مەكسيكادا زيكا بەزگەگىن جۇقتىرعان ادام سانى 150-دەن استى

استانا. 15 ناۋرىز. مەكسيكادا زيكا بەزگەگىن جۇقتىرعاندار سانى كۇن ساناپ ارتىپ بارادى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. قازىرگى كەزدە دارىگەرلەر زيكا ەپيدەمياسىن جۇقتىرعان 151 ناۋقاستى انىقتادى. ولاردىڭ اراسىندا 25 ادام – جۇكتى ايەلدەر. جەرگىلىكتى بيلىكتىڭ حابارلاۋىنشا, باسىم بولىگى, ياعني 75 ادام چياپاس شتاتىندا ەمدەلىپ جاتىر. واحاكا شتاتىنداعى 59 ادام دارىگەرلەردىڭ باقىلاۋىندا, ال قالعان بەس ادام گەررەرو شتاتىنىڭ تۇرعىنى. دارىگەرلەردىڭ ايتۋىنشا, ولاردىڭ جاعدايى ءبىر قالىپتى. ايتا كەتەيىك, زيكا – العاش رەت 1947 جىلى ۋگاندا مەملەكەتىندە پايدا بولعان. وسىدان سوڭ افريكا ەلدەرىنە تارالا باستادى. مايمىلدار اراسىنداعى جۇقپالى اۋرۋ بولىپ ەسەپتەلەدى. ال ادامدار اراسىندا تاراۋىنا نەگىزىنەن Aedes aegypti تۇرىندەگى ماسالار سەبەپشى بولادى. اتالعان بەزگەك اسىرەسە, جۇكتى ايەلدەر ءۇشىن اسا قاۋىپتى. قاتەرلى ىندەتكە شالدىققان بولاشاق انادان ميكروتسەفاليا اۋرۋىنا شالدىققان نارەستە دۇنيەگە كەلەدى. ول وز كەزەگىندە بالانىڭ باس سۇيەگىن مولشەرىنەن تىس كىشىرەيىپ, مي قۇرىلىسىنىڭ دامۋىنا زيانىن تيگىزەدى. سونداي-اق, اقىل-ەسى كەم بولىپ, ەستۋ, كورۋ سەزىمدەرىندە اۋىتقۋشىلىقتار پايدا بولادى. بۇل كەزدە ارنايى ۆاكتسينالار كومەكتەسپەيدى. ايان ءابدۋالي. دەرەك: تاسس. سۋرەت: regnum.ru.