 88 جاستاعى نيەتجان بەرىكوۆ كورىسۋدىڭ وسكەلەڭ ۇرپاقتى تاربيەلەۋدە ۇلكەن ماڭىزعا يە ەكەندىگىن اتاپ ءوتتى. ءوز كەزەگىندە ءوڭىر باسشىسى اقساقالدارعا زور دەنساۋلىق, ۇزاق عۇمىر, سونداي-اق, تۋعان-تۋىستارى مەن جاقىندارىنا باقىت تىلەپ, اكىمدىك اتىنان ەستەلىك سىيلىقتار تاپسىردى. ەڭبەك ارداگەرلەرى اكىمگە العىستارىن جاۋدىرىپ, قىزمەتتە تابىس تىلەپ, باتالارىن بەردى. كورىسۋ ءداستۇرى ءار وتباسىندا, مادەنيەت ۇيلەرىندە, ەڭبەك ۇجىمدارىندا مادەني شارالارمەن جالعاسۋدا. ساتىبالدى ءساۋىرباي. دەرەك: egemen.kz. سۋرەت: azh.kz.