ەلباسى «ءبىزدىڭ كۇشىمىز – بىرلىكتە» اتتى فورۋمعا قاتىستى

ورال. 9 ناۋرىز. مەملەكەت باسشىسى قازاقستان حالقى اسسامبلەياسىنىڭ تاۋەلسىزدىكتىڭ 25 جىلدىعىنا ارنالعان «ءبىزدىڭ كۇشىمىز – بىرلىكتە» اتتى رەسپۋبليكالىق فورۋمىنا قاتىستى. بۇل تۋرالى akorda.kz حابارلادى. ءىس-شاراعا 3000-عا جۋىق ادام قاتىستى, ولاردىڭ قاتارىندا قازاقستان حالقى اسسامبلەياسىنىڭ وكىلدەرى, رەسپۋبليكالىق جانە وڭىرلىك ەتنومادەني بىرلەستىكتەردىڭ مۇشەلەرى, عىلىمي جانە شىعارماشىل زيالى قاۋىم, جاستار بار. ەلباسى فورۋمعا قاتىسۋشىلارعا ارناعان سوزىندە بۇگىندە ەلىمىز بويىنشا 962 ەتنومادەني بىرلەستىك جۇمىس جۇرگىزىپ وتىرعانىن اتاپ ءوتتى. «وسىنىڭ ءبارى بارلىق ازاماتتار ءۇشىن قازاقستاننىڭ تۋعان ۇيىندەي بولىپ سانالاتىنىن ايعاقتايدى. حح عاسىر بارشاعا, سونىڭ ىشىندە قازاقستان جەرىندە پانا تاپقان قونىس اۋدارۋشىلار مەن كۇشتەپ جەر اۋدارىلعاندارعا قيىن ءتيدى. بىلتىر جىل بويى اتالىپ وتكەن اسسامبلەيانىڭ 20 جىلدىعى ءبىرتۇتاس وتانىمىزدىڭ جانە بالالارىمىزدىڭ بولاشاعىن قازاقستان حالقى بىرگە قالىپتاستىرىپ جاتقانىن كورسەتتى. بىرگە ءومىر سۇرە وتىرىپ, ءبىز ءبىر-ءبىرىمىزدى رۋحاني تۇرعىدان بايىتا تۇسەمىز. ءبىزدىڭ حالقىمىز تاتۋلىق پەن كەلىسىمنىڭ بىرەگەي ساياساتىمەن, دوستىق نەگىزدەگى كورشىلەستىككە بەيىمدىگىمەن, تۇراقتىلىق پەن تىنىشتىققا ۇمتىلىسىمەن ماقتانا الادى», – دەدى قازاقستان پرەزيدەنتى. نۇرسۇلتان نازارباەۆ ەلىمىزدە بارلىق مادەنيەتتەر مەن تىلدەردىڭ تەڭ قۇقىلى دامۋى, تاريحي داستۇرلەر مەن عۇرىپتاردىڭ وركەندەۋى قامتاماسىز ەتىلگەنىن ايتتى. «بۇل ورايدا قازاقستان حالقى اسسامبلەياسىنىڭ ءرولى زور. وسى جىلدار ىشىندە ول ەلدەگى ەتنوستاردى جاقىنداستىردى, ءاربىر مادەنيەتتىڭ وزىق ۇردىستەرىن پاش ەتتى. ءبىر قاراعاندا ءار ەتنوستىڭ ءداستۇرى ءبىر-بىرىنە ۇقساماعانىمەن, ولاردىڭ تۇپكى ءمانى ءبىر. ءارتۇرلى اتاپ جۇرسەك تە, ەتنيكالىق مەرەكەلەردىڭ ۋاقىتى مەن سەبەپتەرى ۇيلەسىپ تۇرادى. ءبىز بارلىق ەتنوستاردىڭ مەرەكەلەرىنە ىقىلاسپەن قاتىسامىز, ويتكەنى قازاقستاندىقتار بىرلىكتىڭ, بەيبىتشىلىكتىڭ, تىنىشتىقتىڭ, باقىت پەن مەيىرىمنىڭ ايرىقشا رۋحىن قالىپتاستىرا ءبىلدى», – دەدى مەملەكەت باسشىسى. قازاقستان پرەزيدەنتى ەلىمىز 100-دەن اسا ەتنوس پەن 17 كونفەسسيا وكىلدەرىنىڭ جايلى ءومىر سۇرۋىنە بارلىق جاعداي جاسالعان زاماناۋي ءارى قاۋىپسىز ورتاق شاڭىراق بولىپ وتىرعانىنا نازار اۋداردى. «ولار انا ءتىلى مەن تاريحىن وقيدى, ءوز دىندەرىن ۇستانادى, ۇلتتىق داستۇرلەرى مەن ادەت-عۇرىپتارىن ساقتايدى. ءبىزدىڭ گازەت-جۋرنالدارىمىز 15 تىلدە شىعادى, ال تەاترلارىمىز 7 تىلدە سويلەيدى. بارلىق وبلىستا كىشى اسسامبلەيالار ءتيىمدى جۇمىس ىستەيدى. قازاقستاندىقتاردىڭ تاتۋلىعى مەن كەلىسىمى – قوعامدى ۇيىستىرۋشى كۇش. كوپۇلتتىلىق ەلدىڭ ستراتەگيالىق ارتىقشىلىعى ەكەنىن ءبىز ءىس جۇزىندە دالەلدەدىك. اسسامبلەيانىڭ جاستارمەن جۇمىسقا كوبىرەك كوڭىل بولە باستاعانى وتە ماڭىزدى. ناق وسى جاستارعا ومىرلىك ايقىن باعدار بەرۋ كەرەك, ولاردى كۇماندى يدەيالاردىڭ ىقپالىنان قورعاۋ قاجەت», – دەدى نۇرسۇلتان نازارباەۆ. مەملەكەت باسشىسى بۇگىندە كوپتەگەن ەلدەردەگى جاعدايدىڭ زورلىق, ەتنيكالىق الالاۋ, ءتۇرلى سوعىستار مەن قاقتىعىستار سياقتى ەڭ قايعىلى ستسەناريلەر بويىنشا ءوربىپ جاتقانىن ايتتى. «وسىنداي جاعدايدا ءاربىر قازاقستاندىق تاتۋلىق پەن قوعامدىق كەلىسىمنىڭ شىنايى باعاسى قانداي ەكەنىن, ديالوگ, ءبىر-بىرىنە دەگەن قۇرمەت, توزىمدىلىك پەن تولەرانتتىلىق جولىن تاڭداۋ ارقىلى قانداي قايعى-قاسىرەتتەردەن امان قالعانىمىزدى جەتە سەزىنە باستادى. ءبىزدىڭ تاجىريبەمىزدى ەندى وزگە مەملەكەتتەر زەرتتەپ, پايدالانۋدا. قازاقستاننىڭ بولاشاعى زور. ءبىز سىزدەرمەن بىرگە بارلىق قيىندىقتاردى ەڭسەرەمىز, العا جىلجۋ ءۇشىن مەملەكەت بارلىق شارانى ىسكە اسىرادى», – دەدى قازاقستان پرەزيدەنتى. نۇرسۇلتان نازارباەۆ ورال قالاسى ەلىمىزدىڭ جارقىراعان جاقۇتى ەكەنىن اتاپ ءوتتى. «باتىس قازاقستان وبلىسى ەۋروپا مەن ازيا اراسىن بايلانىستىرۋشى ءوڭىر رەتىندە ءبىزدىڭ ەكونوميكامىزدا ءاردايىم ماڭىزدى ءرول اتقارىپ كەلەدى. ءوڭىر وراسان زور ترانزيتتىك الەۋەتكە يە, ءبىز ونى دامىتا تۇسەتىن بولامىز. بۇكىل قازاقستانداعى سياقتى مۇندا داعدارىسقا قارسى جۇمىس جاقسى ءجۇرىپ جاتقانىن كورىپ وتىرمىن. الەمدىك نارىقتاعى تۇراقسىزدىق جاعدايىندا وبلىس الەۋمەتتىك ماڭىزى بار 33 تاۋاردىڭ 24 ءتۇرىن ءوندىرىپ وتىر. يندۋستريالاندىرۋدىڭ ءبىرىنشى بەسجىلدىعى اياسىندا 32 جوبا جۇزەگە اسىرىلىپ, 2 مىڭ جۇمىس ورنى اشىلدى. سىزدەردىڭ وڭىرلەرىڭىزدە ورال ترانسفورماتور زاۋىتى, «كۆانت» جيھاز فابريكاسى, «باتىس ماركا لامب» ەت وڭدەۋ كاسىپورنى سياقتى ءىرى كاسىپورىندار بار. «نۇرلى جول» باعدارلاماسى بويىنشا تاعى 40 جوبا جۇزەگە اسىرىلىپ, 2 مىڭنان استام جۇمىس ورنىمەن قامتاماسىز ەتەتىن بولادى», – دەدى مەملەكەت باسشىسى. قازاقستان پرەزيدەنتى مەكتەپكە دەيىنگى مەكەمەلەرمەن قامتۋ دەڭگەيى وڭىردە 98 پايىزعا جەتكەنىنە, تۇرعىن ۇيلەر سالىنىپ جاتقانىنا نازار اۋداردى. بۇگىندە ءۇش اۋداندا جالپى ۇزىندىعى 500 شاقىرىمعا جۋىق اۆتوموبيل جولى سالىنىپ, وبلىستاعى بارلىق دەرلىك ەلدى مەكەندەر گازداندىرىلدى. نۇرسۇلتان نازارباەۆ ەلدە جۇرگىزىلىپ جاتقان شارالار قاراپايىم ادامداردىڭ ءال-اۋقاتىن ارتتىرۋعا باعىتتالعانىن ايتتى. سوڭىندا مەملەكەت باسشىسى ءوڭىر تۇرعىندارىنا يگىلىك پەن باق-بەرەكە تىلەدى. فورۋم بارىسىندا قازاقستان حالقى اسسامبلەياسىنىڭ جانە ونىڭ جانىنداعى انالار كەڭەسىنىڭ مۇشەلەرى, ەتنومادەني بىرلەستىكتەردىڭ باسشىلارى ءسوز سويلەدى. سونداي-اق, فورۋم اياسىندا ەتنومادەني بىرلەستىكتەردىڭ شىعارماشىلىق ۇجىمدارىنىڭ قاتىسۋىمەن مەرەكەلىك كونتسەرت ءوتتى. تەمىر قۇسايىن. دەرەك, سۋرەت: akorda.kz.