كەشە استانادا ورتالىق سايلاۋ كوميسسياسى (وسك) سايلاۋ بيۋللەتەنىنە ساياسي پارتيالاردىڭ اتاۋلارىن رەتىمەن ەنگىزۋ ماقساتىندا جەرەبە تارتۋ شاراسىن وتكىزدى.
اتالعان راسىمگە ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ, وسك مۇشەلەرى, «نۇر وتان» پارتياسى توراعاسىنىڭ ءبىرىنشى ورىنباسارى اسقار مىرزاحمەتوۆ, «اق جول» پارتياسىنىڭ توراعاسى ازات پەرۋاشەۆ, «اۋىل» پارتياسىنىڭ حاتشىسى ءبورىباي جەكسەمبين, قكحپ سايلاۋالدى شتابىنىڭ جەتەكشىسى ايقىن قوڭىروۆ, جسدپ سايلاۋالدى شتابى جەتەكشىسىنىڭ ورىنباسارى اسحات راقىمجانوۆ, «بىرلىك» پارتياسى ساياسي بيۋروسىنىڭ مۇشەسى روزا قۋانىشباەۆا جانە بۇقارالىق اقپارات قۇرالدارىنىڭ وكىلدەرى قاتىستى.
جەرەبە تارتۋ ءراسىمى ورتالىق سايلاۋ كوميسسياسىنىڭ «سايلاۋ بيۋللەتەنىنە ساياسي پارتيالار اتاۋلارىن ەنگىزۋ تۋرالى جەرەبە وتكىزۋدىڭ ەرەجەسىن بەكىتۋ تۋرالى» 1999 جىلدىڭ 13 شىلدەسىندەگى قاۋلىسىمەن بەلگىلەنگەن ەرەجەگە سايكەس وتكىزىلدى.
ءراسىم بارىسىندا وسك حاتشىسى باقىت مەلدەشوۆ مولشەرى جانە ءتۇسى بويىنشا بىردەي كونۆەرتتەرگە پارتيالىق تىزىمدەرىن ورتالىق سايلاۋ كوميسسياسىنا تىركەگەن پارتيالاردىڭ سانىنا تەڭ, رەتتىك نومىرلەر بەلگىلەنگەن پاراقشالاردى سالدى. بۇل رەتتە ءبىر كونۆەرتتە نومىرلەنگەن تەك ءبىر پاراقشا عانا بولدى. سودان كەيىن كونۆەرتتەر جەلىمدەلىپ, ارالاستىرىلدى جانە بارلىق قاتىسۋشىلار كورە الاتىنداي قاشىقتىقتا ورنالاسقان ۇستەل ۇستىنە جايىلدى. ودان ءارى ساياسي پارتيالاردىڭ وكىلدەرى پارتيالىق تىزىمدەردىڭ تىركەلۋ ءتارتىبى بويىنشا كەزەكپەن ۇستەلدەن ءوزى تاڭداعان كونۆەرتتى الىپ, ونى اشىپ, پاراقشاداعى ءنومىردى جاريا ەتتى.
سونىمەن, جەرەبەگە ءسايكەس, سايلاۋ بيۋللەتەنىنە ەڭ ءبىرىنشى «نۇر وتان» پارتياسى ەنگىزىلەتىن بولدى. ءنومىردى پارتيا توراعاسىنىڭ ءبىرىنشى ورىنباسارى اسقار مىرزاحمەتوۆ تاڭداعان-دى. ودان كەيىنگىلەردى رەتىمەن باياندار بولساق, قكحپ-عا ەكىنشى, «اق جول» پارتياسىنا ءۇشىنشى, «بىرلىك» پارتياسىنا ءتورتىنشى, جسدپ-عا بەسىنشى, «اۋىل» پارتياسىنا التىنشى ءنومىر بۇيىردى. ناقتىلاي ايتقاندا, جەرەبە قورىتىندىسى بويىنشا انىقتالعانداي, 2016 جىلدىڭ 20 ناۋرىزىندا داۋىس بەرۋدى وتكىزۋ كەزىندە ساياسي پارتيالاردىڭ اتاۋلارى سايلاۋ بيۋللەتەنىنە مىنا ءتومەندەگىدەي تارتىپپەن ەنگىزىلەدى:
- «نۇر وتان» پارتياسى
- قازاقستان كوممۋنيستىك حالىق پارتياسى
- «اق جول» دەموكراتيالىق پارتياسى
- «بىرلىك» ساياسي پارتياسى
- جالپىۇلتتىق سوتسيال-دەموكراتيالىق پارتياسى
- «اۋىل» حالىقتىق-دەموكراتيالىق پاتريوتتىق پارتياسى
جولدىباي بازار,
«ەگەمەن قازاقستان».
سۋرەتتى تۇسىرگەن
ەرلان وماروۆ.
