يليا يلين ءتورتىنشى رەت الەمنىڭ ۇزدىك اۋىر اتلەتى اتاندى

استانا. 25 اقپان. قازاقستاندىق سپورتشى يليا يلين الەم بويىنشا 2015 جىلدىڭ ەڭ ۇزدىك اۋىر اتلەتى اتاندى. ول وسىمەن بۇل اتاقتى ءتورتىنشى رەت يەمدەنىپ وتىر. بۇل تۋرالى دۇنيەجۇزىلىك اۋىر اتلەتيكا فەدەراتسياسىنىڭ (IWF) رەسمي سايتى – iwf.net-كە سىلتەمە جاساعان egemen.kz ءتىلشىسى حابارلادى. مۇنداي اتاقتىڭ يەسى اتالعان ۇيىمنىڭ سايتىندا داۋىس بەرۋ ارقىلى انىقتالادى. ايەلدەر اراسىندا ەڭ ۇزدىك اتلەت رەتىندە تايبەي سپورتشىسى سيۋي شۋ-ءچيننىڭ ەسىمى اتالدى. قوس سپورتشى دا ەكى مىڭنان استام داۋىس جيناپ, ايقىن باسىمدىقپەن جەڭىسكە جەتكەن. سونىمەن قاتار, IWF ءيليننىڭ بۇل اتاققا كەزەكتى رەت قول جەتكىزۋىنە بىلتىر رەسەيدىڭ گروزنىي قالاسىندا وتكەن تۋرنيردەگى جارقىن جەڭىسى دە سەبەپ بولعانىن ايتۋدا. سول سايىستا وتانداسىمىز ەكى بىردەي الەم رەكوردىن جاڭارتىپ, بۇكىل الەمدى اۋزىنا قاراتقان ەدى. ايتا كەتەيىك, يلين بۇعان دەيىن 2005, 2006 جانە 2014 جىلدىڭ ۇزدىگى اتاندى. وتانداسىمىز ءۇشىن بيىلعى جىلدىڭ باستى جارىسى ريو-دە-جانەيرو وليمپياداسى ەكەنى بەلگىلى. جالپى, يليا ءيليننىڭ وسىعان دەيىن قاتىسقان بارلىق سايىستا تەك التىن مەدال الىپ كەلگەنى بارشامىزعا ءمالىم. باسقا جارىستاردى ايتپاعاندا, وليمپيادانى ەكى رەت (بەيجىڭ-2008, لوندون-2012), الەم چەمپيوناتىن ءتورت رەت (دوحا, 2005, سانتو-دومينگو, 2006, پاريج, 2011, الماتى, 2014) جەڭىپ العان ول بۇگىندە ءۇشىنشى وليمپيادا التىنى ءۇشىن تەر توگۋدە. ەلامان قوڭىر. دەرەك: iwf.net. سۋرەت: confederation.kz.