استانا. 24 اقپان. بۇگىن ۋەفا چەمپيوندار ليگاسىنىڭ 1/8 فينالى شەڭبەرىندە ەكى ويىن وينالدى. اتاپ ايتقاندا, «ارسەنال» ءوز الاڭىندا «بارسەلونادان» 0:2 ەسەبىمەن جەڭىلسە, «يۋۆەنتۋس» پەن «باۆاريا» 2:2 ەسەبىمەن تەڭ ءتۇستى. بۇل تۋرالى egemen.kz ءتىلشىسى حابارلادى.
«ارسەنال» (لوندون, انگليا) – «بارسەلونا» (بارسەلونا, يسپانيا) 0:2
گولدار: ليونەل مەسسي 71, 83 (پەنالتي).
لوندوندا وتكەن «ارسەنال» – «بارسەلونا» كەزدەسۋىندە يسپانيادان كەلگەن كوماندا ايقىن باسىمدىق تانىتتى. ستاتيستيكالىق كورسەتكىشتەرگە كوز جۇگىرتەر بولساق, قاقپاعا جاسالعان سوققىلار بويىنشا كاتالونيالىقتار پەتر چەحتىڭ يەلىگىن 11 رەت نىساناعا السا, الاڭ يەلەرى 4 سوققىمەن عانا قارىمتا قايتاردى. سونداي-اق, ويىن بارىسىندا دوپقا يەلىك ەتۋ كورسەتكىشىنەن دە «بارسەلونا» باسىم ءتۇستى (66% – 34%).
بۇل باسىمدىق ءوز ناتيجەسىن بەرىپ, قوناقتار مەسسي سوققان ەكى گولدىڭ ارقاسىندا جەڭىسكە جەتتى. الەمنىڭ ەڭ ۇزدىك ويىنشىسى الدىمەن 71-مينۋتتا مەرگەندىگىمەن كوزگە تۇسسە, 83-مينۋتتا پەنالتيدەن گول سوعىپ, ءدۋبلدىڭ اۆتورى اتاندى.
قارىمتا كەزدەسۋ 16 ناۋرىزدا بارسەلونادا وتەدى.
«يۋۆەنتۋس» ( تۋرين, يتاليا) – «باۆاريا» (ميۋنحەن, گەرمانيا) 2:2
گولدار: پاۋلو ديبالا 63, ستەفانو ستۋرارو 76 – توماس ميۋللەر 43, ارەن روببەن 55.
«يۋۆەنتۋس» پەن «باۆاريا» اراسىنداعى ماتچ تا اسا تارتىستى ءوتتى. ميۋنحەندىكتەر ءبىرىنشى تايمنىڭ سوڭىندا, ياعني 43-مينۋتتا توماس ميۋللەردىڭ كومەگىمەن ەسەپ اشقان بولاتىن. ال ەكىنشى تايمدا, ناقتى ايتساق, 55-مينۋتتا ارەن روببەن ەسەپتى ەسەلەدى.
ءوز جانكۇيەرلەرى الدىندا نامىسقا تىرىسقان تۋريندىكتەر ويىن سوڭىنا دەيىن تارازى باسىن تەڭەستىرىپ ۇلگەردى. الدىمەن 63-مينۋتتا ديبالا ەسەپ ايىرماسىن قىسقارتسا, 76-مينۋتتا ستەفانو ستۋرارو كومانداسىنىڭ ەكىنشى گولىن سوقتى. قالعان ۋاقىتتا تابلوداعى ەسەپ وزگەرمەي, ويىن تەڭ اياقتالدى.
بۇل كوماندالاردىڭ قارىمتا كەزدەسۋلەرى 16 ناۋرىزدا ميۋنحەندە وتەدى.
ەلامان قوڭىر.
دەرەك: egemen.kz.
سۋرەت: championat.com, AFP.
