قازاقستاندىقتار 67 مەملەكەتكە ۆيزاسىز قاتىناي الادى

استانا. 23 اقپان. قازاقستاندىقتار الەمنىڭ 67 مەملەكەتىنە ۆيزاسىز بارۋ مۇمكىندىگىنە يە. وسى كورسەتكىش بويىنشا بۇگىندە ەلىمىز Henley & Partners Visa Restrictions Index رەيتينگىندە 71-ورىندا تۇر. بۇل تۋرالى zakon.kz سايتىنا سىلتەمە جاساعان egemen.kz ءتىلشىسى حابارلادى. قازاقستان ازاماتتارى جەر بەتىندەگى 218 مەملەكەتتىڭ 67-سىنە ۆيزاسىز بارا الادى. وتكەن جىلى ۆيزاسىز رەجىم ورناتىلعان ەلدەر سانى 65-كە جەتىپ, اتالعان رەيتينگتە 72-ساتىدا تۇرعانىمىزدى اتاپ وتكەن ءجون. كورشىلەس ەلدەردەن رەسەي – 48, وزبەكستان – 58 جانە ازەربايجان 75-ورىندا تۇر. ال سوڭعى ورىندارعا پاكىستان, يراك جانە اۋعانستان جايعاسقان. ال كوش باسىندا ءۇشىنشى جىل قاتارىنان گەرمانيا تۇر. اتالعان مەملەكەتتىڭ ازاماتتارى 177 ەلگە ۆيزاسىز قاتىناي الادى. ەكىنشى ورىندا 176 ەلمەن ۆيزاسىز رەجىم ورناتقان شۆەتسيا تۇرسا, 175 ەلگە ەركىن قاتىناۋعا قول جەتكىزگەن فينليانديا, فرانتسيا, يسپانيا, يتاليا جانە ۇلىبريتانيا ەلدەرى ءۇشىنشى ورىنعا تابان تىرەگەن. ەلامان قوڭىر. دەرەك: zakon.kz. سۋرەت: m-astana.kz.