«بارىڭمەن ءبولىس!» اكتسياسى كوكشە جەرىنە دە كەلدى

كوكشەتاۋ. 28 قاڭتار. «بارىڭمەن ءبولىس!» اكتسياسىن اقمولا وبلىسى ىسكەر ايەلدەر اسسوتسياتسياسى دا قولداپ اكەتتى. بۇل تۋرالى اسسوتسياتسيا ءباسپاسوز قىزمەتىنىڭ مالىمەتىنە سۇيەنگەن egemen.kz ءتىلشىسى حابارلايدى. وسىعان ارنالعان العاشقى شارا ەرەيمەنتاۋ قالاسىنداعى بالالار شىعارماشىلىق ۇيىندە ءوتتى. وندا اسسوتسياتسيا شاقىرۋىنا ءۇن قوسقان ايەلدەر جينالدى. ال اكتسيانىڭ باستى ماقساتى الەۋمەتتىك جاعىنان از قورعالعان جانە كوپ بالالى وتباسىلارىن نازارعا الىپ, ولارعا قولدان كەلگەنىنشە كومەك كورسەتۋگە ارنالدى. شارانىڭ تاعى ءبىر مۇددەسى ەرەيمەنتاۋ اۋدانىنداعى ءار قيلى جاستارداعى, الۋان ءتۇرلى باستاما مەن بەلسەندىلىكتەرگە يە ىسكەر ايەلدەردىڭ باسىن بىرىكتىرۋ بولدى. جيىندا وسى جونىندە اۋداندىق ىشكى ساياسات ءبولىمىنىڭ باسشىسى كاميلا احمەدياروۆا ايتىپ بەردى. ول ءوز سوزىندە وبلىستىق ىسكەر ايەلدەر اسسوتسياتسياسىنىڭ بۇل شارانى ەرەيمەنتاۋ اۋدانىنان باستاپ وتىرعانىندا ءمان بار ەكەنىنە دە توقتالدى. ال قالا ارداگەرلەر كەڭەسىنىڭ ءتورايىمى گالينا ارتامونوۆا قايىرىمدىلىق اكتسياسىن قولداپ, ونىڭ ىزگى قادامدارىنا تابىس تىلەدى. شاراعا قاتىسۋشى حاۆا سيگاۋري اۋداندا تالانتتى جاستار مەن ەرەسەكتەردىڭ كوپ ەكەنىن, ءوزىنىڭ سولاردىڭ باقتارى جانىپ كەتۋلەرىنە كومەكتەسەتىنىن تىلگە تيەك ەتتى. زەينەتكەر ۆالەنتينا تراپەزنيكوۆا قايىرىمدىلىق قادامدارىنىڭ قايتا ورالىپ جاتقانىنا قۋانىش ءبىلدىردى. ءوز كەزەگىندە اۋداندىق ىسكەر ايەلدەر اسسوتسياتسياسىنىڭ ءتورايىمى راۋشان نۇرعازينوۆا مۇقتاج وتباسىلارىنا كومەك قولدارىن سوزعالى وتىرعان بارشا جەرلەستەرىنە العىس سەزىمىن جەتكىزدى. باقبەرگەن امالبەك. دەرەك, فوتو: اقمولا وبلىستىق ىسكەر ايەلدەر اسسوتسياتسياسى.