«دوستاستىق» كۋبوگى مارەگە جەتتى

قاڭتاردىڭ 23-ءى كۇنى سانكت-پەتەر­بۋرگ قالاسىندا فۋتبولدان جاس­تار اراسىنداعى (U-21) حالىقارالىق «دوستاستىق» كۋبوگىنىڭ XXIV ءتۋرنيرى مارەسىنە جەتتى. ونىڭ جەڭىمپازى اتاعىنا رەسەي قۇراماسى كەزەكتى مارتە قول جەتكىزدى. الاڭ يەلەرى فينالدا مولدوۆا قۇراماسىن 4:2 ەسەبىمەن ۇتتى. تۋرنيرگە نەبارى 8 قۇراما قاتىستى. وسىنىڭ ءوزى بۇل جارىستىڭ بەرەكەسى كەتە باستاعانىن بايقاتتى. سودان بولار, سايىس اياقتالعاننان كەيىن رەسەي سپورت ءمينيسترى ءارى فۋتبول فەدەراتسياسىنىڭ پرەزيدەنتى ۆيتالي مۋتكو الداعى جىلى كۋبوكتىڭ نە ءپىشىمىن وزگەرتۋ, نە ءبىرجولا توقتاتۋ كەرەك ەكەنىن اشىق ايتتى. جارىستىڭ وزىنە كەلسەك, كوماندالار ىرىكتەۋ ويىندارىن ەكى توپقا ءبولىنىپ وتكىزدى. ونىڭ بىرىنەن – رەسەي, ەكىنشىسىنەن مولدوۆا قۇرامالارى توپ باس­تاپ شىعىپ, فينالدا كەزدەستى. ا توبىنا تۇسكەن قازاقستان قۇراماسى ەكى ماتچىن تەڭ وتكىزىپ, ءبىر ويىندا ۇتىلدى. اتاپ ايتقاندا, ءبىزدىڭ جاستار ءبىرىنشى كەزدەسۋدە مولدوۆاندارعا ەسە جىبەرىپ (0:1), بەلورۋستارمەن (0:0) جانە قىرعىزدارمەن (2:2) بەيبىت تارقاستى. ناتيجەسىندە توپتىڭ سوڭىندا قالىپ قويدى. سوندىقتان كەلەسى توپتى تياناقتاعان تاجىكستان قۇراماسىمەن 7-8 ورىندار ءۇشىن تالاستى. ول 3:2 ەسەبىمەن قازاقستاندىقتاردىڭ پايداسىنا شەشىلدى. ماتچ بىردەن ءبىزدىڭ باعلانداردىڭ شابۋىلىمەن باستالدى. ولار العاشقى گولدى دا تىم ەرتە سالدى – 2-مينۋتتا ءانۋار اعايسيننىڭ اياعىنان ۇشقان دوپ توردان ءبىر-اق شىقتى. ال 14-مينۋتتا ابات ايىمبەتوۆ ەكىنشى گولدى ءتۇسىردى. سودان سوڭ نوزيم بابودجونوۆ (17) ءبىر گولدىڭ قارىمتاسىن قايتاردى. قالعان ەكى گول كەزدەسۋ سوڭىندا سالىندى. مۇنىڭ العاشقىسىن 83-مينۋتتا ايىمبەتوۆ تۇسىرسە, كەلەسىسىنە 85-مينۋتتا جاحونگير ەرگاشوۆ قول جەتكىزدى. وعان دەيىن, 76-مينۋتتا الاڭدا توبەلەس باستاپ كەتكەن قازاقستاندىق يۆان انتيپوۆ پەن تاجىكستاندىق تابرەزي داۆلاتمير الاڭنان قۋىلدى. ولاردىڭ ۇستاسۋلارى ەكى جاقتان دا قولداۋ الىپ, جاپپاي توبەلەسكە ۇلاسىپ كەتە جازدادى. ءۇشىنشى ورىن ءۇشىن تالاس قىرعىزستان جانە ەستونيا كوماندالارى اراسىندا ءوتتى. كەزدەسۋدىڭ نەگىزگى ۋاقىتىندا ەسەپ اشىلمادى. سودان كەيىن قارسىلاستار پەنالتيگە جۇگىندى. وندا ەستوندار مەرگەندىك پەن سالقىنقاندىلىق تانىتتى. ەسەپ – 4:1. 5-ورىن ءۇشىن بەلارۋس پەن لاتۆيا اراسىنداعى ۇشىراسۋدا دا فۋتبولشىلار قاقپا قۇلپىن اشا الماي, ويىننان كەيىنگى پەنالتيگە سالماق سالدى. ول 5:4 ەسەبىمەن بۇلاردىڭ الدىڭعىلارىنا جەڭىس اكەلدى. «دوستاستىق» كۋبوگى ءوز باستاۋىن 1993 جىلدىڭ قاڭتارىنان الادى. تۋرنير تمد جانە بالتىق ەلدەرى چەمپيوندارىنىڭ كۋبوگى رەتىندە ومىرگە كەلدى. وسىلايشا 1993-2011 جىلدار ارالىعىندا كلۋبتىق كوماندالاردىڭ قاتىسۋلارىمەن وتكىزىلدى. وسى جىلداردا «سپارتاك» (ماسكەۋ, رەسەي) – 6 رەت (1993, 1994, 1995, 1999, 2001, 2001), «دينامو» (كيەۆ, ۋكراينا) – 4 رەت (1996, 1997, 1998, 2002), «شەريف» (تيراسپول, مولدوۆا) 2 رەت (2003, 2009) كۋبوكتى جەڭىپ الدى. تاعى 7 كوماندا تۋرنيردە ءبىر رەتتەن جەڭىسكە جەتتى. وسى قاتارداعى «دينامو» (تبيليسي, گرۋزيا) – 2004, «لوكوموتيۆ» (ماسكەۋ, رەسەي) – 2005, «نەفتچي» (باكۋ, ازەربايجان) – 2006, «پاحتاكور» (تاشكەنت, وزبەكستان) – 2007, «حازار-لەنكوران» (لەنكوران, ازەربايجان) – 2008, «رۋبين» (قازان, رەسەي) – 2010 جانە «ينتەر» (باكۋ, ازەربايجان) 2011 جىلدارى جەڭىمپاز اتاندى. قازاقستان كوماندالارى ىشىنەن ەڭ جوعارى تابىسقا جەتكەن «اقتوبە» 2009 جانە 2010 جىلدارى فينالدا «شەريف» پەن «رۋبينگە» پەنالتيدە ەسە جىبەرىپ الدى. تۋرنير 2012 جىلدان باستاپ جاستارى 21-گە دەيىنگى جاستار قۇرامالارىنىڭ تۋرنيرىنە اينالدى. وعان ەندى قاتىسۋعا تىلەك بىلدىرگەن تەرمە جاماعاتتاردىڭ بارىنە رۇقسات بەرىلدى. سودان بەرى رەسەي (2012, 2013, 2016) قۇراماسى 3 رەت, ۋكراينا (2014) مەن وار (2015) ءبىر رەتتەن جەڭىمپازدار تۇعىرىنا كوتەرىلدى.