اقتوبە. 21 قاڭتار. اقتوبە وبلىسىنىڭ اكىمى بەردىبەك ساپارباەۆ مارات وسپانوۆ اتىنداعى باتىس قازاقستان مەديتسينالىق ۋنيۆەرسيتەتىنىڭ پروفەسسور-وقىتۋشى قۇرامىمەن, عىلىمي قىزمەتكەرلەرىمەن, ستۋدەنتتەرىمەن, مەديتسينالىق مەكەمەلەردىڭ جەتەكشىلەرىمەن, قالانىڭ قوعامدىق ۇيىمدارى وكىلدەرىمەن جانە بولاشاق دارىگەرلەردىڭ اتا-انالارىمەن كەزدەستى. بۇل تۋرالى egemen.kz ءتىلشىسى حابارلادى.
«بۇعان دەيىن ءبىز مەديتسينالىق مەكەمەلەردىڭ باسشىلارىمەن, مەديتسينا قىزمەتكەرلەرىمەن كەزدەستىك, دەنساۋلىق ساقتاۋ سالاسىنىڭ پەرسپەكتيۆاسى مەن پروبلەمالارى تۋرالى ايتتىق. بۇگىن مەديتسينانىڭ دامۋىنا جانە كورسەتىلەتىن قىزمەت ساپاسىنا تىكەلەي قاتىستى ادامداردى جيناپ وتىرمىز. بارىنەن بۇرىن, ول – كادرلار دايارلاۋ ءۇشىن جاۋاپ بەرەتىن پروفەسسور-وقىتۋشىلار قۇرامى. سىزدەر ءۇشىن جۇرتشىلىقتىڭ جۇمىستارىڭىزدى قالاي باعالايتىنىن ءبىلۋ, ءبىلىم ساپاسى دەڭگەيى جونىندەگى ستۋدەنتتەر مەن ولاردىڭ اتا-انالارىنىڭ پىكىرىن تىڭداۋ دا قىزعىلىقتى بولار دەپ ويلايمىن. ءبىز مەديتسينالىق مەكەمەلەردىڭ باسشىلارىمەن ولاردىڭ ەمدەلۋشىلەرمەن جۇمىسىنىڭ ساپاسى مەن ادىستەرىن تالقىلاپ قانا قويماي, سونداي-اق, مەديتسينالىق جوعارى وقۋ ورنىنداعى كادرلار دايارلاۋدىڭ ولاردى قانشالىقتى قاناعاتتاندىراتىنىن, جاس ماماندارعا قانداي سىن ايتىلاتىنىن دا ساراپتاۋدى كوزدەپ وتىرمىز. بۇگىنگى كۇنى مەديتسينالىق مەكەمەلەردىڭ ماتەريالدىق-تەحنيكالىق بازاسى بارلىق حالىقارالىق ستاندارتتارعا سايكەس كەلەدى. ەندى كۇردەلى وپەراتسيالاردى قازاقستاندا جاسايتىن بولدى. الەمنىڭ ءارتۇرلى ەلدەرىنەن دارىگەرلەر كەلىپ, ءبىزدىڭ ماماندارىمىزدىڭ تاجىريبەلەرىن ۇيرەنۋدە. دەنساۋلىق ساقتاۋ جۇيەسىنىڭ باستى مىندەتى – كادرلاردى ساپالى دايارلاۋ جانە دارىگەرلەردىڭ بىلىكتىلىگىن كوتەرۋ», – دەدى جيىن بارىسىندا بەردىبەك ساپارباەۆ. ول كەزدەسۋ بارىسىندا مەديتسينا كادرلارىن دايارلاۋ جانە ولاردىڭ بىلىكتىلىكتەرىن كوتەرۋ بويىنشا جۇمىستاردى جەتىلدىرۋدى تاپسىردى.
ۋنيۆەرسيتەت رەكتورى ەربول بەكمۇحامبەتوۆتىڭ ايتۋىنشا, مۇندا 5 وقۋ-لابوراتوريالىق كورپۋسى, 1 530 ورىندىق 4 ستۋدەنتتەر جاتاقحاناسى, مەديتسينا ورتالىعى, وتباسىلىق مەديتسينا ەمحاناسى, ت.ب. قىزمەت تۇرلەرى بار. 1000 ورىندىق ستۋدەنتتەر جاتاقحاناسىنىڭ قۇرىلىسى اياقتالۋعا جاقىن, وعان جەرگىلىكتى بيۋدجەتتەن 2 ميلليارد تەڭگە ءبولىندى. پروفەسسور-وقىتۋشىلار قۇرامىندا 630 ادام بار. ۋنيۆەرسيتەت مەديتسينالىق مەكەمەلەرمەن تىعىز بايلانىستا, ستۋدەنتتەر كۇردەلى وتالارعا قاتىستىرىلادى. بقممۋ پروفەسسورى ارىستان مامىرباەۆ ايماقتىڭ ءىرى جەر قويناۋىن پايدالانۋشىلارىنا بايلانىستى قيىنشىلىقتار تۋرالى اڭگىمەلەدى.
ءوڭىر باسشىسى ءوز كەزەگىندە كەيبىر مەديتسينالىق مەكەمەلەردىڭ جۇمىستارى كوڭىلىنەن شىقپايتىنىن ايتتى. ىرعىز اۋدانىندا بيۋروكراتيالىق اۋرە-سارساڭ مەن دارىگەرلەردىڭ ۇقىپسىزدىعىنان قايتىس بولعان 24 جاستاعى ناۋقاسقا بايلانىستى جايتتى مىسالعا كەلتىردى. ونىڭ مالىمدەۋىنشە, ناۋقاستىڭ قايتىس بولۋىنا قاتىسى بار دارىگەرلەردىڭ بارلىعىنا ءتيىستى شارا قولدانىلاتىن بولادى. ول سونداي-اق, مەديتسينالىق قىزمەتكەرلەردىڭ دورەكىلىگىن دە سىنعا الدى, قاساڭدىق پەن قاعازباستىلىقتان قۇتىلۋ قاجەتتىگىن اتاپ ءوتتى. وبلىستا مەديتسينالىق كلاستەر قۇرىلاتىنىن جەتكىزدى. تاياۋدا عانا جاڭا مەديتسينالىق جەدەل جاردەم بەكەتىنىڭ قۇرىلىسىن سالۋ جونىندە تۇرىك كومپانياسىمەن كەلىسىم جاسالعانىنان, ايماققا جۇمىس جاساۋعا كورەيالىق دارىگەرلەر دە ىقىلاستى بولىپ وتىرعانىنان حاباردار ەتتى. سونداي-اق, مەديتسينالىق ءتۋريزمدى دامىتۋعا باعىت ۇستالاتىنىن ايتتى. كەزدەسۋ كەزىندە جاس عالىمدارعا قولداۋ كورسەتۋ, عىلىمدى دامىتۋ ماسەلەلەرى دە ءسوز بولدى.
ساتىبالدى ءساۋىرباي.
دەرەك, سۋرەت: egemen.kz.
