اقتوبەلىك پەداگوگتار بىلىكتىلىكتى جەتىلدىرۋ كۋرسىنان ءوتتى

اقتوبە. 16 اقپان. اقتوبەلىك 29 پەداگوگ «ورلەۋ» بىلىكتىلىكتى ارتتىرۋ ورتالىعى» اق وبلىستىق فيليالىنىڭ پەداگوگ قىزمەتكەرلەردىڭ بىلىكتىلىگىن ارتتىرۋ ينستيتۋتىندا «ءدىنتانۋ نەگىزدەرى» كۋرسىن وقىتۋدىڭ تەوريالىق جانە ادىستەمەلىك نەگىزدەرى كۋرسى بويىنشا ءدارىس الىپ, سەرتيفيكاتتارعا يە بولدى. بۇل تۋرالى egemen.kz ءتىلشىسى حابارلادى. وسى پاننەن ساباق بەرەتىن ۇستازدار الدىندا فيلوسوفيا عىلىمدارىنىڭ دوكتورى, پروفەسسور التاي تايجانوۆ, پەداگوگيكا عىلىمدارىنىڭ كانديداتى, وبلىستىق پەداگوگ قىزمەتكەرلەردىڭ بىلىكتىلىگىن ارتتىرۋ ينستيتۋتىنىڭ كافەدرا مەڭگەرۋشىسى اباي دۇيسەنباەۆ, وبلىستىق ءدىن ىستەرى باسقارماسىنىڭ باسشىسى باۋىرجان ەسماحان جانە تاعى باسقا ماماندار ءدارىس وقىدى. پەداگوگيكا عىلىمدارىنىڭ كانديداتى اباي دۇيسەنباەۆتىڭ ايتۋىنشا, جالپى ءبىلىم بەرەتىن مەكتەپتەردە «ءدىنتانۋ نەگىزدەرى» بۇگىنگە دەيىن 9-سىنىپ وقۋشىلارىنا فاكۋلتاتيۆتىك ساباق رەتىندە جۇرگىزىلىپ كەلسە, الداعى وقۋ جىلىنان باستاپ 8-9-سىنىپتار ءۇشىن مىندەتتى ءپان رەتىندە باعدارلاماعا ەنگىزىلەدى ەكەن. ءپان مۇعالىمدەرى وقۋشىلارعا الەمدىك جانە ءداستۇرلى دىندەردىڭ تاريحى, بۇگىنى جايلى ايتۋمەن عانا شەكتەلمەي, ولاردى ءدىني سەكتالاردىڭ قۇرعان تورىنان, جات اعىمداردان قورعانا بىلۋگە ۇيرەتۋلەرى كەرەك. ال بۇل جاستار تاربيەسى ءۇشىن وتە ماڭىزدى قادام ەكەنىن انىق. ساتىبالدى ءساۋىرباي. دەرەك: egemen.kz. سۋرەت: aktobegazeti.kz.