پەرۋ پرەزيدەنتتىگىنەن ۇمىتكەر عىلىمي جۇمىستى ۇرلادى دەپ ايىپتالۋدا

استانا. 28 قاڭتار. پەرۋ پرەزيدەنتتىگىنە ۇمىتكەر عىلىمي زەرتتەۋ جۇمىسىن بىرەۋدىڭ شىعارماسىنان ۇرلاپ جازعانى ءۇشىن سايلاۋعا قاتىستىرىلماۋى مۇمكىن. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. پرەزيدەنتتىككە ۇمىتكەر سەسار اكۋنيا دوكتورلىق ديسسەرتاتسياسىن وزگەدەن كوشىرىپ العانى ءۇشىن سايلاۋالدى جارىسقا قاتىسپاي قالۋى ابدەن مۇمكىن. ۇلتتىق سايلاۋ سوتىنىڭ توراعاسى فرانسيسكو تاۆارانىڭ حابارلاۋىنشا, قازىرگى تاڭدا ساياساتكەردىڭ عىلىمي جۇمىسىن كومپلۋتەنسە مادريد ۋنيۆەرسيتەتىنىڭ وقىتۋشىلارى زەرتتەۋدە. سەسار اكۋنيا عىلىمي دارەجەسىن ءدال وسى وقۋ ورداسىندا 2009 جىلى العان بولاتىن. «ارنايى سايلاۋ, ۇلتتىق سايلاۋ سوتى دا ەتيكالىق ماسەلەلەردى قاراستىرىپ وتىرعان جوق. ءبىز تەك وسى نە باسقا دا ءىس-ارەكەتتەردىڭ زاڭ تالاپتارىنا سايكەستىگىن تەكسەرىپ جاتىرمىز. عىلىمي جۇمىستىڭ تۇپنۇسقالىعى تۋرالى شەشىمدى ۋنيۆەرسيتەت شىعارۋى كەرەك», – دەپ اتاپ ءوتتى فرانسيسكو تاۆارا. سوت توراعاسى سونداي-اق, زاڭ بويىنشا ۇمىتكەردىڭ ءوزى تۋرالى كورىنەۋ تەرىس مالىمەت بەرۋى ونى سايلاۋعا قاتىستىرماۋعا اكەپ سوعاتىنىن دا ايتىپ ءوتتى. ال, سەسار اكۋنيا بۇل داۋ-دامايدىڭ ارتىندا ساياسي سەبەپ تۇرعانىنا سەندىرىپ وتىر. «عىلىمي جۇمىسىما قاتىستى ايىپتان ءۇزىلدى-كەسىلدى باس تارتامىن. بۇل جاعدايدى مەنىڭ پرەزيدەنتتىككە ۇمىتكەرلىگىمنەن قۇتىلۋ ءۇشىن پايدالانعىلارى كەلەدى. ماعان قاتىستى قايتالانىپ جاتقان قارسىلىقتار ساياسي قارسىلاستارىمنىڭ مەنى جاقتاعان حالىق قولداۋىنىڭ قارقىن الۋىنان قورقا باستاعانىن كورسەتەدى», – دەپ مالىمدەدى ول. ەستەرىڭىزگە سالا كەتەيىك, پەرۋدە پرەزيدەنتتىك سايلاۋ 2016 جىلدىڭ 10 ساۋىرىندە وتەدى. قوعامدىق پىكىرگە جۇرگىزىلگەن ساۋالناما مەملەكەت باسشىلىعى لاۋازىمىنا ۇمىتكەرلەر اراسىندا «حالىق كۇشى» پارتياسىنىڭ باسشىسى كەيكو فۋحيموري كوش باستاپ تۇرعانىن كورسەتىپ وتىر. كەيكو – وسى ەلدىڭ بۇرىنعى پرەزيدەنتى البەرتو ءفۋحيموريدىڭ قىزى. ەكس-پرەزيدەنتتىڭ ءوزى قازىرگى تاڭدا بىرنەشە ايىبى بويىنشا تۇرمەدە جازاسىن ءوتىپ جاتىر. كەيكو فۋحيموريگە ساۋالناماعا جاۋاپ بەرگەندەردىڭ ۇشتەن ءبىرى داۋىس بەرۋگە دايىن. ال سەسار اكۋنيا بۇل رەيتينگتەگى ەكىنشى ورىندى ەكونوميست پەدرو كۋچينسكيمەن بولىسكەن. ەكى ۇمىتكەردى دە پەرۋلىكتەردىڭ 13 پايىزى قولداۋعا دايىن. ەگەر ءبىرىنشى اينالىمدا ۇمىتكەرلەردىڭ بىردە-ءبىرى 50 پايىز داۋىس جيناي الماسا, پەرۋدە داۋىس بەرۋدىڭ ەكىنشى كەزەڭى وتەدى. ەلامان قوڭىر. دەرەك: تاسس. سۋرەت: ukrinform.ru.