قوستانايدا جاس جىگىتكە وق اتقان قىلمىسكەر 9 جىلعا سوتتالدى

قوستاناي. 23 اقپان. قوستاناي قالاسىنىڭ №2 سوتى قىلمىستىق كودەكستىڭ 106-بابىنىڭ 3-بولىگى (دەنساۋلىققا قاساقانا اۋىر زيان كەلتiرۋ سالدارىنان ابايسىزدا ادام ولىمىنە اكەپ سوعۋ) بويىنشا 30 جاستاعى اسحات جۇسىپوۆكە قاتىستى سوت ۇكىمىن شىعاردى. بۇل تۋرالى قوستاناي وبلىستىق سوتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. 2015 جىلدىڭ 17 قاراشاسىندا ساعات 05:00 شاماسىندا اسحات ءجۇسىپوۆ تەرگەۋ انىقتاماعان ادامدار توبىمەن الدىن الا ءسوز بايلاسىپ, «دوبرىي» شاتحاناسىنىڭ قاسىندا 23 جاستاعى جابىرلەنۋشى ۋ-عا بىرنەشە رەت سوققى جاساعان. بۇزاقى ءجۇسىپوۆ مۇنىمەن توقتاماي, كوزىنە قان تولىپ, ۇڭعىسىز قارۋدان جابىرلەنۋشىنىڭ باسىنا ەكى رەت وق اتقان. قوستاناي قالالىق اۋرۋحاناسىنىڭ جان ساقتاۋ بولىمىنە جەتكىزىلگەن ۋ. ەسىن جيماستان قازا بولدى. وزگەنىڭ قانىن موينىنا جۇكتەگەن اسحات ءجۇسىپوۆ ايىپتى دەپ تانىلىپ, ءادىل سوت وعان 9 جىلعا باس بوستاندىعىنان ايىرۋعا ۇكىم شىعاردى, جازاسىن جالپى تارتىپتەگى تۇزەتۋ كولونياسىندا وتەيتىن بولادى. جابىرلەنۋشىنىڭ ماتەريالدىق شىعىنى مەن وعان كەلگەن مورالدىق زالالدى ءوندىرۋ تۋرالى ازاماتتىق شاعىمى ءىشىنارا قاناعاتتاندىرىلىپ, جابىرلەنۋشى ۋ-دىڭ تۋىستارىنىڭ پايداسىنا 631 369 تەڭگە ماتەريالدىق جانە 1,5 ملن. تەڭگە مورالدىق شىعىن ءوندىرىلدى. سوت ۇكىمى ءالى زاڭدى كۇشىنە ەنگەن جوق. ءنازيرا جارىمبەتوۆا. دەرەك: قوستاناي وبلىستىق سوتىنىڭ ءباسپاسوز قىزمەتى. سۋرەت: egemen.kz.