اۆتوبۋس جۇرگىزۋشىسى ءارى جاس, ءارى ماس...

ارينە, قالا ىشىندەگى دىڭ جۇرگىزۋشىدەن قۇجات سۇراماق تۇگىلى تۇرىنە دە ءۇڭىلىپ قارا­ماي­تىنى و باستان بەلگىلى. كو­شە بويىندا تۇرعان ماي قىزمەتكەرلەرى دە اۋزى-مۇر­نىنان شىعىپ, ىڭىرانىپ بارا جاتقان اۆتوبۋستاردى توقتاتىپ, قۇجاتىن تەكسەرۋدى ارتىق شارۋا كورەدى. سودان بولار قالا ىشىندە جۇيتكىپ جۇرگەن اۆتوبۋستاردىڭ شوپىرلارى تىپتەن ەركىنسىپ كەتىپتى. نەبارى ءۇش-اق كۇندە وتكەن رەسپۋبليكالىق «اۆتوبۋس» جەدەل-پروفيلاكتيكالىق ءىس-شاراسىندا تاراز قالالىق ءىىد جول-پاترۋلدىك قىزمەتى №37 باعىت بويىنشا جولاۋشى تاسىمالداپ جۇرگەن اۆتوبۋستىڭ ەكى جۇرگىزۋشىسىن ۇستادى. تاراز قالالىق ءىىد جول-پاترۋلدىك قىزمەتى با­تالونىنىڭ كو­مان­ديرى, پوليتسيا مايورى با­قىتجان جولداسبەكوۆتىڭ ايتۋىنا قاراعاندا, «ساياحات-99» جشس-نە تيەسىلى بۇل اۆتوبۋس جۇرگىزۋشىسىنىڭ جولداما قاعازدارى وسى باعىتقا سايكەس كەلمەگەنى بىلاي تۇرسىن, كولىكتىڭ وسى ءتۇرىن جۇرگىزۋگە ەشقانداي قۇجاتتارى بولماي شىعىپتى. ەڭ سۇمدىعى, ءوزىن وتە دورەكى ۇستاعان 20 جاستاعى جۇرگىزۋشىنى مەديتسينالىق تەكسەرۋدەن وتكىزگەندە ءدا­رىگەرلەر وعان ەسىرتكىگە ەلتى­گەن دەگەن قورىتىندى بەرگەن. سوندا بۇل مەكەمە باسشىلارى ءۇشىن اۆتوبۋس تولى جولاۋشىلاردىڭ تاعدىرى ءبىر تيىن بولعانى ما؟ ەرتەڭىندە تاعى دا 27 جاس­تاعى اۆتوبۋس جۇرگىزۋشىسى ۇستالدى. ونىڭ دا كولىك ءجۇر­گىزۋگە قۇقىق بەرەتىن ەش­قان­داي قۇجاتتارى بولماي شىقتى. جەرگىلىكتى پوليتسيا قىز­­مەتىنىڭ مالىمەتىنە قا­راعاندا, وسى «اۆتوبۋس» ءىس-شاراسى كە­زىندە 649 جول ەرەجەسىن بۇزۋ فاكتىلەرى انىق­تالىپتى. ونىڭ ىشىندە جۇرگىزۋشىنىڭ رولدە كەتىپ بارا جاتىپ ۇيالى تەلەفونمەن سويلەسۋى, جول بويىندا قاۋىپتى مانەۆر جاساۋ جانە جىلدامدىقتى ارتتىرۋى وتە كوپ كەزدەسكەن. وسى تۇستا تاعى ءبىر ايتارى, جىل باسىنان بەرى جامبىل وبلىسىندا ورىن العان جول-كولىك وقيعالارىنىڭ توعىزىندا كىنالى جاق وقيعا ورنىنان قاشىپ كەتىپتى. ورالحان ءداۋىت, «ەگەمەن قازاقستان». جامبىل وبلىسى.