تاۋەلسىزدىك – تۇعىرىم

اقتوبە وڭىرىندە قازاقستان حالقى اسسامبلەياسىنىڭ قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان «ۇلكەن ەل – ۇلكەن وتباسى» رەسپۋبليكالىق جالپىۇلتتىق اكتسياسى باستاۋ الدى. وبلىس ورتالىعىنداعى «قونىس» سپورت سارايىندا وتكەن كەڭ اۋ­قىم­دى مەرەكەلىك شاراعا 4 مىڭنان استام ادام قاتىستى. شاراعا قاتى­سۋ­شىلار قاتارىندا ەڭبەك اردا­گەرلەرى, جاستار, جوعارى جانە ورتا ار­ناۋلى وقۋ ورىندارىنىڭ ستۋ­دەنتتەرى مەن وقىتۋشىلارى, ۇكى­مەت­تىك ەمەس ۇيىمدار مەن ەتنومادەني بىرلەستىكتەردىڭ وكىلدەرى بولدى. 1000 ادام قاتىسقان تەاتر­لان­دىرىلعان قويىلىمدا ەلىمىزدىڭ تاۋەلسىزدىك العان ساتىنەن باستاپ بۇگىنگە دەيىنگى ءجۇرىپ وتكەن جولى اي­شىقتى اجارلاندىرىلدى. الدى­مەن ساحنالانعان قويىلىم قازا­عىمنىڭ التىن بەسىگى – اۋىل كوشىپ كەل­گەندەي اسەرگە بولەدى. «ماڭگىلىك ەل» يدەياسىن بەينەلەگەن كورىنىستەر دە كوڭىلدى تولقىتارلىق بولدى. سودان كەيىن ساحنا تورىنە ەلىمىزدىڭ مەملەكەتتىك رامىزدەرى كەلتىرىلدى. كوك بايراعىمىزدى جەلبىرەتكەن سپورتشى جاستار ورتاعا شىقتى, ەلتاڭبامىز كەلتىرىلدى. حور ۇجىم­دارىنىڭ قوسىلىپ ورىنداۋىن­دا ءانۇرانىمىز اسقاقتادى. شارا با­رىسىندا پاتريوتتىق اندەر شىر­قالدى, ۇلكەن ەكراننان جەلتوقسان وقيعاسىن بەينەلەگەن كورىنىستەر كورسەتىلدى. اكتسياعا اق جول تىلەپ, جينال­عاندارعا ساليقالى ءسوز ارناعان وبلىس اكىمى بەردىبەك ساپارباەۆ ەلى­مىزدىڭ ەگەمەندىك العان جىل­دارداعى جاسامپاز ىستەرگە تولى جولىنا توقتالىپ, بارلىق جەڭىس­تەرىمىز بەن جەتىستىكتەرىمىزدى ەل­باسى ن.نازارباەۆتىڭ سارابدال سايا­ساتكەرلىگىمەن ساباقتاستىردى. ودان ءارى ءوڭىر باسشىسى ۇستىمىزدەگى جىلعى قاڭتار ايىندا وبلىستىڭ بارلىق اۋداندارىن ارالاپ شىعاتىن ۇگىت پويىزىنىڭ ساپارىنا ساتتىلىك ءتى­لەدى. پويىز قۇرامىندا مەديتسي­نا قىزمەتكەرلەرى, زاڭگەرلەر, «نۇر وتان» پارتياسىنىڭ, «دامۋ» كاسىپكەرلىكتى دامىتۋ قورىنىڭ وكىلدەرى بار. سيمۆوليكالىق «دوستىق شاڭى­راعى» استىنا ەتنومادەني ءبىر­لەس­تىكتەر وكىلدەرى جينالىپ, ۇلتتىق كيىمدەر كيىنگەن ۇلتتار وكىلدەرى ءاپ-ساتتە «دوستىقتىڭ گۇلدەستەسىنە» اي­نالىپ جۇرە بەردى. ۇستىمىزدەگى جىلى وڭىردە تاۋەلسىزدىكتىڭ 25 جىل­دىعىنا ارنالعان 5 مىڭنان استام ءارتۇرلى شارا وتكىزۋ كوزدەلۋدە. وسى كەزەڭدە كەمىندە 25 الەۋمەتتىك نى­سان پايدالانۋعا بەرىلەدى دەپ كۇتىلۋدە. اقتوبەدەن باستاۋ العان بۇل شارا ەلىمىزدىڭ بارلىق وبلىستارىندا جاراستى جالعاسادى. ءسات ساپار, ساعان, ازاتتىق پەن ازاماتتىقتىڭ اكتسياسى. ساتىبالدى ءساۋىرباي, «ەگەمەن قازاقستان». اقتوبە وبلىسى.