عارىشكەر قوستانايلىق ءسابيدىڭ تۇساۋىن كەستى

ەلىمىزدىڭ ءۇشىنشى عارىشكەرى, حالىق قاھارمانى, «قازاقستان عارىش ساپارى» ۇق» اكتسيونەرلىك قوعامى پرەزيدەنتىنىڭ ورىنباسارى ايدىن ايىمبەتوۆتىڭ كەلۋى قوستانايلىقتارعا قۋانىش سىيلادى. ول الدىمەن ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىندە بولىپ, وقىتۋشىلار قۇرامىمەن جانە ستۋدەنت جاستارمەن كەزدەستى. جاستاردىڭ كوپتەگەن سۇ­راق­تارىنا جاۋاپ بەرىپ, پىكىر ال­ماستى. بالا كەزىنەن عارىشكەر بولۋدى ارمانداپ, الدىنا ماقسات قويىپ, سول جولدا تاباندىلىق كور­سەتكەن ايدىن اقان ۇلىنىڭ اڭگىمەسى ستۋدەنتتەردى دە رۋح­تان­دىرعانداي ەدى. ايدىن مۇنان كەيىن دوس­تىق ۇيىندە قوستاناي جۇرت­شى­­­لىعىمەن, زيالى قاۋىم وكىل­دەرىمەن ءجۇز­دەستى. كەزدەسۋدە قارت اقىن جول­بارىس بايازيد, اقىن ۇستاز الەكساندرا سۋس­لو­ۆا عارىشكەرگە ارناعان ولەڭ­دەرىن وقىدى. سۋرەتشى نيكولاي تورشين قوستاناي ءوڭىرى تا­بيعاتىنىڭ كورىنىسىن بەينەلەگەن ءوز شىعارماسىن تارتۋ ەت­تى. عارىشكەر حالقىمىزدىڭ تۇڭ­­­عىشتارىن, ىرىلەرىن بەرگەن توپىراققا كەلگەنىنە, كورسەتىلگەن قۇرمەتكە ريزاشىلىعىن ءبىلدىردى. كوپشىلىكتىڭ سۇراعىنا جاۋاپ بەردى, ەمەن-جارقىن اڭگىمەلەستى. وسى كەزدەسۋدە حالقىمىزدىڭ جاق­سى ىرىمى دا ورىندى جاسالدى. اتا-اناسىنىڭ سۇراۋىمەن ايدىن 11 ايلىق كىشكەنتاي بەك­نۇر مادەنيەتتىڭ تۇساۋىن كەستى. ايدىن ايىمبەتوۆ وبلىس ورتالىعىنداعى «قازتەلەكوم» اكتسيونەرلىك قوعامىنىڭ وبلىستىق ءبولىمىنىڭ دە قوناعى بولدى. وندا قۇرمەتتى قوناققا قارقىندى دامىپ وتىرعان بايلانىس قىزمەتىنىڭ جەتىستىكتەرى كورسەتىلدى. وسى كەزدەسۋدە ايدىن اقان ۇلى دامىعان بايلانىس ءتۇرىنىڭ ارقاسىندا سوناۋ شالعايداعى جانكەلدين اۋدانىنىڭ قۇرمەتتى ازاماتتارىمەن بەينە-كونفەرەنتسيا ارقىلى جۇزدەسىپ, سالەم بەردى. تورعاي ءوڭىرىنىڭ اقساقالدارى عارىشكەردىڭ ەرلىككە پارا-پار ەڭبەگىنە سۇيسىنەتىندىكتەرىن ايتىپ, تىلەكتەرىن جەتكىزدى. ءنازيرا جارىمبەتوۆا, «ەگەمەن قازاقستان». قوستاناي.