«كاۋسارىم»

ستۋدەنت ءوز اۋىلى تۋرالى تۇسىرگەن شىعارماسىن وسىلاي اتادى قوستانايدا «كاۋسارىم» اتتى قىسقا مەتراجدى ءفيلمنىڭ تۇساۋكەسەرى ءوتتى. ونىڭ رەجيسسەرى جانىبەك كاربوزوۆ تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ 2 كۋرسىندا وقيدى. ستۋدەنتتىڭ بۇل شىعارماسى فەيسبۋك الەۋمەتتىك جەلىسى ارقىلى كورەرمەندەردىڭ سۇيىسپەنشىلىگىنە يە بولىپ ۇلگەرىپتى. جارتى ساعاتتان ءسال اساتىن ءفيلمنىڭ مازمۇنى دا كۇردەلى ەمەس, بىراق ايتارى بار – اۋىلدىڭ گۇلدەنگەن ەرتەڭىن ارماندايدى. قالادا كومپيۋتەرمەن تەل ءوسىپ جاتقان بەكجاندى قىسقى كانيكۋل باستالعاندا اناسى «مەنىڭ اۋىلعا بارعىم كەلمەيدى, وندا نە قىزىق بار؟» دەگەنىنە بولماي, قۇلاعىنان سۇيرەگەندەي ەتىپ اۋىلعا الىپ كەلەدى. تورعاي وڭىرىندەگى سوناۋ قابىرعا وزەنىنىڭ بويىنداعى كىشكەنتاي اۋىلدا اناسىنىڭ توركىنى تۇرادى. قاڭتاردىڭ قاقاعان ايازى, قالىڭ قار جامىلعان اۋىل بۇيىعىپ جاتقانداي. بىراق بۇل سىرت كوزگە عانا ەكەن. ناعاشىسىنىڭ ءوزى قاتارلاس ءجاسوسپىرىم ۇلى ايدارمەن بىرگە قىس قىزىعىنا تويمايدى. ايدار جيەنى بەكجاندى ەرتىپ الىپ, اۋىل بالالارىمەن بىرگە سىرعاناق تەبەدى, تۇيەگە مىنەدى, قوراداعى جاس تولدەرگە قارايدى, شومەلەنىڭ باسىنا شىعىپ وينايدى. قابىرعا وزەنىنە بارىپ, اۋىل ادامدارىنىڭ مۇزدان بالىق اۋلاعانىن قىزىقتايدى. اۋىل كلۋبىندا اۋىلداستار جاڭا جىل شىرشاسىن وتكىزەدى. اۋىل بالاسى ايدار قالادان كەلگەن بەكجانعا قاراعاندا پىسىق, وعان اۋىلدىڭ تاريحىن ايتىپ بەرەدى. وسىنىڭ بارلىعى دا اۋىلدان شىعىپ, قازاقتىڭ اتىن كوككە كوتەرگەن حالقىمىزدىڭ تالاي مىقتىسىنىڭ بالالىق شاعىنا ءتان كورىنىس. فيلمدە بەكجاننىڭ اۋىلداعى كاۋسار دەگەن قىزعا بالالىق ماحابباتى دا شىنايى, ادەمى سۋرەتتەلەدى. كاۋساردىڭ جەڭگەسى ارقىلى حالقىمىز داستۇرلەرىنىڭ, مىنەزىنىڭ اۋىلدا ءالى ساقتالعانىن قۋانا جەتكىزگەندەي بولادى. ال اپپاق قار ۇستىندە بالالاردىڭ ءان, ءبيىن ميۋزيكل جانرىندا بەرۋىمەن فيلم رەجيسسەرى بۇگىنگى بۇيىعى قازاق اۋىلى قۇرىمايدى, قايتا گۇلدەنەدى دەگەن وي ايتقىسى كەلەدى. ءبىر قىزىعى, قىسقا مەتراجدى فيلمگە رەجيسسەر جانىبەك اكتەر ىزدەمەپتى. وندا ويناپ جۇرگەن كەيىپكەرلەردىڭ بارلىعى دا ءوزىنىڭ اناسى سالتانات, اكەسى مانات, ءىنىسى ءسارۋاردان باستاپ, ءوزىنىڭ اۋىلداستارى, اۋىل بالالارى. ءفيلمنىڭ تۇساۋكەسەرىندە وبلىستىق ءماسليحات حاتشىسى سايلاۋبەك ەسجانوۆ, بەلگىلى اقىن اقىلبەك شاياحمەت جانە تاعى باسقالار بولاشاق رەجيسسەر جانىبەك كاربوزوۆتىڭ تىرناقالدى تۋىندىسىنا ريزاشىلىعىن ايتىپ, ونەرىنە ءورىس تىلەدى. ءنازيرا جارىمبەتوۆا, «ەگەمەن قازاقستان». قوستاناي.