اقش پەن رەسەي سيرياداعى قاقتىعىستار جونىندە كەلىسىمگە كەلدى

استانا. 23 اقپان. اقش پەن رەسەي سيريا جەرىندەگى قاقتىعىستى 27 اقپاننان باستاپ توقتاتۋ تۋرالى ءوزارا كەلىسىمگە قول قويدى. بۇل تۋرالى ria.ru سايتىنا سىلتەمە جاساعان egemen.kz ءتىلشىسى حابارلادى. جابىق ەسىك جاعدايىندا وتكىزىلگەن كەلىسسوزدەردەن كەيىن ەكى ەل وكىلدەرىنىڭ بىرلەسىپ جاساعان مالىمدەمەسىندە 27 اقپاننان باستاپ سيريا جەرىندەگى بارلىق اسكەري قيمىلدار توقتاتىلاتىنى بەلگىلى بولدى. ال ەكسترەميستىك توپتار 26 اقپان كۇنى داماسك ۋاقىتى بويىنشا, ساعات 12:00-گە دەيىن لاڭكەستىك ارەكەتتەرىن دوعارىپ, بۇل شارتقا كەلىسەتىندەرىن رەسەي نەمەسە اقش اسكەريلەرىنە بىلدىرۋلەرى قاجەت. «ءبىز بۇل ءىستى قۋانا-قۋانا قۇپتايمىز. سونداي-اق, الداعى جۇما كۇنى قاقتىعىستار توقتايدى دەپ ۇمىتتەنەمىن. ال ءبىر اپتادان كەيىن بۇل ءىس جۇزەگە اسقان سوڭ, سيرياارالىق كەلىسسوزدەر باستالۋى ءتيىس», – دەدى ۇلىبريتانيانىڭ بىرىككەن ۇلتتار ۇيىمىنداعى تۇراقتى وكىلى مەتتيۋ رايكروفت. اتالعان ۇيىمنىڭ حابارلاۋىنشا, سيريا جەرىندە 2011 جىلدىڭ ناۋرىز ايىندا باستالعان قاقتىعىستان بۇگىنگە دەيىن 220 مىڭنان استام ادام قازا تاپقان. ايان ءابدۋالي. دەرەك: ria.ru. سۋرەت: mirprognozov.ru.