پورتۋگاليادا «رەكوردتىق» پرەزيدەنت سايلاۋى اياقتالدى. داۋىس بەرۋ قورىتىندىسى بويىنشا ءبىرىنشى تۋردا سوتسيال-دەموكراتيالىق پارتيادان كانديدات مارسەلو رەبەلو دي سوزا جەڭىسكە جەتتى, دەپ حابارلادى رەيتەر اگەنتتىگى.
بيۋللەتەندەردىڭ 98 پايىزىن وڭدەگەننەن كەيىنگى ەسەپ بويىنشا رەبەلو دي سوزا سايلاۋشىلاردىڭ 52,72% داۋىسىنا يە بولىپ, وزگە كانديداتتاردان ايتارلىقتاي وزىپ كەتكەن. وسى ورايدا پرەزيدەنت سايلاۋىنا كەلۋشىلەردىڭ مەيلىنشە تومەن بولعانىن, نەبارى 48,4 پايىزدى قۇراعانىن دا ايتا كەتۋ قاجەت. 67 جاسار دي سوزانى ءوزى 1990 جىلدارى باسقارعان سوتسيال-دەموكراتيالىق پارتيانىڭ وڭشىل-تسەنتريستەرى قولداعان كورىنەدى. جاڭا مەملەكەت باسشىسى ءوز لاۋازىمىنا ۇستىمىزدەگى جىلعى ناۋرىزدىڭ سوڭىندا كىرىسەتىن بولادى.
اۆستراليا رەسپۋبليكاعا اينالا ما؟
اۆستراليانىڭ ءبىر شتاتىنان وزگە بارلىق شتاتتارى مەن اۋماقتارىنىڭ ليدەرلەرى ەلدى پارلامەنتتىك مونارحيادان رەسپۋبليكاعا اۋىستىرۋعا قولداۋ كورسەتكەن دەكلاراتسياعا قول قويدى, دەپ حابارلايدى ۆۆس-ءدىڭ ورىس قىزمەتى.
قۇجاتقا تەك اۆستراليانىڭ رەسپۋبليكا بولاتىن ۋاقىتى ءالى كەلگەن جوق دەپ ەسەپتەيتىن باتىس اۆستراليا شتاتىنىڭ پرەمەرى كولين بارنەتت قانا قول قويماعان كورىنەدى. پەتيتسيانى اۆستراليا رەسپۋبليكالىق قوزعالىسى ۇيىمداستىرعان. ولاردىڭ ماقساتى ەل كونستيتۋتسياسىنا وزگەرىستەر ەنگىزە وتىرىپ, سول ارقىلى بريتان پاتشايىمى ءىى ەليزاۆەتانىڭ مەملەكەت باسشىسى بولىپ ەسەپتەلۋىنە توسقاۋىل قويۋ. سونىمەن بىرگە, اۆستراليانىڭ مونارحيالىق مارتەبەسىن ساقتاۋدى جاقتاۋشىلار ازىرگە بۇگىندە جۇمىس ىستەپ تۇرعان مودەلدى الماستىراتىنداي ايقىن مەملەكەتتىك مودەل جوق دەگەن پىكىر ايتۋدا.
قارلى بوراننىڭ زارداپتارى اۋىر
اقش-تىڭ شىعىس اۋداندارىندا قارلى بوران سالدارىنان قازا تاپقان تۇرعىندار سانى 28 ادامعا جەتكەن. امەريكالىقتاردىڭ قازا تابۋىنا جول-كولىك وقيعاسىنان العان جاراقاتتار, ۋگارلى گازبەن ۋلانۋ جانە قار كۇرەۋ بارىسىنداعى شەكتەن تىس تۇسكەن سالماقتان جۇرەك ۇستاماسى سەبەپكەر بولعان كورىنەدى.
بەلگىلى بولىپ وتىرعانىنداي, ادامدار اقش-تىڭ 10 شتاتىندا جانە ەل استاناسىندا قازا تاپقان. اقش-تىڭ فەدەرالدىق ۇكىمەتىنىڭ ۆاشينگتوندا ورنالاسقان مينيسترلىكتەرى مەن ۆەدومستۆولارى قارلى بوران سالدارىنا بايلانىستى دۇيسەنبى كۇنى جۇمىس ىستەمەيتىن بولادى. سونىمەن بىرگە, دۇيسەنبى كۇنى قوعامدىق كولىكتىڭ ءىشىنارا ءوز جۇمىسىن قالپىنا كەلتىرە باستاعانى دا بەلگىلى بولىپ وتىر. ايتا كەتۋ كەرەك, شىعىستاعى 11 شتاتتا توتەنشە جاعداي جاريالانىپ, 200 مىڭداي ءۇي ەلەكتر جارىعىنسىز قالعان بولاتىن.
تەررورمەن دەربەس كۇرەسپەك
يراكتىڭ سىرتقى ىستەر ءمينيسترى يبراگيم ءال-دجاافاري باعداتتىڭ ەلدە شەتەلدىك اسكەردىڭ بولۋىنا قارسى ەكەنىن جانە تەرروريزمگە قارسى وزدەرىنىڭ دەربەس كۇرەسپەك نيەتتەرى بار ەكەنىن مالىمدەدى.
يراك ەگەمەن مەملەكەت بولىپ تابىلادى, سوندىقتان ونىڭ ەگەمەندىگىنە ەشكىمنىڭ قول سۇعۋىنا جول بەرمەيدى, دەپ اتاپ كورسەتكەن مينيستر باحرەيندە وتكەن اراب-ءۇندى فورۋمىندا. سونىمەن بىرگە, مينيستر شەتەلدىك اسكەريلەردىڭ بولۋىنا تىيىم سالۋدىڭ اسكەري كەڭەسشىلەرگە ەش قاتىسى جوق ەكەنىن دە ەسكەرتكەن. وسى ورايدا پەنتاگون باسشىسى ەشتون كارتەردىڭ وسىدان ءسال بۇرىنىراق سيريانىڭ راككا جانە يراكتىڭ موسۋل قالالارىن «يسلام مەملەكەتى» تەررورشىلارىنان بوساتۋ وپەراتسياسى قۇرلىق اسكەرلەرىنىڭ قاتىسۋىمەن جۇزەگە اسۋى ءتيىس دەگەن ءسوزىن دە ەسكە سالا كەتكەن ءجون.
جارنا تولەمەگەندەر جازالاندى
بىرىككەن ۇلتتار ۇيىمى وسى ۇيىمعا مۇشە 15 ەلدى داۋىس بەرۋ قۇقىنان ايىردى. وعان اتالمىش مەملەكەتتەردىڭ مۇشەلىك جارنا بويىنشا بارىنشا كوپ بەرەشەك بولۋى سەبەپكەر بولىپ وتىر. ەڭ ۇلكەن بورىش ۆەنەسۋەلاعا تيەسىلى ەكەن.
دومينيكان رەسپۋبليكاسى – 2,1 ميلليون دوللار, سەنت-ۆينسەنت جانە گرەنادينا – 2,15 ميلليون دوللار, بۋرۋنديا 1,36 ميلليون دوللار بەرەشەك. وسىلاردىڭ ىشىندەگى ەڭ بەرەشەگى كوبى ۆەنەسۋەلا بولىپ وتىر. بۇل ەل ۇزاق ۋاقىتتار بويى مۇشەلىك جارنا ەنگىزبەۋدىڭ سالدارىنان 3 ميلليونعا جۋىق بورىشقا باتقان. سونىمەن بىرگە, بۇۇ ەكونوميكالىق احۋالدارى اۋىر ەلدەرگە اياۋشىلىق تا بىلدىرگەن. سوندىقتان دا يەمەن, سومالي, گۆينەيا-بيساۋ, كومور ارالدارى سياقتى بىرقاتار ەلدەرگە ەشقانداي شەكتەۋ ەنگىزبەگەن.
ەلدى مەكەندەر قايتارىلۋدا
باشار اسادتىڭ ارمياسى ار-روۋدا ستراتەگيالىق پۋنكتىن سودىرلاردان تارتىپ الىپ, سول ارقىلى تۇركيا شەكاراسىنا تىكەلەي شىعاتىن جولدى بوساتتى, دەپ حابارلادى «ينتەرفاكس» اگەنتتىگى.
سيريا ارمياسى ەلدىڭ سولتۇستىگىندەگى لاتاكيا پروۆينتسياسىندا ورنالاسقان ار-رابيا قالاسىن ءوز باقىلاۋىنا العان. تابىستى شابۋىل وپەراتسيالارى ناتيجەسىندە كوپتەگەن تەررورشىلار مەن ولاردىڭ قارۋ-جاراقتارى جويىلعان. بۇعان دەيىن حابارلانعانداي, قاڭتار ايىنىڭ باسىندا سيريا ارمياسى 2012 جىلدان بەرى تەررورشىلار باقىلاۋىندا بولىپ كەلگەن ستراتەگيالىق ماڭىزدى سانالاتىن سالما ەلدى مەكەنىن قايتارىپ العان بولاتىن. سيريا اسكەرىنىڭ ەلدى مەكەندەردى ازات ەتۋى تابىستى جالعاسۋدا.
شىعىس ازيا – سۋىق اۋا قۇرساۋىندا
شىعىس ازياعا كەلگەن كۇتپەگەن ايازدار تايۆاندا 50-دەن استام ادامنىڭ قازا تابۋىنا سوقتىرىپ, وڭتۇستىك كورەيادا 60 مىڭداي ءتۋريستى شاراسىز كۇيگە تۇسىرگەن. بۇل تۋرالى ۆۆس اگەنتتىگى حابارلاپ وتىر.
ادامدار ولىمىنە كۇننىڭ كۇرت سۋى جانە سوعان بايلانىستى تۋىنداعان جۇرەك تالماسى پروبلەمالارى سەبەپكەر بولۋدا. ونىڭ سىرتىندا قاتتى جاۋعان قار كورەيانىڭ تۋريستەر ءۇشىن كەڭ تانىمال بولىپ تابىلاتىن چەدجۋ ارالىنداعى اۋەجايدىڭ جابىلۋىنا اپارىپ سوقتىرىپ, سونىڭ سالدارىنان 500-دەن استام اۋە رەيستەرى كەيىنگە قالدىرىلعان. ءوزىنىڭ قولايلى اۋا رايىمەن جانە جاعالاۋلارىمەن اتى ءمالىم ارالدا اۋا تەمپەراتۋراسى مينۋس 6 گرادۋسقا دەيىن تومەندەپ كەتكەن. بۇل سياقتى كۇتپەگەن سۋىقتار گونكونگقا, قىتايدىڭ وڭتۇستىگى مەن جاپونياعا دا ءوز ىقپال تيگىزۋدە.
جەرورتا تەڭىزىندە جەر سىلكىندى
جەرورتا تەڭىزىندە ورىن العان ەكى بىردەي جەر سىلكىنىسىنىڭ تىركەلگەنى ءمالىم بولىپ وتىر.
العاشقى 6,2 بالدىق قۋاتتى ءزىلزالا ماروككونىڭ سولتۇستىگىندە بولعان. ارادا شامامەن 10 مينۋتتاي وتكەندە جەر سىلكىنىسى تەڭىزدىڭ ەكىنشى شەتىندە قايتالانعان. بۇل رەتتە يسپانيانىڭ وڭتۇستىگى زارداپ شەككەن كورىنەدى. 5,3 بالدى قۇراعان ءزىلزالانىڭ ەپيتسەنترى پورتتى قالا مەليليادا بولعان. ازىرگە زارداپ شەككەندەر تۋرالى اقپارات جوق.
ينتەرنەت ماتەريالدارى نەگىزىندە ازىرلەندى.
