ءۇي جوندەۋدىڭ ۇلگىسى

قالالىق كوممۋنالدىق شارۋا­شى­لىق ءبولىمىنىڭ حابارىنا قارا­عان­دا, جالپى وبلىس ورتالىعىندا 1314 كوپ قاباتتى تۇرعىن ءۇي بار كورىنەدى. وكىنىشكە قاراي, وسى ءۇي­لەردىڭ 914-ءنىڭ توبەلەرى بىرنەشە جىلدان بەرى شۇرق-شۇرق تەسىلە باس­تاعان, ال, تۇرعىندار بولسا, كوكتەم­دە ەرىگەن قار سۋى مەن جازعى, كۇزگى جاڭبىر تامشىلارىنان ابدەن مازالارى كەتۋدە. ءتىپتى, بۇدان وتىز-قىرىق جىل بۇرىن سالىنعان كەي­بىر ۇيلەر بۇگىندەرى اپاتتى جاع­داي­­دىڭ از-اق الدىندا. كوپ قاباتتى كەيبىر بيىك ۇيلەردە ليفتىلەر كۇردەلى جوندەۋ كۇتىپ تۇر. تۇرىپ جاتقان پاتەرلەرى جەكە مەنشىكتى بولعاندىقتان, سۋ اعىپ, تامشى سورعالايتىن ۇيلەردىڭ توبە شاتىرى قالا اكىمدىگىنىڭ قاراجاتى ەسەبىنەن جوندەلمەيتىنى, ال, پاتەر يەلەرى ءبىر­لەسىپ جوندەپ بۇتىندەپ الۋلارىنا قىرۋار قاراجات, تەحنيكا, ادام كۇشى كەرەك ەكەنى تاعى بەلگىلى. قا­لاۋىن تاپسا, قار جانار دەگەن. قالا اكىمدىگى قيىن تۇيىنگە اينالعان كۇردەلى ماسەلەلەردىڭ ءبىر شەشۋىن تاپقانداي. ءسويتىپ, بيۋدجەتتىك ەمەس قاراجات كوزدەرى ارقىلى تابىلعان شەشىم بويىنشا توبەلەردى جوندەي باستادى. كومەك قولىن سوزعان مەر­دىگەر فيرمالار دا تابىلدى. وبلىس ورتالىعىنداعى سۋۆوروۆ كوشەسى 12-ءۇيدىڭ توبەسىندە جۇرگىزىلىپ جاتقان جوندەۋ جۇمىستارىن ءوز كوزىمەن كو­رۋ ءۇشىن توبەگە شىققان قالا اكىمى با­قىتجان جولامانوۆ سول جەردە مەردىگەر فيرما وكىلدەرىمەن كەز­دە­سىپ, كادىمگىدەي جۇمىس بارى­سىن­داعى جينالىس تا وتكىزدى. ويتكەنى, قىس جاقىنداپ قالدى. قالا قازان ايىنا دەيىن قىسقا دايىن بولۋى كەرەك. بۇل ءۇيدىڭ توبەسىندە “ستروي-گرانت” فيرماسىنىڭ جۇمىسشىلا­رى ەسكى جابىندىلاردى الىپ, اياز بەن ىستىققا ءتوزىمدى جوعارى ساپالى ماتەريالدار توسەۋدە. بىلتىر تولس­توي كوشەسىندەگى 90-ءۇيدىڭ توبەسى بۇتىندەلدى, تۇرعىندار قازىر پاتەر­لەرى­نىڭ ءار جەرىنە قويىلعان ىدىس­تاردان جاڭبىر تامشىسىنىڭ تىر­سى­لىن ەستىمەي ۇيىقتايتىن بولىپ­تى. قالالىق اكىمدىكتىڭ حابارىنا قاراعاندا “جاڭبىر جاۋماسا ەكەن” دەپ جىلاپ تۇرعان تاعى دا وسىنداي 23 ءۇيدىڭ توبەلەرىنە جوندەۋ جۇمىس­تارى جۇرگىزىلۋدە. مەردىگەر فيرما­لار قولدارىنا العان جۇمىستاردى ساپالى اتقارۋلارى ءۇشىن اكىمدىكتىڭ تىكەلەي باقى­لاۋىنا الىنعان. فاريدا بىقاي, پاۆلودار.