حالىقارالىق ىزدەۋدە جۇرگەندەر قۇرىقتالدى

الماتىلىق پوليتسەيلەر قىل­مىس­­پەن كۇرەستە وزدەرىنىڭ تمد ەل­دەرىندەگى ارىپتەستەرىنە دە كومەك قو­لىن سوزۋدا. الماتى قالالىق ءىش­كى ىستەر دەپارتامەنتى ءباسپاسوز قىز­­مە­­تىنىڭ جەتەكشىسى سالتانات ءازىر­بەكتىڭ ايتۋىنشا, وڭتۇستىك استانادا جىل باسىنان بەرى بۇرىن ىزدەۋدە جۇرگەن 244 قىلمىسكەر قۇرىق­تال­عان. ولار­دىڭ 159-ى قازاقستان قۇ­قىق قورعاۋ ورگاندارىنىڭ ىزدەۋىندە بولعان. ال, الماتى قالاسىندا ۇستالعان 89 قىلمىسكەرگە تمد ەلدەرىنىڭ قۇ­قىق قورعاۋ ورگاندارى حالىقارالىق ىزدەستىرۋ جاريالاعان. ەلىمىزدەگى ەڭ ءىرى جانە حالىق تىعىز ورنالاسقان قالا – الماتىدا جاسىرىنىپ, ءىزىن سۋىتۋعا ۇمتىلاتىن قىلمىسكەر­لەر­­دىڭ جولىن كەسۋ باعىتىندا قالالىق ءىىد بىرقاتار ىقپالدى ءىس-شارالاردى جۇزەگە اسىرۋدا. ءسوز رەتى كەلگەندە اتاپ ايتارلىعى, قولعا تۇسكەندەردىڭ اراسىندا اسا اۋىر قىلمىس جاسا­عاندار دا بار. – ماسەلەن, رەسەيدەگى چەبوكسا­رى قالاسىنىڭ ميليتسياسى ىزدەستىر­گەن 59 جاستاعى ەر ادام تالايلاردى جەر سوقتىرىپ, ولاردان ءىرى كو­لەمدەگى اقشانى الداپ العان الاياق بولىپ شىقتى. قىلمىستىق ءىس ما­تە­ريالىندا ونىڭ قازاقستاندا تۋ­عاندىعى كورسەتىلگەندىكتەن چە­بوك­سارى قالاسى لەنين اۋداندىق ىشكى ىستەر ءبولىمىنىڭ تەرگەۋشىلەرى ونىڭ ءوز تۋىستارى تۇراتىن تاريحي وتا­نىنا قاشۋى مۇمكىن ەكەنىن جوبالاعان. ىزدەستىرىلۋدە جۇرگەن الاياق قا­لاداعى رايىمبەك داڭعىلىنداعى ءبىر ۇيدەن تابىلىپ, ۇستالدى. تاياۋدا ول رەسەي فەدەراتسياسىنا ەكسترادي­تسيالانادى. ءبىر قۇپتارلىعى, سالا ماماندارىنىڭ كاسىبي شەبەرلىگىنە, ىسكەرلىك تاجىريبەسىنە وراي قانداي قاشقىن بولماسىن ءوز قىلمىسىنىڭ جازاسىن تارتاتىنى ايداي اقيقات, دەيدى الماتى قالالىق ءىىد كري­مي­نالدى پوليتسيا باسقارماسىنىڭ ءبولىم باستىعى, پولكوۆنيك ۆاديم سترەلتسوۆ. شىن مانىسىندە, وتىرىك سياقتى قىلمىستىڭ دا قادامى قىسقا ەكەن­دىگىن دالەلدەپ جاتۋدىڭ قاجەتى جوق سياقتى. بۇگىندە الماتىلىق قۇقىق قورعاۋشىلار قىلمىسپەن كۇرەس جانە ونىڭ الدىن الۋ باعىتىنداعى بىرقاتار ءتيىمدى ءىس-شارالاردى جۇزەگە اسىرۋدا. باقىت بالعارينا, الماتى.