«قازاقستان ارداگەرلەرىنىڭ كەڭەسى» رەسپۋبليكالىق قوعامدىق بىرلەستىگىنىڭ ەلباسىنىڭ «بەسىنشى شاقىرىلعان
قازاقستان رەسپۋبليكاسى پارلامەنتىنىڭ ءماجىلىسىن
تاراتۋ جانە قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىن تاعايىنداۋ تۋرالى» جارلىعىنا قاتىستى
مالىمدەمەسى
«قازاقستان ارداگەرلەرىنىڭ كەڭەسى» قازاقستان پرەزيدەنتىنىڭ پارلامەنت ءماجىلىسى دەپۋتاتتارىنىڭ كەزەكتەن تىس سايلاۋىن تاعايىنداۋ تۋرالى جارلىعىن ءوزىنىڭ قولدايتىنىن مالىمدەيدى. مەملەكەت باسشىسىنىڭ جەتى رەت ولشەپ, ءبىر رەت كەسكەن ساليقالى شەشىمى قازاقستاندىقتاردى جۇدىرىقتاي جۇمىلدىرۋعا جانە ەلىمىز ءۇشىن وسىنداي جاۋاپتى كەزەڭدە ورتاق ساياسي ەرىك-جىگەر تانىتۋعا باعىتتالىپ وتىر. جاھاندىق قارجى داعدارىسى قوس وكپەدەن قىسىپ, كەيبىر ىقپالدى مەملەكەتتەر ءبىر-بىرىنە قارسى سانكتسيالار قابىلداپ جاتقان كەزدە حالىقارالىق احۋالدىڭ ۋشىعىپ تۇرعانى جاسىرىن ەمەس. وسىنداي شاقتا ەل ەكونوميكاسىن داعدارىستان قورعاۋ ءۇشىن وڭتايلى شەشىمدەر ىزدەستىرۋ كونسەنسۋستى نىعايتىپ, قوعامدىق كەلىسىمدى قالىپتاستىرۋدا ماڭىزدى قادام بولىپ تابىلادى. ءبىزدىڭ ۇيىمىمىزعا وسى جالپىادامزاتتىق قۇندىلىقتار ەرەكشە قىمبات جانە جاقىن. قازاقستاننىڭ ارداگەرلەرى, ازاماتتىق قوعامنىڭ اسا بەلسەندى بولىكتەرىنىڭ ءبىرى رەتىندە, قازاقستاننىڭ بولاشاق ۇرپاعىنىڭ تاعدىرىنا بەيجاي قارامايتىن ادامدار رەتىندە پارلامەنت ءماجىلىسى دەپۋتاتتارىنىڭ سايلاۋىن ءدال وسى كەزدە وتكىزۋ «نۇرلى جول», «100 ناقتى قادام» ۇلت جوسپارى, پرەزيدەنتتىڭ قازاقستان حالقىنا جولداۋى سەكىلدى اسا ماڭىزدى مەملەكەتتىك باعدارلامالار مەن جوبالاردى ۋاقتىلى جانە ءتيىمدى ورىنداۋدى قامتاماسىز ەتۋگە قابىلەتتى ەكەنىنە سەنىمدى. قازاقستان ارداگەرلەرىنىڭ كەڭەسى قازاقستان حالقىن مەملەكەت باسشىسىنىڭ ەلدى ۇلكەن تابىستارعا باستايتىن مىندەتتەرىن ورىنداۋ توڭىرەگىندە كۇش بىرىكتىرۋگە شاقىرادى.
