اتىراۋدا ءبۇلدىرشىندى قۇتقارعان سەرجانت ماراپاتتالدى

اتىراۋ. 21 قاڭتار. اتىراۋداعى №5546 اسكەري بولىمىندە كەلىسىمشارتپەن قىزمەت ەتەتىن سەرجانت مۇحتار ءوربىسىنوۆ «قوعامدىق ءتارتىپتى قورعاعانى ءۇشىن» توسبەلگىسىمەن ماراپاتتالدى. بۇل تۋرالى egemen.kz ءتىلشىسى حابارلادى. ەسكە سالا كەتەلىك, بۇعان دەيىن اسكەري سەرجانت مۇحتار ءوربىسىنوۆ ءوز ءۇيى ماڭىنداعى «اتابا» سۋپەرماركەتىندە ەسىنەن تانىپ قالعان 1,5 جاستاعى ءمادينانى ولىمنەن قۇتقارىپ قالۋعا كومەكتەسكەنىن حابارلاعان ەدىك. ول ءوزى شاقىرعان «جەدەل جاردەم» بيرگاداسى كەلگەنگە دەيىن فەلدشەر ماماندىعىن مەڭگەرگەن ايەلى سامالمەن بىرگە كىشكەنتاي بوبەكتىڭ دەنە قىزۋى تۇسۋىنە, ءوز-وزىنە كەلۋىنە قول ۇشىن سوزعان بولاتىن. «جەدەل جاردەم» بريگاداسى ەرلى-زايىپتى مۇحتار مەن سامالدىڭ العاشقى مەديتسينالىق كومەكتى دۇرىس كورسەتكەنىن جوعارى باعالادى. ال ءمادينانىڭ اكەسى ەربولات داۋلەتقاليەۆ اسكەري ءبولىم باسشىلىعىنا سەرجانت مۇحتار ءوربىسىنوۆتىڭ قىزىنىڭ ءومىرىن ساقتاپ قالۋعا كومەكتەسكەنىنە العىc بىلدىرگەن حاتىن جولدادى. ۇلتتىق گۆارديا «باتىس» وڭىرلىك قولباسشىلىعىنىڭ قولباسشىسى, گەنەرال-مايور ق.اقتانوۆتىڭ بۇيرىعىمەن كەلىسىمشارت قىزمەتىنىڭ سەرجانتى مۇحتار ءوربىسىنوۆ «قوعامدىق ءتارتىپتى قورعاعانى ءۇشىن» توسبەلگىسىمەن ماراپاتتالدى. توسبەلگىنى ارنايى وتكىزىلگەن سالتاناتتى شارادا №5546 اسكەري ءبولىمى كومانديرىنىڭ مىندەتىن اتقارۋشى ە.يۋدين تاپسىردى. جولداسبەك شوپەعۇل. دەرەك, سۋرەت: egemen.kz.