«بي عالاماتىنىڭ» عاجابى

جاقىندا «استانا بالەت» تەاترى العاش ۇسىنعان «بي عالاماتى» باعدارلاماسى تابىستى ءوتىپ, كورەرمەن قاۋىم بەلگيالىق حورەوگراف ب.امارانتەنىڭ «GALA» قويىلىمىن زور ىقىلاسپەن تاماشالادى. بەلگىلى ۇجىمنىڭ بۇل جاڭا دۇنيەسىنىڭ ەرەكشەلىگى سول, وعان زاماناۋي حورەوگرافيالىق ورنەكتەر قوسىلعان. تالعامپاز قاۋىم مۇنىڭ ءبارىن «عالامات» دەگەن ءبىر اۋىز سوزبەن باعالادى. مۋزىكاسىن ا.امار مەن ب.گا­فاروۆ جازعان, حورەوگراف ن.دمي­­تريەۆسكي قويعان «الەم» با­لەتىنەن بەرىلگەن كەڭ قۇ­لاش­تى كۇردەلى فراگمەنتتەر جيىلعان ونەرسۇيگىش جۇرتتى كوڭىلدى جاۋلاپ الار ەرەكشە كۇيگە بولەگەنى انىق. مۇنداعى جارقىن شاتتىققا تولى بي قيمىلدارى جاندى ەلجىرەتەر ەرەكشە سىرلى دا سۇلۋ سازبەن كومكەرىلدى. بۇل كۇنى كورەرمەنگە تار­تىلعان تاعى ءبىر سىي – «GAIA» قويىلىمىنىڭ تۇساۋكەسەرى بولدى. بۇل رەتتە زالداعى قاۋىم ءبيدى قويعان حورەوگراف ر.اما­رانتە مەن مۋزىكاسىن جازعان سازگەر ح.تاۆارەس دارىن­دا­رىنىڭ عالاماتىنا قول سوق­تى دەسەك تە بولادى. ەجىكتەي ايتساق, بەلگيالىق ايگىلى حورەوگراف ريكاردو اما­رانتەنىڭ «GAIA» اتتى جاڭا تۋىندىسى حورەوگرافيا تىلىمەن جەتكىزىلگەن جەر شارىنىڭ جىلناماسى ىسپەتتى. ونىڭ ماز­مۇن-ماعىناسى وتە تەرەڭ. كورەرمەن قاۋىم كۇندى اينالاتىن جەر شارىمىزداعى كۇردەلى قۇبىلىستاردىڭ سىرىنا قانىعادى. باعزى زامان دانىشپاندارى ءبىزدىڭ الەم ءتورت تاعان – جەر, سۋ, اۋا جانە وتقا سۇيەنگەن دەپ بىلگەن. الايدا, جەر بەتىندەگى تىرشىلىكتى ونسىز ەلەستەتە المايتىن تاعى ءبىر تاعان بار, ول – وسىمدىكتەر الەمى. اعاش, كوك مايسا ءشوپ, گۇلدەر بولماسا ءومىردىڭ ءسانى بار ما؟ ەندەشە, وسى بەس تاعاننىڭ ارقايسىسى جەر بەتىندەگى تىرشىلىكتى قامتاماسىز ەتىپ تۇراتىن كۇردەلى جۇيەنى قۇرايدى. ولاردىڭ ءبارى ءوزارا قارىم-قاتىناسقا ءتۇسىپ, ءبىرىن-ءبىرى تولىقتىرىپ, باي ءارى شەكسىز, دارحان دا عاجايىپ جەر ءجانناتىندا تىرشىلىك ەتەدى. ولاي بولسا ر.امارانتە ءبيىنىڭ عالاماتى استانالىق تالعامپاز كورەرمەنگە وسىناۋ ومىرلىك فيلوسوفيانى پاش ەتتى. نازار قاسىم.