شىعىس قازاقستاندا بولعان جارىلىستىڭ سەبەبى انىقتالدى

وسكەمەن. 27 قاڭتار. شىعىس قازاقستان وبلىسى ۇلان اۋدانىندا بولعان ءىرى جارىلىستىڭ سەبەپتەرى انىقتالدى. بۇل تۋرالى شىعىس قازاقستان وبلىسىنىڭ اقپاراتتىق ورتالىعىنا سىلتەمە جاساعان egemen.kz ءتىلشىسى حابارلادى. جەرگىلىكتى حالىقتى قوبالجىتقان وقيعاعا بايلانىستى كوميسسيا قۇرىلىپ, اۋدان ورتالىعى قاسىم قايسەنوۆ كەنتىنىڭ تۇرعىندارىنا كەلتىرىلگەن شىعىن كولەمى زەرتتەلدى. ونەركاسىپتىك قاۋىپسىزدىكتى قامتاماسىز ەتۋ ەرەجەسىن بۇزعان كىنالىلەر انىقتالىپ, جاۋاپكەرشىلىككە تارتىلدى. وسىدان ءبىراز ۋاقىت بۇرىن اۋدان اكىمىنىڭ ورىنباسارى دۋلات قاجانوۆتىڭ توراعالىعىمەن قۇرىلعان ارنايى كوميسسيا قايسەنوۆ كەنتىنە جاقىن جەردە بولعان ءدۇمپۋدىڭ سەبەپتەرىن انىقتاۋعا كىرىسكەن بولاتىن. جۇرگىزىلگەن زەرتتەۋدىڭ قورتىندىلارىن كوميسسيا مۇشەلەرى وبلىستىق اقپاراتتىق ورتالىقتا رەسمي تۇردە جاريا ەتتى. ۇلان اۋدانىنىڭ پروكۋرورى باقىتجان مامبەتوۆتىڭ ايتۋىنشا, «ينتسەم» جاۋاپكەرشىلىگى شەكتەۋلى سەرىكتەستىك قاراوزەك كەنىشىندە جەر بەتىندەگى جارىلىس جۇمىستارىن جۇرگىزگەن. قاۋىپتى ءوندىرىس نىساندارىنا ارنالعان ونەركاسىپتىك قاۋىپسىزدىكتى قامتاماسىز ەتۋ ەرەجەلەرى باسشىلىققا الىنباعان. سونداي-اق, مەردىگەر ۇيىم جاقىن ماڭداعى ەلدى-مەكەندەردىڭ تۇرعىندارىن ساقتاندىرماعان, اۋا-رايىن ەسەپكە الماعان جانە جارىلىس جۇمىستارىن جۇرگىزۋگە قاتىستى رۇقسات الۋ ەرەجەسىن بۇزعان. جۇرگىزىلگەن جۇمىستاردىڭ ناتيجەسىندە, تاپسىرىس بەرۋشى «ينتسەم» جاۋاپكەرشىلىگى شەكتەۋلى سەرىكتەستىك پەن «ۆوستوك-ۋنيۆەرسال» جاۋاپكەرشىلىگى شەكتەۋلى سەرىكتەستىك اكىمشىلىك جازاعا تارتىلدى. تۇرعىندارعا كەلگەن شىعىندى تولىعىمەن وتەيدى. دۋمان اناش. دەرەك, سۋرەت: شىعىس قازاقستان وبلىسىنىڭ اقپاراتتىق ورتالىعى.