باقىتىن ەڭبەكتەن تاپقان

ءاربىر كاسىپورىندا ءوزىنىڭ كاسىبىنە ادال, ىسىنە بەرىلگەن, ءوزى ەڭبەك ەتكەن ورتامەن بىتە-قاي­ناسىپ كەتكەن ادامدار بولادى. ولاردىڭ ءوزى جۇمىس ءىس­تەيتىن كاسىپورىنعا ەكىنشى ءۇيىن­دەي باۋىر باسىپ كەتەتىنى دە سون­دىق­تان. ەۋ­رازيالىق توپقا كىرەتىن «قازحرومدا» دا مۇنداي جۇمىسشىلار از ەمەس. ولاردىڭ ءبىرى – اقتوبە فەرروقورىتپا زاۋ­ى­تى ءوتىم ءبولىمىنىڭ جۇكتى قا­بىلداپ-تاپسىرۋشىسى تامارا سايتيەۆا دەسەك, ارتىق ايتقان­دىق بولا قويماس. ءتۋابىتتى قاسيەتپەن ۇنەمى جادىراپ, جارقىلداپ, كۇ­لىمدەپ جۇرەتىن ول, قاراپ وتىر­سا, زاۋىتقا ءوز ءومىرىنىڭ 30 جىلىن ارناعان ەكەن. تامارا سايتيەۆا زاۋىتتا 1982 جىلدان بەرى جۇمىس ىستەيدى. وسىدان تۋرا وتىز جىلدان استام ۋاقىت بۇرىن تەمىرجول تسەحىنىڭ جەرگىلىكتى پاركىنىڭ وپەراتورى بولىپ ەڭبەك جولىن باستاعان-دى. زاۋىتقا جۇمىسقا تۇرۋعا وعان وسىن­دا جۇمىس جاسايتىن اپاسى كەڭەس بەرگەن بولاتىن. مىنە, سودان بەرى كاسىپورىندا تابان اۋدارماي ەڭبەك ەتىپ كەلەدى. 2007 جىلى ونى تەمىرجول تسەحى كاسىپوداق كوميتەتىنىڭ ءتور­ايى­مى ەتىپ سايلادى. ەندى كۇندەلىكتى وندىرىستىك تاپسىرمالارمەن قوسا تسەحتاعى ارىپتەستەرىنە الەۋمەتتىك قولداۋ كورسەتۋ بو­يىنشا مىندەت دە قوسىلدى. ارينە, ارىپتەستەرىنىڭ قاۋىپسىز ەڭبەك ەتۋى ءۇشىن ەڭبەكتى قورعاۋ بويىنشا كاسىبي تۇرعىدا جانە كاسىپوداق بويىنشا دا وڭ كوزبەن قاراۋ, مۇقيات قاداعالاۋ قاجەت بولدى. تسەح ۇجىمىنىڭ ىنتىماعى مەن وندىرىستىك تابىستارى دا تسەحتىق كاسىپوداق كوميتەتىنىڭ جۇيەلى جۇمىسىنا تاۋەلدى. ءبىر سوزبەن ايتقاندا, مۇندا ول ارالاسپايتىن ماسەلە جوققا ءتان. قاشاندا قاراقان باسىنان گورى وزگەنىڭ ءجۇزى جارقىن بولۋىنا ۇمتىلاتىن تامارانىڭ وسى بولمىس-ءبىتىمى ونى ءوز ورتاسىنا سىيلى ەتتى. ءارىپ­تەستەرى ونى «ءبىزدىڭ توما» دەپ جاندارىنا جاقىن تارتا اتاۋى دا سوندىقتان. – مەنىڭشە, ءاربىر ادام ءوز كاسىبىن جۇرەگىمەن ۇناتىپ, جاقسى كورۋى ءتيىس. مەنىڭ سۇيىكتى كاسىبىم قيىن ءارى جاۋاپكەرشىلىكتى تالاپ ەتەدى. مەن مۇندا كوپتەگەن جاقسى ادامدارمەن دوستاستىم. مەنىڭ جۇمىسىم – مەنىڭ ءومىرىمنىڭ ايناسى, ويتكەنى, وسىندا ەڭبەك ەتە ءجۇرىپ, ءوزىمنىڭ ومىرلىك سەرىگىمدى كەزدەستىردىم, ءۇش بولمەلى پاتەرگە قول جەتكىزدىم. دەمالىس كۇندەرى كوپ نارسەنى ىستەۋگە ۇلگەرە الماي جاتامىن, دەگەنمەن, ۋاقىتىم­نىڭ نەگىزگى بولىگىن وتباسىممەن وتكىزەمىن. جازدا ءبارىمىز سايا­جايدا دەمالۋدى ۇناتامىز. كوك­ونىس, جەمىس-جيدەكتىڭ ءتۇر-ءتۇرىن ءوسىرىپ, قىستىڭ قامىن جاسايمىز. ءوسىپ كەلە جاتقان سۇيىكتى نە­مەرەلەرىمنىڭ تاربيەسىمەن اي­نالىسۋ مەنى ەرەكشە باقىتقا بولەيدى, – دەيدى تامارا سايتيەۆا. ءوندىرىس وزاتى ەڭبەكتەگى تابىسى ءۇشىن بىرنەشە رەت العىس حاتتارمەن جانە قۇرمەت گراموتالارىمەن جانە ءۇشىنشى دارەجەلى «ەڭبەك داڭقى» بەلگىسىمەن مارا­پاتتالعان. ساتىبالدى ءساۋىرباي, «ەگەمەن قازاقستان». اقتوبە وبلىسى.