جارايسىڭ, المات!

شىعىس قازاقستان وبلىسىنىڭ ءۇرجار اۋدانىنداعى وليمپيالىق رەزەرۆكە ماماندان­دىرىلعان بالالار مەن جاسوسپىرىمدەرگە ارنالعان سپورت مەكتەبىنىڭ تاربيەلەنۋشىسى المات كەبىسباەۆ ماسكەۋ قالاسىندا وتكەن الەم چەمپيوناتىنان قولا مەدالمەن ورالدى. الەم بىرىنشىلىگى ءۇشىن كۇرەس قىركۇيەك ايى­نىڭ 6-سى مەن 8-ءى كۇندەرى ماسكەۋ قالا­سىندا ءوتتى. وعان ەلىمىزدەن 7 بالۋان, اۋدانى­مىزدان 3 بالۋان قا­تىستى. مارتەبەلى الەمدىك جارىستا المات قانجى­عاسىنا مەدال بايلاپ, رەسەيدەن ەلىمىزدىڭ كوك بايراعىن جەلبىرەتىپ قايتتى. ول ءوزىنىڭ جەتىس­تىگىنە ءدان ريزا. وسىعان دەيىن المات باسقا دا جارىس­تار­دا جۇلدەلى ورالىپ, جاقسى ناتيجەلەر كورسەتكەن ەدى. – الەم چەمپيوناتى وتە جوعارى دارە­جەدە ءوتتى, قارسىلاستارىم دا مىقتى بولدى, بىراق ەشتەڭەگە قاراماستان جۇلدەمەن ورال­دىم. جات­تىق­تىرۋشىمىزدىڭ ەڭبەگى زايا كەت­كەن جوق دەپ ويلايمىن, – دەيدى المات كەبىسباەۆ. الماتتىڭ ايتۋلى جەتىستىكتەرىندە ونىڭ باپ­كەرى, قازاقستاننىڭ ەڭبەك سىڭىرگەن جاتتىق­­تىرۋ­شىسى بو­رانبەك قوڭىراتوۆتىڭ ەڭبەگى ءبىر توبە ەكەنى ءسوزسىز. ال ءبىز, ۇرجارلىقتار الماتتىڭ جەڭىسىنە شى­نايى قۋانىشتىمىز. سپورتتىڭ قاي سالاسى بول­سا دا وليمپيادادا باعى جانىپ, ەل مەرەيىن اسىر­سا, بىزگە ودان ارتىق قۋانىش جوق. بالۋان­دارىمىزدىڭ توپ جارىپ, مەدال ەنشىلەۋىنىڭ ورنى ءبىر بولەك. اۋدان اكىمى باۋىرجان جاناقوۆ كىلەم جابىل­عان ءۇش سايگ ۇلىكتى المات كەبىسباەۆ پەن دارحان باياحمەتوۆقا جانە وسى ەكى بالۋاننىڭ جاتتىق­تىرۋشىسى بورانبەك قوڭىراتوۆقا تابىس ەتتى. بۇل قۋانىش, بۇل جەڭىس اۋدانىمىز ءۇشىن ۇلكەن ابىروي. جاس بالۋاندارعا الداعى ۋاقىتتا جارىستاردا ۇلكەن جەتىس­تىكتەرگە جەتىپ, ەلىمىزدىڭ ابىرويىن, داڭقىن اسقاقتاتا بەرىڭدەر دەمەكپىز. زۋحرا تۇراپوۆا.