«بارىس» «اق بارستان» جەڭىلىپ, جاعدايىن قيىنداتىپ الدى

استانا. 17 اقپان. بۇگىن قۇرلىقتىق حوككەي ليگاسىنىڭ تۇراقتى چەمپيوناتى شەڭبەرىندە استانانىڭ «بارىسى» قازاندا جەرگىلىكتى «اق بارسپەن» كەزدەسىپ, 2:5 ەسەبىمەن جەڭىلدى. بۇل تۋرالى egemen.kz ءتىلشىسى حابارلادى. ويىن ايدىن يەلەرىنىڭ ايقىن باسىمدىعىمەن باستالدى. كەزدەسۋدىڭ بار بولعانى 3-مينۋتىندا قازاندىقتار دجاستين ازەۆەدۋدىڭ كومەگىمەن ەسەپ اشتى. ارادا 7 مينۋت وتكەندە, فەدور مالىحين ەسەپتى ەسەلەدى. بۇنىمەن دە توقتاماعان «اق بارس» حوككەيشىلەرى ۇزىلىسكە دەيىن تاعى ءبىر شايبا سوعىپ, ەسەپتى 3:0-گە جەتكىزدى. اتاپ ايتقاندا, 16-مينۋتتا ارتەم لۋكويانوۆ مەرگەندىگىمەن كوزگە ءتۇستى. ەكىنشى كەزەڭ باستالماي جاتىپ, قارسىلاستارىمىز ءتورتىنشى شايبالارىن سوعىپ ۇلگەردى. ناقتى ايتار بولساق, 22-مينۋتتا مالىحين ءدۋبلدىڭ اۆتورى اتاندى. وسى گولدان كەيىن ەس جيعانداي بولعان «بارىس» 2 مينۋتتىڭ ىشىندە, ياعني 25 جانە 27-مينۋتتاردا ەكى شايبا سوعىپ, جانكۇيەرلەرىنە ءۇمىت سىيلاعان ەدى. بۇل گولداردىڭ اۆتورلارى – تيىسىنشە داستين بويد پەن رومان ستارچەنكو. الايدا, ويىننىڭ 32-مينۋتىندا «اق بارس» ساپىنان ۆاسيلي توكرانوۆ ناتيجەلى سوققى جاساپ, كومانداسىنىڭ 5-شايباسىن سوقتى. قالعان ۋاقىتتا ەسەپ وزگەرمەي, تاتارستاننىڭ كومانداسى جەڭىسكە جەتتى. وسىلايشا, «بارىس» بيىلعى ماۋسىمدا 31-رەت جەڭىلىپ وتىر. بۇگىندە قورجىنىندا 83 ۇپاي بار كوماندامىز شىعىس كونفەرەنتسياسىندا 9-ورىندا تۇر. پلەي-وفف جولداماسىنا تالاستاعى باستى باسەكەلەسىمىز نيجنەكامسكىنىڭ «نەفتەحيميگى» بۇگىن سىرت الاڭدا ءتولياتتيدىڭ «لاداسىن» جەڭىپ, تۋرنير كەستەسىندە ءبىر ساتى كوتەرىلدى. «لادا» ازىرگە 86 ۇپايمەن 8-ورىندا تۇر. ەندى ليگانىڭ تۇراقتى چەمپيوناتى اياسىندا ءبىر عانا تۋر قالدى. ول تۋردا «بارىس» ومبىدا جەرگىلىكتى «اۆانگاردپەن» سىنعا تۇسەدى. ال «نەفتەحيميك» ءوز الاڭىندا ۋفانىڭ «سالاۆات يۋلاەۆىن» قابىلدايدى. بۇل كەزدەسۋلەر 18 اقپان كۇنى وتەدى. استانالىقتاردىڭ پلەي-وففقا وتۋدەن ءالى دە بولسا ءۇمىتى ۇزىلگەن جوق. ول ءۇشىن اندرەي نازاروۆتىڭ شاكىرتتەرىنە سوڭعى ويىندا جەڭىپ قانا قويماي, «نەفتەحيميكتىڭ» نەگىزگى ۋاقىتتا جەڭىلۋىن تىلەۋدەن باسقا امالدارى جوق. ەلامان قوڭىر. دەرەك: egemen.kz. سۋرەت: hcbarys.kz.