بايقاۋشىلار دايىن

ەلىمىزدەگى پارلامەنت ءماجىلىسى مەن بارلىق دەڭگەيدەگى ءماسليحاتتار سايلاۋلارىندا وبلىستىق قوعامدىق كوميسسيا قۇرامىنداعى 569 بايقاۋشى داۋىس بەرۋ بارىسىن باقىلايدى. وبلىس ورتالىعىندا رەسپۋب­لي­كالىق جانە وبلىستىق قوعام­دىق كوميسسيالار ءوز جۇمىس­تارىن باستادى. كوميسسيا مۇشە­لەرى ۇمىتكەر­لەردىڭ سايلاۋالدى شتابتارىنىڭ, سايلاۋ كوميسسيالارىنىڭ زاڭ شەڭبەرىندە جۇمىس جاساۋلارىن قاداعالايدى. سايلاۋ بارىسىنىڭ قالاي ءوتىپ جاتقانىنان حاباردار بولعىسى كەلىپ, ءوتىنىش بىلدىرگەن, زاڭدى جاقسى بىلەتىن ەلىمىزدىڭ ءاربىر ازاماتى بايقاۋشى بولا الادى. كوميسسيا توراعاسى يلدار قاليەۆتىڭ ايتۋىنشا, جالپى سايلاۋ بارىسىن بايقايتىن بۇل وبلىستىق كوميسسيا 2005 جىلى قۇرىلعان. كوميسسيا مۇشەلەرى بۇعان دەيىن وتكەن ەلىمىزدەگى پرەزيدەنت جانە پارلامەنت سايلاۋلارى كەزىندە بەلسەندى قىزمەتتەرىمەن تانىلدى. ياعني, سايلاۋ بارىسىن بايقاۋ, بيلىك, بۇقارالىق اقپارات قۇرالدارى, ساياسي پارتيالار جانە حالىقارالىق ميسسيالارمەن ۇنقاتىسۋ بارىسىندا قوعامدىق الاڭدار ۇيىمداستىرۋ شارالارى جاسالدى. بيىلعى سايلاۋ بارىسىندا كوميسسيا مۇشەلەرى تۇرعىنداردى سۇلتانماحمۇت توراي­عىروۆ اتىنداعى مەملەكەتتىك ۋني­ۆەرسيتەتتىڭ 106-اۋديتورياسىن­دا قابىلداۋدا. ال سايلاۋعا دەيىن وبلىستىق قوعامدىق كوميسسيا مۇشەلەرى ءتۇرلى شارالار ۇيىمداستىرۋدا. ءبىر كابيناعا بىرنەشە ادامنىڭ كىرمەۋىن, بيۋللەتەندى سۋرەتكە ءتۇسىرىپ, الەۋمەتتىك جەلىلەردە جاريالاۋ, جاقىن تۋىسى ءۇشىن داۋىس بەرۋ سياقتى قاتەلىكتەردى بولدىرماۋ ءۇشىن بايقاۋشىلارعا ارنالعان ارنايى سەمينار-ترەنينگتەر وتۋدە. – ماقسات – سايلاۋدا داۋىس بەرۋگە قۇقى بار ءار ادامدى ەل ءۇشىن ماڭىزدى ساياسي شارادان تىس قالدىرماۋ, – دەيدى يلدار قاليەۆ. فاريدا بىقاي, «ەگەمەن قازاقستان».