كىشكەنتاي اسەمنىڭ ءۇمىت ءجىبى

جۇمىستا جازۋىمدى جازىپ وتىر ەدىم, جىلت ەتىپ, حات كەل­دى دەگەن حابارلاما ءتۇستى. حات الەۋ­مەتتىك جەلىدەگى دوستارىمنىڭ ءبىرى– داۋلەت احمەتجانوۆ دەگەن ازاماتتان ەكەن. دوستىعىن قا­بىلداعاننان وزگە قادام جاسال­ماعان مۇلدە بەيتانىس جان. «مەنىڭ ورتانشى قىزىم وتە قاتتى ناۋقاس. ءبىز كورەي ەلىندەگى ەمىمىزدى ءارى قاراي جالعاستىرا المايمىز. وتىنەم كومەكتەسىڭىزشى! بۇل نە قىلعان ۇياتسىز ادام دەپ سوگە كورمەڭىز, بۇل ءۇمىتى ۇزىلەردەي بولىپ, سوڭعى دارمەنمەن قارمانعان اكەنىڭ قيمىلى. بارلىق اقپارات مەنىڭ پاراقشامادا» دەگەن حات ەكەن. انشەيىندە الەۋمەتتىك جەلى­لەردە مۇنداي كومەك سۇراۋ­شى­لاردىڭ قاتارى وتە مول, الايدا ءدال وسىلاي تانىمايتىن ادامعا جەكە حات جازۋ بولا بەرمەيدى. سولاردىڭ ءوزىن وقىپ وتىرىپ جۇرەگىڭ اۋىرىپ, قولىڭنان كەلەرىڭ جوق قينالىپ جۇرگەندە مىنا حات مەنىڭ بار ىشكى الەمىمدى قوزعاپ جىبەردى. وتكەندە ورتا­لىق كوممۋنيكاتسيالار ورتالىعىندا بالا قۇقىعىنا قاتىستى وتكەن بريفينگتە ءبىر ۇسىنىس ايتقان ەدىك. الەۋمەتتىك جەلى ارقىلى جانايقايلارىن سىرتقا شىعارىپ, اۋرۋ بالاما كومەكتەس دەيتىن جانداردىڭ قاتارى كوپ, سولارعا مونيتورينگ جۇرگىزىلىپ, ناقتى كومەك كورسەتۋدىڭ شارالارىن قا­راستىرۋدىڭ جولدارىن ىزدەس­تىرسەڭىزدەر, ايتپەسە ايلىعى شاي­لىعىنا جەتپەي جۇرگەن قارا­­پايىم ادامدار قينالادى. قوعام­­دا ۇكىمەت كومەكتەسپەيدى دە­گەن, بيلىككە تەرىس پيعىل قالىپ­تا­سادى. قازىر بىزدە نەبىر قۇ­رىل­­عىلارمەن, ماماندارمەن جەتىل­­دىرىلگەن كلينيكالار بار, سولار­دىڭ مۇمكىندىكتەرىن پايدالانىپ, ءحالى مۇشكىل جان­دارعا الدىڭعى كەزەكتە كومەك كورسەتىلسە, دەگەن­بىز. سول جولى بريفينگ سوڭى­نان ۇسىنىسىڭىزعا راحمەت, دەپ ەسىمحاتىن بەرگەن لاۋا­زىم يەسى ەسىمە ءتۇسىپ, داۋلەت احمەت­جانوۆتىڭ پاراقشاسىنا كىردىم. وزىنە حات جازدىم. داۋلەتتەن تومەندەگىدەي جاۋاپ كەلدى. «بالاما ەلىمىزدە دۇرىس دياگنوز قويىلماي, سيمتومدىق ەمدى ۇيگە جالعاستىرۋعا كەڭەس بەرىپ كەرى قايتارعان سوڭ, ءماس­كەۋدە, ۇرىمجىدە بولدىق. ولار دا كومەكتەسە المايمىز دەدى. ال كورەيادا پروفەسسور يۋ ەمدەپ جازۋ­عا بولادى دەپ وتىر. بىزدەگى انا مەن بالا ورتالىعىنىڭ ءدارى­گەرلەرى مۇڭىمىزعا سەلقوس قارا­دى. ەلەكتروندى ادرەسىڭىزدى بەر­سەڭىز ورتالىقپەن جازىسقان حات­تار مەن قۇجاتتارىمىزدى جىبە­رەيىن», دەدى. ادام ەمەس, قۇجات سويلەيتىن, قۇجاتقا سەنەتىن ۋاقىتتا ەمدەۋ مەكەمەلەرى مەن كىشكەنتاي اسەمنىڭ اكەسى اراسىنداعى حاتتار ءبىراز جايدى اڭعارتقانداي. العاشىندا نەفروبلاستوما دياگنوزىمەن انا مەن بالا ۇلتتىق عىلىمي-زەرتتەۋ ورتالىعىندا ەمدەلگەن 5 جاستاعى اسەم احمەت­جانوۆاعا وسى جەردە حيميالىق ەم­نىڭ 3 ساتىسىن الىپ, سودان كەيىن قاتەرلى ىسىكتى سىلىپ الۋ­عا وتا جاسالىنادى. وتا جاسال­عاندا الىنعان ىسىكتىڭ بولشەگى گيستولوگيالىق زەرتتەۋدەن وتكەن­­دە, اسەمگە باسقا دياگنوز قويى­لادى. وتكەن جىلعى قارا­شا ايىنىڭ 27-ءسى كۇنى اۋرۋحانادان شىققان اسەمدى اتا-اناسى قى­تايعا اپارىپ ەمدەتپەك بول­عاندا ونداعى دارىگەرلەر باس تار­تىپ, جەلتوقساننىڭ 11 كۇنى انا مەن بالا ۇلتتىق عىلىمي-زەرت­تەۋ ينستيتۋتىنا قابىلداۋعا ءوتى­نىش جاسالعاندا, اتالعان دياگ­نوز بويىنشا ەمنىڭ ءتۇرى – وتا بولىپ سانالادى, ال ءسىزدىڭ بالا­ڭىزعا وتا جاسالىنعان, ال قازاق­ستاندا تاجىريبەلىك ەكسپەريمەنت تۇرعىسىندا ەم جۇرگىزۋگە تىيىم سالىنعان, ءارى شەتەلدەر­دە حيميالىق-ساۋلەلىك ەم قابىل­داۋدىڭ وڭ ناتيجەلەرى جوق, دەگەن مازمۇندا جاۋاپ الىنادى. دارمەنسىز اتا-انا 5 جاسار بال­عىننىڭ كوز الدارىندا سەمگەنىن قالاماي الەمنىڭ وزىق كلينيكالارىنا سۇراۋ سالعاندا سەۋلدەگى سەۆەرانس كلينيكاسىنان پروفەسسور يۋ ءۇمىت ءجىبىن قولدارىنا ۇستاتادى. داۋلەت احمەتجانوۆ فەيس­بۋك­تەگى پاراقشاسىندا بىلاي دەپ جا­زادى. «بارىڭىزگە قايىرلى كۇن تىلەي­مىن! سوڭعى جاڭالىقتى 17 قاڭ­تاردا جازعان بولاتىنمىن. وسى كۇندەر ىشىندە پروفەسسور يۋ باستاعان كورەي دارىگەرلەرى سوڭعى دياگنوزدى قويدى – نەفروبلاستوما!!! 18 قاڭتاردان 5 كۇنگە سو­زىلاتىن حيميالىق ەم باستالادى. ەمنىڭ العاشقى كۇندەرىن اسەم بەلگىلى دارەجەدە جاقسى قابىلداۋدا. وتە كوپ زەرتتەۋلەر, اناليزدەر تاپسىرىپ جاتىر. ءبىز مۇندا قىزىمىزدىڭ دەرتىنە داۋا تابىلاتىنىنا ۇلكەن سەنىم ارتامىز. دارىگەرلەر وتە بىلىكتى, مەيىربيكەلەر بار زەيىنىمەن قارايدى. الايدا, كلينيكانىڭ ەڭ ءبىر جامان جەرى – باعاسىنىڭ قىمباتتىعى. وسىن­دا وتكەن 15 كۇننىڭ ىشىندە ءبىز 22 مىڭ دوللار جۇمسادىق. قار­جىلىق جاعدايىمىز اسا قيىن. كو­مەك كورسەتە الاتىن مەيىرىمدى جان­دار­دىڭ قولداۋىنا ءزارۋمىز. اۋرۋحانا اسەمنىڭ ەمىنە قاتىستى جالپى ەسەپتى بۇگىن-ەرتەڭ بەرەدى. وسى رەتتە مىناداي ساۋال تۋىندايدى. نەگە ءبىزدىڭ مەملەكەت يۋ ءتارىزدى جوعارى بىلىكتى دارىگەرلەردى دۇرىس جالاقى تولەپ جۇمىسقا شاقىرمايدى. ماسەلەن, سەۆەرانس كلينيكاسىندا بار-جوعى 4 پروفەسسور, ال ولارعا دۇنيەجۇزىنىڭ بارلىق ايماعىنان ىزدەپ كەلىپ ەمدەلەدى. ەگەر ەلىمىزدە وسىنداي دارەجەدەگى دارىگەرلەر بولسا, اتا-انالار بالالارىنىڭ ءومىرى ءۇشىن شەكارا اسپاس ەدى. شىركىن, بالاپانىم ءوز ەلىمىزدە ەمدەلسە» دەيدى. داۋلەتتىڭ ارمانىنىڭ ارتىندا قانشاما وي جاتىر... كىشكەنتاي اسەمگە ەمىڭ شيپالى بولسىن دەي وتىرىپ, وسى جولداردى جازدىم. بالكىم, ءسىز اسەمنىڭ قينالعان اتا-اناسىنا قولۇشىن بەرەرسىز. نەمەسە وسى جولداردى وقىپ, بىلىكتىلىگى اسا جوعارى دەڭگەيدەگى يۋ پروفەسسور ءتارىزدى دارىگەرلەردىڭ ەلىمىزگە كەلۋىنە ىقپال ەتەرسىز. ءسويتىپ, قينالعان جاندارعا مەدەت بولىپ, اۋرۋىنا ەم تابىلۋمەن قوسا, قيىن زاماندا ەلدىڭ اقشاسىنىڭ شەتەل اسپاي ەلدە قالۋىنا سەپتىگىڭىز تيەر. انار تولەۋحانقىزى, «ەگەمەن قازاقستان».