زارداپ شەككەندەر ۇشەۋ مە, الدە بىرەۋ مە؟

جامبىل وبلىسىنداعى ت.رىسقۇلوۆ اۋدانى ورتالى­عىنان 100 شاقىرىم قاشىق­تىقتا مي-2 تىكۇشاعى اپات­قا ۇشىراعانىن اقپارات قۇ­رال­دارى جارىسا جازۋدا. اپات سالدارىنان 1 ادام زار­­داپ شەكتى. بۇل تۋرالى قر ءىىم توتەنشە جاعدايلار ءجو­نىندەگى كوميتەتىنىڭ ارنايى وكىلى رۋسلان يمانقۇلوۆ حابارلاعان بولاتىن. «وقيعا تۇرار رىسقۇلوۆ اۋدانىنداعى سادىحان قىستاۋىنان ءۇش شا­قىرىم قاشىقتىقتا بولعان. توتەنشە وقيعا جايلى حابار 112 تەلەفونىنا 23 قاڭتاردا كەشكى ۋاقىتتا كەلىپ تۇسكەن», دەپ حابارلادى ر. يمانقۇلوۆ. وسىدان كەيىن تىكۇشاقتىڭ قۇلاۋ فاكتىسى بويىنشا ارنايى كوميسسيا قۇرىلدى. ارتىنشا زارداپ شەككەن ۇشقىشتىڭ ەسىمى دە بەلگىلى بولدى. ول تىك­ۇشاق تيەسىلى «تاراز جاڭا الەم» كومپانياسىنىڭ ديرەكتورى ۆالەري ميحين ەكەن. جانساقتاۋ بولىمىندە جاتقان 62 جاستاعى ۆالەري ءميحيننىڭ بەتى, باسى, اياق-قولدارى ءى-ءىى-ءىىى دارەجەدە كۇيىپ قالعان. سونىمەن قاتار, ونىڭ تىنىس الۋ جولدارىن ءىى ءدا­رەجەدەگى كۇيىك شالعان. «ناۋقاستىڭ ايتۋىن­شا تىك­ۇشاقتىڭ اۋەدە قوزعالت­قىشى ورتەنگەن. جەرگە قون­عان­نان كەيىن ول تىكۇشاقتى ءوزى سوندىرمەك بولىپتى. ودان كەيىن شامامەن 5 شاقىرىم جاياۋ جۇرگەن. سول ماڭداعى قوي­­شىلاردىڭ كومەگىمەن ول تاراز قالاسىنداعى اۋرۋ­حاناعا جەتكىزىلگەن. جالپى جا­عدايى اۋىر. اقىل-ەسىن بىلەدى», دەيدى بۇل جونىندە جامبىل وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ وكىلدەرى. ارينە, مۇنداي كەزدە «تە­مىرى قۇرىسىن, تىكۇشاق تابىلار, ەڭ باستىسى ادام امان بولسىن» دەپ, الدىمەن ارىستاي ازاماتتىڭ ساۋلىعىن تىلەيتىنىڭ انىق. ايتسە دە اپاتقا ۇشى­راعان بۇل تىكۇشاق تۋرالى ءارتۇرلى اڭگىمە وربۋدە. اۋەدە شىر اينالىپ بارىپ جەرگە قۇلاپ, ارتىنشا جارىلعان تىكۇشاقتى كورگەن سول ماڭداعى قويشىلار ۇشقىشتىڭ قاسىندا تاعى ەكى ادام بولعانىن ايتادى. ال, اۋرۋحاناعا ءبىر-اق ادام تۇسكەن. سوندا تىكۇشاقتا بولعان تاعى ەكى ادام قايدا؟ ولار تۋرالى نەگە ايتىلمايدى؟ تۇسىنىكسىز. قالاي ايتساق تا بۇل جۇمباقتىڭ شەشۋىن ارنايى قۇرىلعان كوميسسيا انىقتايدى دەگەن ءۇمىت بار. ورالحان ءداۋىت, «ەگەمەن قازاقستان». جامبىل وبلىسى.