رەسپۋبليكالىق ىرگەلى باسىلىمدار باس رەداكتورلارىنىڭ وقىرماندارمەن كەزدەسۋلەرى وسىلاي جالعاستى
جىلدىڭ وسى مەزگىلى ادەتتە بۇقارالىق اقپارات قۇرالدارى ءۇشىن قۇس ۇيقىلى شاق. وقىرمان قاتارىنا وقىرمان تارتىلار, الداعى تارالىم مەجەسى قىلاڭ بەرەر كەز. سونىڭ ءساتتىلىگىنە ارقاۋ سالعانداي قاراعاندىدا باستالىپ, تەمىرتاۋدا جالعاسىپ, ودان قارقارالىدا ۇلاسقان ەلىمىزدەگى ەڭ تانىمال قازاق باسىلىمدارى باس رەداكتورلارىنىڭ كۇندەرى ءوڭىر رۋحاني ومىرىندەگى وزگەشە ءبىر سەرپىلىس بولدى. بۇعان دەيىن ايماق تاريحىندا ۇلتتىق ءباسپاسوز تۇرلەرى جەتەكشىلەرىنىڭ بۇكىل قۇرامدا باس قوسۋى بولىپ كورمەگەن ەدى. بۇل كەزدەسۋگە كەلۋشىلەردى وبلىس اكىمى سەرىك احمەتوۆ قابىلداپ, الەۋمەتتىك-ەكونوميكالىق دامۋ باعىتىندا اتقارىلىپ جاتقان ىستەرمەن تانىستىرۋىنان كەيىن ءسوز كەزەگى مەيماندارعا بەرىلدى.
اڭگىمە جەلىسىن الدىمەن ساباقتاعان “ەگەمەن قازاقستان” گازەتىنىڭ باس رەداكتورى جانبولات اۋپباەۆ: “شىندىعىن ايتقاندا ءباسپاسوز سالاسىنداعى 38 جىلدان بەرگى قىزمەتىمدە ارىپتەستەرىمنىڭ ءتورت كوزى تۇگەل ەل ءىشى ورتاسىندا وسىلاي قاۋىشۋىن ءبىرىنشى رەت كورىپ وتىرۋىم. وزگە وڭىرلەرگە دە ۇلگى بولارلىق ءۇردىس باستاۋى دەر ەدىم مۇنى. اسىرەسە, گازەت-جۋرنالدارعا جازىلۋدىڭ قازىرگى ناۋقانى قىزعان كەزىندە وقىرماندارمەن تىكەلەي جۇزدەسۋدىڭ ءمانى دە, ءجونى دە بولەك ەكەندىگى داۋسىز. قاراعاندىنىڭ ءوندىرىستىڭ عانا ەمەس, عىلىم مەن ءبىلىمنىڭ, ونەر مەن مادەنيەتتىڭ قاراشاڭىراعى رەتىندەگى سان قىرلى تىنىسىن سەزىنۋ اسەرى ىستىق بولسا, مىناۋ ءجۇزدەسۋ سونى تانىتۋعا پارىز ۇستەيدى, – دەپ بۇل شارانىڭ شاراپاتى بارلىق باسىلىمدارعا بىردەي تيەتىندىگىنە سەنىم ءبىلدىردى.
اعا قالامداستارىنىڭ ءسوزىن جالعاستىرۋشىلار وزدەرى باسقارىپ وتىرعان باسىلىمداردىڭ بۇگىنگى حال-احۋالى, شىعارماشىلىق باعدارلاما-جوبالار تۋرالى ويلارىن ورتاعا سالدى.
بۇدان سوڭ باس رەداكتورلار ە.ا.بوكەتوۆ اتىنداعى قاراعاندى مەملەكەتتىك ۋنيۆەرسيتەتى وقىتۋشىلارى جانە ستۋدەنتتەرىمەن كەزدەسۋگە قاتىستى. شىعارماشىلىقتارى ارقىلى سىرتتاي تانىس, بىراق جۇزبە-ءجۇز كورمەگەن قالامگەرلەرگە سۇراقتار جان-جاقتان جاڭبىرداي جاۋدى. اڭگىمەنىڭ قىزۋ تالقىسى بىلىكتى مامان بولىپ شىعۋ ءۇشىن نە ىستەۋ كەرەك, قوعام جاستاردان نە كۇتەدى دەگەن توڭىرەكتە ءوربىدى. وسى ورايدا جانبولات اۋپباەۆتىڭ بولاشاق جۋرناليستەرگە ماماندىق مەڭگەرتۋگە وسىندا وتىرعان باس رەداكتورلاردىڭ ءبارى بولماسا دا ءبىرازى الداعى ۋاقىتتا ۋنيۆەرسيتەتكە ارنايى ءدارىس وقۋعا شاقىرىلىپ تۇرسا دەگەن پىكىرى قوستالدى. ول بۇل ۇسىنىسىن تۇسىندىرە تۇسكەندەي مۇنىڭ ءوزى ءارى پراكتيك, ءارى امبەباپ, ياعني گازەت شىعارۋدىڭ قىر-سىرىنا مەيلىنشە جەتىك جانداردىڭ تاجىريبەلىك اقىل-كەڭەستەرى ءىزباسارلارىنا اناعۇرلىم پايدالى بولاتىنىن قىسقا دا نۇسقا ەتىپ ايتتى.
قازاقستان جۋرناليستەر وداعىنىڭ توراعاسى سەيىتقازى ماتاەۆ ءبۇگىندە سالالىق جوعارى وقۋ ورىندارى جانىندا دا جۋرناليستيكا فاكۋلتەتتەرى قاپتاپ كەتكەنىن, وقىتۋشىلىققا كولدەنەڭ كوك اتتىنى الىپ جاتقاندىقتان ولاردىڭ جارىتىمدى ءبىلىم بەرىپ جاتپاعاندىقتارىن تىلگە تيەك ەتىپ, مۇنداي ارەكەتتىڭ جونسىزدىگىنە نازار اۋدارتتى. جازۋ-سىزۋ ونەرىن ۇيرەتۋ ءبىر باسقا ەكەندىگىن, سوندىقتان وعان جاۋاپكەرشىلىك كۇشەيتىلۋى كەرەكتىگىن العا تارتتى.
وبلىس وقىرماندارىمەن سۇحبات تەمىرتاۋدا جالعاستى. قازاقستان ماگنيتكاسىنىڭ بايىرعى مەتاللۋرگتەرى, سونىڭ ىشىندە قازاقستاننىڭ ەڭبەك ەرى ارعىن ءجۇنىسوۆ ءاڭگىمەسىنە ىنتا قويىلدى. ولار وزدەرى ەرتەدەن ءسۇيىپ وقيتىن باسىلىمدار باسشىلارىنىڭ ورتالارىنا ارنايى كەلىپ, ەمەن-جارقىن سىر قوزعاعاندارىنا رازى بولدى.
ۇلتتىق باسىلىمداردىڭ ەڭ قالىڭ وقىرماندارى قالىپتاسقان قارقارالى اۋدانى تۇرعىندارىنىڭ بولسا بولماسىن بۇل كەزدەسۋدى تاعاتسىزدانا كۇتكەنى بايقالدى. مۇندا باس رەداكتورلار الدىمەن قۇنانباي مەشىتىندە قۇران وقىتىپ, ارقا توسىندەگى كونە شاھاردىڭ تاريحي ورىندارىمەن تانىستى. قالادا العاشقى عيماراتتاردى ءوز كۇشىمەن تۇرعىزۋشىلاردىڭ ءبىرى كوپەس بەكمەتوۆ سالدىرىپ, اباي توقتاعان, پوتانين ايالداعان ۇيلەر مەن ناعاشىسى قازاق, اتاقتى گەنەرال لاۆر كورنيلوۆ ومىرگە كەلىپ, بالالىق شاعىن وتكىزگەن پاتەر, وسى جازدا تابىلعان “التىن ادام” اشەكەيلەرىمەن تولىقتىرىلعان ولكەتانۋ مۇراجايى بارىپ كورىلدى. ءا.بوكەيحانوۆ, م.دۋلاتوۆ, ا.بايتۇرسىنوۆ, ج.اقپاەۆ, ك.توعىسوۆ سىندى قايراتكەرلەر باستاۋىمەن ايگىلى قارقارالى پەتيتسياسى قابىلدانعان الاڭعا, ءمادي ەسكەرتكىشىنە تاعزىم ەتىلدى. سودان سوڭ بارىپ اۋداندىق كىتاپحانا زالىندا وقىرماندارمەن جۇزدەسۋ بولىپ, وندا “قازاق گازەتتەرى” جشس باسشىسى ج.كەنجالين, “ايقىن”, “انا ءتىلى”, “تۇركىستان”, “دالا مەن قالا” گازەتتەرىنىڭ باس رەداكتورلارى ن.ءجۇسىپ, س.يبرايىموۆ, ش.ءپاتتەەۆ, س.پارمانقۇلوۆ ءوز ويلارىن ورتاعا سالدى. قورىتىندىسىندا “استانا” جۋرنالىنىڭ باس رەداكتورى م.ءتاجىمۇراتتىڭ وسىنداي شارا الداعى ۋاقىتتا “قارقارالى كەزدەسۋى” دەگەن اتپەن داستۇرگە اينالسا, بۇل قازاق ءتىلدى باسىلىمداردىڭ بىرلىگىنە التىن ارقاۋ بولار ەدى دەگەن پىكىرى قۇپتالدى.
قازاق باسىلىمدارىن سۇيىكتى سەرىككە اينالدىرعان قاراعاندىلىق وقىرماندار قاتارى جىلدان-جىلعا ءوسىپ كەلەدى. “ەگەمەن قازاقستاننىڭ” تارالىمى 12 مىڭنان اسۋى سونىڭ ءبىر ايعاعى. ۇلتتىڭ رۋحاني ءومىرىنىڭ تۋىن ۇستاپ, سونى كوتەرگەن وركەنيەتتىك جۇگى سالماقتى دا ارداقتى ءتول باسىلىمدار بەدەلى بيىكتەي بەرمەك.
ايقىن نەسىپباي, قاراعاندى.
