وسكەمەندەگى تەگىن ءدارى

بەرۋ جۇيەسى قالپىنا كەلتىرىلدى جىل باسىندا وسكەمەندىك تۇرعىنداردىڭ ءدارىحانالاردان تەگىن الىپ تۇراتىن ءدارى-دارمەگى توقتاپ قالعان ەدى. جۇرەك-قان تالماسىمەن, دەمىكپەمەن اۋىراتىن ناۋقاستار تەگىن ءدارى الىپ تۇراتىنى بەلگىلى. ءتىپتى, كەيبىر تۇرعىندار قاتەرلى ىسىككە قارسى الەۋمەتتىك پرەپاراتتاردىڭ مۇلدەم توقتاپ قالعانىنا بايلانىستى دارىلەردى جەكە قارجىسىنا ساتىپ الا باستاعانىن جەتكىزگەن. فارماتسەۆتەر ارنايى جەڭىلدىكپەن بەرىلەتىن دارىلەردى تاسىمالداۋعا ارنالعان تەندەردىڭ ءالى وتكىزىلمەگەنىن ايتىپ, الاڭداعان ادامداردىڭ كوڭىلىن اۋلاعان بولاتىن. ەكى ايعا جۋىق ۋاقىت وتكەندە, وبلىستىق دەنساۋلىق ساقتاۋ باسقارماسى ءدارى-دارمەك ماسەلەسى شەشىلگەنىن جەتكىزدى. وبلىستىق دەنساۋلىق ساقتاۋ باسقارماسىنىڭ باسشىسى ۆاديم وۆسياننيكوۆتىڭ ايتۋىنشا, اعىمداعى جىلدىڭ 24 اقپانىنان باستاپ بۇل ماسەلەلەرگە نۇكتە قويىلدى. دارىلەر دارىحانالارعا جەتكىزىلە باستادى. كەيبىر جەرلەردەگى دارىلەردىڭ جەتىسپەۋشىلىگى نەمەسە مۇلدەم جوقتىعى, اتالعان جۇمىسقا جاڭادان قوسىلعان تاسىمالداۋشىلاردىڭ سەبەبىنەن بولۋى مۇمكىن. سونداي-اق, تىركەۋدە تۇرعان ناۋقاستاردىڭ اراسىندا پرەپاراتتاردى الۋ ءۇشىن دارىگەردىڭ ءدارى الۋعا بەرەتىن رۇقساتناما قاعازىن تەندەردەن كەيىن قايتا الۋ تۋرالى دا سىبىس تاراعان-دى. مۇنى ءتيىستى مەكەمە جوققا شىعاردى. – تەندەر 15 اقپاندا وتكىزىلدى. ءدارى الۋعا بەرىلەتىن رۇقسات قاعازدىڭ ۋاقىتى بويىنشا ەشقانداي شەكتەۋ جوق. ياعني, قاعازدىڭ ەمدەلۋشىگە قاي ۋاقىتتا بەرىلگەنى ماڭىزدى ەمەس. دارىحاناداعى ءدارى كەز كەلگەن جاعدايدا بەرىلۋى ءتيىس, – دەدى ۆاديم وۆسياننيكوۆ. دۋمان اناش, «ەگەمەن قازاقستان». وسكەمەن.