زاڭنامانى ىزگىلەندىرۋ قىلمىسكەرگە جەڭىلدىك جاساۋ ەمەس

قۇقىق قورعاۋ قادامدارى الماتى باس پروكۋراتۋرا جانە “ادام قۇقىقتارى ءۇشىن حارتياسى” قوعامدىق قورىنىڭ ۇيىمداستىرۋىمەن “قىلمىستىق زاڭنامالاردى قىلمىستان ارىلتۋ جانە ىزگىلەندىرۋ” اتتى دوڭگەلەك ۇستەل بولىپ ءوتتى. مەملەكەت باسشىسىنىڭ “قازاقستان رەسپۋبليكاسىنداعى قۇقىق قورعاۋ قىزمەتى مەن سوت جۇيەسىنىڭ تيىمدىلىگىن ارتتىرۋ جونىندەگى شارالار تۋرالى” جارلىعىن جانە “ازاپتاۋلارعا جانە باسقا دا قاتىگەز, ادامگەرشىلىككە جاتپايتىن نەمەسە ار-نامىستى قورلايتىن ءىس-ارەكەتتەر مەن جازالاۋ تۇرلەرىنە قارسى كونۆەنتسياعا فاكۋلتاتيۆتىك حاتتامانى راتيفيكاتسيالاۋ تۋرالى” زاڭدى ىسكە اسىرۋ ماقساتىندا ۇيىمداستىرىلعان جيىندا كۇن تارتىبىندە تۇرعان ماسەلەلەر كەڭىنەن تالقىلاندى. “قىلمىستىق زاڭنامالاردى قىلمىستان ارىلتۋ جانە ىزگىلەندىرۋ” اتتى جيىنعا پرەزيدەنت اكىمشىلىگى باسشىسىنىڭ ورىن­باسارى تالعات دوناقوۆ, كونستيتۋتسيالىق كەڭەس توراعاسى يگور روگوۆ, باس پروكۋ­رور­دىڭ ءبىرىنشى ورىنباسارى يوگان مەركەل “ادام قۇقىقتارى ءۇشىن حارتياسى” قوعام­دىق قورىنىڭ اتقارۋشى ديرەكتورى جەمىس تۇرماعامبەتوۆا قاتىسىپ, ءسوز سويلەدى. فو­رۋمنىڭ جۇمىسىنا سونداي-اق پارلامەنت­تىڭ, جوعارعى سوتتىڭ, قۇقىق قورعاۋ ورگان­دارى مەن حالىقارالىق جانە ۇكىمەتتىك ەمەس ۇيىمداردىڭ وكىلدەرى قاتىستى. مەملەكەت باسشى­سى­نىڭ بيىلعى جىل­دىڭ تامىز ايىنداعى جارلىعىندا ەلىمىزدە قىلمىستىق ساياساتتى ىزگىلەندىرۋگە باستى نازار اۋدارىلعان بو­لاتىن. شىن مانىسىندە دە, قىلمىستىق زاڭنامالاردى ىزگىلەندىرۋدىڭ قوعام ءۇشىن قاجەتتىلىگى وراسان ەكەندىگىن جيىندا ءسوز العان سالا باسشىلارى اتاپ كورسەتتى. وتكەن جىلداردا قىلمىسقا دەگەن كوزقاراستىڭ تىم قاتايىڭقىراپ كەتۋىنەن تەمىر تورعا قامالعاندار سانى كۇرت ءوسىپ كەتكەندىگى جاسىرىن ەمەس. سونىڭ ءناتي­­جەسىندە قاپاس­تاعىلار سانى جاعىنان قازاق­­ستان بۇگىندە الەمدە ون جەتىنشى ورىندى يەلەنۋدە, سوندىقتان دا قىلمىستىق زاڭنامالاردى بارىنشا ىزگىلەندىرۋ ماسەلەسى قازىرگى كەزەڭدەگى باستى تالاپتاردىڭ بىرىنە اينالىپ وتىرعاندىعى ءسوزسىز. بۇل ورايدا جيىندا ءسوز العان كونس­تي­تۋتسيالىق كەڭەس توراعاسى يگور رو­گوۆتىڭ “قىلمىستىق جازانى ىزگىلەندىرۋ, تۇپتەپ كەلگەندە قىلمىسكەرلەرگە جەڭىل­­دىك جاساۋ دەگەن ءسوز ەمەس, كەرىسىنشە, قۇ­قىق قورعاۋ ورگاندارىنىڭ جۇمىس ساپا­سىن جاقسارتۋ” دەگەن سالماقتى پىكىرىن اتاپ كورسەتكەن ءجون. سالا باسشىلارىنىڭ پىكىرىنشە, قىل­مىستىق زاڭنامانى ىزگىلەندىرۋ دەگەنىمىز, قوعامدا زاڭ تالاپتارىن بۇزۋشىلىققا, قىلمىستىق ارەكەتتەرگە دەگەن كوزقاراستى وزگەرتىپ, ونى مۇلدەم جەڭىلدەتۋ ەمەس. بۇل ورايداعى ەڭ باستى مىندەت – قۇقىق قورعاۋ ورگاندارىنىڭ جۇمىستارىن جۇيەلەندىرىپ, بۇل باعىتتاعى جاۋاپكەرشىلىكتى بارىنشا كۇشەيتۋ. باس پروكۋروردىڭ ءبىرىنشى ورىن­باسارى يوگان مەركەلدىڭ پىكىرىنشە “قىل­مىستىق زاڭنامالاردى ىزگىلەندىرىپ, جازا تاعايىنداۋدا مۇمكىندىگىنشە جەڭىلدىكتەردى قاراستىرۋدىڭ پايداسى وراسان”. “قازاقستان رەسپۋبليكاسىنداعى قۇقىق قور­عاۋ قىزمەتى مەن سوت جۇيەسىنىڭ ءتيىم­دىلىگىن ارتتىرۋ تۋرالى” مەملەكەت باسشىسى نۇرسۇلتان نازارباەۆتىڭ جارلىعىن ىسكە اسىرۋ ماقساتىندا ۇيىمداستىرىلعان جيىندا سوت جۇيەسىندەگى احۋال دا قامتىلدى. باقىت بالعارينا, الماتى.