باسپانا باعىتىندا جوسپارلار ايقىن

بيىل تۇرعىن ءۇي قۇرىلىس جيناق بانكىنىڭ جەلىسى بويىنشا قۇرىلىس كولەمى الدىڭعى جىلدارمەن سالىستىرعاندا, بىرنەشە ەسەگە ارتاتىن بولادى. مەملەكەت باسشىسى تۇرعىن ءۇي قۇرىلىس جيناق جۇيەسىنىڭ تيىمدىلىگىنە وڭ باعا بەرىپ, كرەديتتىك تۇرعىن ءۇي قۇرىلىسىنا 149 ملرد.تەڭگە ءبولۋدى تاپسىردى. اتالعان قاراجات 814 مىڭ شارشى مەتر تۇرعىن ءۇي سالۋعا مۇمكىندىك بەرەدى. بۇل جونىندە پرەزيدەنت جا­نىن­داعى ورتالىق كوممۋنيكاتسيا­لار قىزمەتىندە وتكەن ءباسپاسوز ءماسليحاتىندا «قازاقستاننىڭ تۇر­عىن ءۇي قۇرىلىس جيناق بانكى» ­اق باس­قارما توراعاسى ايبا­تىر جۇما­عۇلوۆ ءمالىم ەتتى. ونىڭ ءسو­­زىنە قا­راعاندا, ايتىلعان تۇرعىن ءۇي­لەر سانى شامامەن 14 مىڭ پاتەردى قۇرايدى. ايتار بولساق, 22 ملرد.تەڭگەسى بانكتىڭ سالىمشىلارىنا نەسيە بەرۋگە باعىتتالسا, قالعان 127 ملرد.تەڭگەسى الەۋمەتتىك تۇرعىن ءۇي سالۋ ماقساتىندا «بايتەرەك» ۇلتتىق باسقارۋشى حولدينگىنە بولىنەدى. قارجى ەكى باعىتقا – جەرگىلىكتى اتقارۋشى ورگاندارعا 67 ملرد.تەڭگە جانە «بايتەرەك دەۆەلوپمەنت» اق-قا 60 ملرد.تەڭگە كولەمىندە اۋدارىلاتىن بولادى. سونىمەن قاتار, «بايتەرەك دەۆەلوپمەنت» اق جەلىسىمەن ساتىلعان پاتەرلەر تولىعىمەن تۇرعىن ءۇي قۇرىلىس جيناق بانكى سالىمشىلارىنا تاپسىرىلماق. ال, جەرگىلىكتى اتقارۋشى ورگاندار جەلىسىمەن قارجىلاندىرىلعان تۇرعىن ءۇيدى الۋشىلاردىڭ كەم دەگەندە 50 پايىزى اكىمدىك كەزەگىندەگى ازاماتتار بولادى. بۇداي بىلاي بولاشاق باس­پانانى جوبالاۋ كەزەڭىندە بانك پەن ونىڭ تۇتىنۋشىلارىنىڭ ۇسىنىستارى ەسكەرىلمەك. ءار شارشى مەتردىڭ قۇنى مەملەكەتتىك ساراپتامادان وتكەننەن كەيىن ناقتىلانادى, دەسەك تە «بايتەرەك دەۆەلوپمەنت» اق جەلىسى بويىنشا ءار شارشى مەتر ءۇشىن وڭىرلەردەگى باعا 180 مىڭ تەڭگەدەن اسپايدى. بۇل باعا الماتى مەن استانا قالالارىندا 200 000 تەڭگە كولەمىندە بولادى. ال, جەرگىلىكتى اتقارۋشى ورگاندار جەلىسىمەن بەكىتىلگەن ءبىر شارشى مەتردىڭ باعاسى – وڭىرلەردە 140 000 تەڭگە بولسا, استانا مەن الماتى قالالارىندا 180 000 تەڭگەنى قۇراماق. جانە دە بيىل تۇرعىن ءۇي قۇرىلىس جيناق بانكى 2020 جىلعا دەيىنگى وڭىرلەردى دامىتۋدىڭ مەملەكەتتىك باعدارلاماسى اياسىندا جالپى اۋدانى 459 000 شارشى مەتر باسپانانى سالىمشىلارىنا تاپسىرادى. تۇتاستاي العاندا, تۇرعىن ءۇي قۇرىلىس جيناق بانكى جەلىسىمەن شامامەن 21 000 پاتەر پايدالانۋعا بەرىلەتىن بولادى. بۇل رەتتە ۇستىمىزدەگى جىلدىڭ جوسپارلارىن بىرقاتار اتاپ وتكەن بانك باسشىسى وتكەن جىلدىڭ تۇرعىن ءۇي ماسەلەسىندە ناتيجەلى بولعاندىعىن العا تارتتى. 2016 جىل­دىڭ قاڭتارىنداعى ەسەپ بو­يىنشا قتقجب 49,7% ۇلە­سى­مەن بارلىق ەكىنشى دەڭگەيلى بانك­­تەر اراسىنداعى تەڭگەمەن اشىلعان دەپوزيتتەر نارىعىندا ۇزدىكتەر قاتارىندا تۇر. وتكەن جىلدىڭ قورىتىندىسىنا كەلەر بولساق, بانكتىڭ قۇرىلىسقا جانە تۇرعىن ءۇي الۋعا بەرىلەتىن نەسيە نارىعىنداعى ۇلەسى 75%-عا جەتتى. سونىمەن قاتار, پروبلەمالى نەسيەلەر ۇلەسى 0,36%-دى قۇرادى. بۇل باسقا ەدب-لەر اراسىنداعى ەڭ تومەن كورسەتكىش بولىپ وتىر. سونداي-اق, 2015 جىلى تۇرعىن ءۇي قۇرىلىس جيناق جۇيەسىن تاڭداپ, قتقجب-دا دەپوزيت اشقان سالىمشىلاردىڭ سانى 224 703-ءتى قۇراعانىن كولدەنەڭ تارتقان ا.جۇماعۇلوۆ قازىرگى تاڭدا بانكتىڭ 601 423 قولدانىستاعى دەپوزيتتەرى بار ەكەندىگىن جەتكىزدى. ەلميرا ماتىباەۆا, «ەگەمەن قازاقستان».