قىزىلوردا. 27 قاڭتار. قىزىلوردادا «انا مەن بالا» ورتالىعىنىڭ جانىنان وڭالتۋ ورنى اشىلدى. بۇل تۋرالى وبلىس اكىمدىگىنىڭ ءباسپاسوز قىزمەتىنە سىلتەمە جاساعان egemen.kz حابارلادى.
مۇنداي ورتالىق رەسپۋبليكادا ءبىرىنشى بولىپ قىزىلوردا وبلىسىندا ىسكە قوسىلىپ وتىر. قاجەتتى قۇرال-جابدىقتارمەن قامتىلعان 30 توسەكتىك وڭالتۋ ورتالىعىن ىسكە قوسۋ ءۇشىن وبلىستىق بيۋدجەتتەن 38 ملن. تەڭگە جۇمسالعان. دارىگەرلەر وسىنداي بولىمشەنىڭ اشىلۋى جاڭا بوسانعان انالاردىڭ دەنساۋلىعىن ۇدايى باقىلاپ, ولارعا ءتيىستى مەديتسينالىق كومەك كورسەتۋ ءۇشىن, اسىرەسە انا مەن بالا دەنساۋلىعىن جاقسارتۋدا سەپتىگى مول دەيدى. انا مەن بالا ورتالىعىنىڭ تاعى ءبىر جەتىستىگى جاقىندا مەديتسينالىق-گەنەتيكالىق بولىمشە اشىلدى. ەندى دارىگەرلەر سوڭعى ۇلگىدەگى قۇرال-جابدىقتاردىڭ كومەگى ارقىلى ەرتە مەرزىمىندە, ياعني نارەستە تۋىلماي تۇرىپ ونىڭ دەنساۋلىعىن تەكسەرە الادى. دەمەك, دەنى ساۋ ۇرپاقتى دۇنيەگە الىپ كەلۋى ءۇشىن جۇكتى ايەلدەرگە دەر كەزىندە باعىت-باعدار بەرىپ وتىرادى. مەديتسينالىق تىلمەن ايتقاندا جۇكتى ايەلدەردى گەنەتيكالىق سكرينينگتىك تەكسەرۋدەن وتكىزۋگە مۇمكىندىك الدى. بۇل ورتالىقتا يزرايل مەملەكەتىنە بارىپ, بىلىكتىلىگىن ارتتىرىپ كەلگەن ماماندار جۇمىس ىستەيدى.
جاڭا تەحنولوگيالاردىڭ ارقاسىندا دارىگەرلەردىڭ دە جۇمىسى ءبىرشاما جەڭىلدەگەن. قازىر وبلىستىق انا مەن بالا ورتالىعىندا ايماقتىڭ بارلىق ەلدىمەكەندەرىندەگى جۇكتى ايەلدەردىڭ جاعدايىنا قاتىستى مونيتورينگ جۇرگىزىپ وتىرۋعا مۇمكىندىك تۋدى. ورتالىقتاندىرىلعان بۇل جۇيە ارقىلى دەنساۋلىعىندا اقاۋى بار نەمەسە جۇكتىلىك كەزەڭى اۋىر ءوتىپ جاتقان ايەلدەر ۇنەمى مامانداردىڭ باقىلاۋىندا بولادى دەگەن ءسوز.
بۇگىن ورتالىقتىڭ جۇمىسىمەن تانىسۋ ءۇشىن ارنايى بارعان وبلىس اكىمى قىرىمبەك كوشەرباەۆ قانداي جاعداي بولماسىن انا مەن بالا دەنساۋلىعى ءۇشىن بارلىق قولداۋ كورسەتىلەتىندىگىن ايتتى.
ەرجان بايتىلەس.
دەرەك, سۋرەت: egemen.kz
