ۇسىنىلعان 220 جۇمىس ورنىنىڭ 161-ءى يەسىن تاپتى. ءبولىمنىڭ ەسەبى بويىنشا, تامىز ايىنا دەيىن 3489 جۇمىسسىز تىركەلسە, ەندى ونىڭ 2347-ءسى جۇمىسقا ورنالاسقان. بۇعان قوسا 455 ادامعا قوعامدىق اقىلى جۇمىس ۇسىنىلىپ, 85-ءى كاسىبي وقۋعا جولداما العان. ەلباسىنىڭ تىكەلەي باقىلاۋىنداعى “جول كارتاسى” باعدارلاماسى بويىنشا 700-دەن استام جاس تاعىلىمدامادان وتكىزۋگە جىبەرىلىپتى. ءسويتىپ, اۋداندا وسىنداي ناقتى جۇمىستار جاسالىپ جاتىر.
باقتيار تايجان, وڭتۇستىك قازاقستان وبلىسى.
ون التىنشى بانك وتاۋ تىكتى. وبلىستا ەكىنشى دەڭگەيلى بانك بولىمشەلەرىنىڭ سانى كوبەيىپ, 16-عا جەتتى. ونىڭ اشىلۋ سالتاناتىنا ايماق باسشىسى سەرىك ءبىلالوۆ قاتىسىپ, جاڭا ۇجىمعا تابىس تىلەدى. ول ءوز سوزىندە 7 ايدا وبلىس ەكونوميكاسىنا 25 ميلليارد تەڭگە ينۆەستيتسيا قۇيىلعانىن, مۇنىڭ وتكەن جىلعا قاراعاندا 14 پايىزعا كوپ ەكەنىن اتاپ ءوتتى. كوممەرتسيالىق بانكتەر تاراپىنان بەرىلگەن نەسيەلەر مولشەرى 28 ميلليارد تەڭگەگە جەتكەن. سونىڭ ناتيجەسىندە بيىل جوسپارلانعان ينۆەستيتسيالىق جوبالاردىڭ 6-ۋى جۇزەگە اسقان. “Delta Bank” اق باسقارما توراعاسىنىڭ ورىنباسارى ينەسسا كيم بانك اكتيۆىنىڭ 42 ميلليارد تەڭگەنى قۇرايتىنىن, ەلىمىزدە 11 فيليال جۇمىس ىستەيتىنىن جەتكىزدى. ۇلتتىق بانك وبلىستىق بولىمشەسىنىڭ ديرەكتورى جومارت قاجىراحىموۆ كادەسىي جاسادى.
ءومىر ەسقالي, سولتۇستىك قازاقستان وبلىسى.
جارقىن... كوز جاسىنا سەنبەيدى. جامبىل وبلىسىنا قاراستى سارىسۋ اۋدانىنىڭ اقتوعاي اۋىلىندا دۇنيەگە كەلىپ, كەيىن الماتىداعى اباي اتىنداعى پەداگوگيكالىق ينستيتۋتتى بىتىرگەن جارقىن وتەشوۆا سوڭعى 20 جىلدان بەرى ماسكەۋ قالاسىندا تۇرادى. وتكەن اپتادا ول تۋعان جەرىنە كەلىپ قايتتى. بىراق قۇرقول ەمەس, جىلدار بويى جۇرەگىن تۇرتكىلەگەن سەزىمدەرىن جىرعا اينالدىرىپ, “ماسكەۋ: ءومىر وزەن” دەگەن كىتاپقا سىيعىزىپ اكەلگەن. – اۋەلى ءوزىمىزدىڭ اقتاۋ قالاسىندا مۇعالىم بولدىم, ال ماسكەۋگە اۋىسقاننان كەيىن سونداعى “قازاق ءتىلى” قوعامدىق قورىندا قىزمەت ەتتىم. قازىر قور توراعاسىنىڭ ورىنباسارىمىن, بوس ۋاقىتتا جىر جازامىن, – دەدى ول “نۇر وتان” حدپ وبلىستىق فيليالىندا جانە تاراز مەملەكەتتىك ۋنيۆەرسيتەتىندەگى جىر-سۇحباتقا ارقاۋ بولعان عيبراتتى كەزدەسۋلەرىندە. حالقىمىزدا “قىز بالا ەڭ بولماعاندا ءبىر ات دوربا جەمگە جارايدى” دەگەن ءسوز بار. ال ج.وتەشوۆا بولسا, ىرگەلى ەكى مەملەكەتتىڭ اراسىنا دانەكەر بولىپ, ەلدىك ءمانى بار ۇلكەن ىستەرگە مۇرىندىق بولىپ ءجۇر.
كوسەمالى ساتتىباي ۇلى, جامبىل وبلىسى.
سالاماتتى ءومىر سالتى ءۇشىن. وتكەن اپتادا وبلىس ورتالىعىندا وبلىستىق اكىمدىكتىڭ قولداۋىمەن “دۇرىس تاماقتان. سپورتپەن شۇعىلدان” اتتى ۇرانمەن دەنساۋلىق فەستيۆالى ۇيىمداستىرىلدى. فەستيۆالعا وقۋشىلار, ستۋدەنتتەر, سپورتقۇمار قالا تۇرعىندارى قاتىستى. سپورت مەكتەپتەرىنىڭ وقۋشىلارى, بيشىلەر جانە كوركەمونەرپازدار ۇجىمدارى ونەر كورسەتتى. جاياۋ جۇگىرىس مارافونى ءوتتى. جاسوسپىرىمدەردى, جاستاردى سپورتتىق سەكتسيالارعا شاقىرۋ ماقساتىندا كورمەلەر, دەنساۋلىق شىڭداۋعا ارنالعان سپورتتىق تاۋارلار جارمەڭكەسى بولدى. دارىگەرلەر كەڭەستەر بەردى.سالاماتتى ءومىر سالتىن قالىپتاستىرۋ جايىندا تانىمدىق كىتاپشالار تەگىن تاراتىلدى. سەنبى كۇنى اۋداندار ورتالىقتارىندا, اۋىلداردا سپورت تۇرلەرىنەن جارىستار ۇيىمداستىرىلدى. پاۆلودارداعى ورتالىق الاڭدا, ستاديوندار مەن پاركتەردە دەمالىس ۋاقىتى وتباسىلىق دەنساۋلىق فەستيۆالى رەتىندە اتالىپ ءوتتى.
فاريدا بىقاي, پاۆلودار.
بايىپتى بايقاۋ جاريالاندى. “نۇر وتان” حالىقتىق-دەموكراتيالىق پارتياسى وبلىستىق فيليالىنىڭ مەملەكەتتىك تىلگە دەگەن كوزقاراسىن “بارەكەلدى” دەپ قابىلداۋعا بولادى. ءاردايىم يگىلىكتى ىستەرگە ۇيىتقى بولىپ جۇرەتىن فيليال “تىلگە – قۇرمەت, ەلگە – قۇرمەت” تاقىرىبىندا بايقاۋ جاريالاپ, ونىڭ ەرەجەسىن بەكىتكەنىن جۇرتشىلىق جىلى قابىلدادى. بايقاۋدا بەس نوميناتسيا بويىنشا بۇقارالىق اقپارات قۇرالدارى وكىلدەرىنىڭ ۇزدىك شىعارمالارى مەن ينتەرنەت-رەسۋرستار ارقىلى مەملەكەتتىك ءتىلدىڭ قولدانىس اياسىن كەڭەيتۋگە, تانىمدىق فيلم, وقۋلىقتار, كىتاپ, مادەني-كوپشىلىك جانە باسقا جوبالارعا قوماقتى جۇلدەلەر تاعايىندالدى. ۇسىنىلاتىن ماتەريالداردىڭ ماڭىزدىلىعىنا, اقپاراتتاردىڭ بەزەندىرىلۋىنە تالاپ جوعارى ەكەندىگى جاريا ەتىلدى.
كۇمىسجان بايجان, الماتى وبلىسى.
ساقشىلاردىڭ جاناشىرلىعى. قالاداعى زاتون پوليتسيا ءبولىمى مەملەكەتتىك ءتىلدى دامىتۋعا كوپتەن بەرى كوڭىل ءبولىپ كەلەدى. مۇندا ءىس قاعازدارىن جۇرگىزۋ مەملەكەتتىك تىلگە كوشىرىلە باستاعانىنا دا ءبىراز ۋاقىت بولىپ قالدى. وسىنداي وڭدى تالپىنىس ناتيجەسىندە وسىنداعى باسقا ۇلت وكىلدەرى دە قازاق تىلىندە سويلەي باستادى. بىراق, ءبىر قۋانارلىق ءجايت سول, ءبولىم بارعا قاناعات جاساپ وتىرعان جوق. سونىڭ ايعاعىنداي جۋىردا مۇندا مەملەكەتتىك ءتىل جاعدايىنا ارنالعان دوڭگەلەك ۇستەل وتكىزىلىپ, ناقتى شارالار قابىلداندى. ءتارتىپ ساقشىلارىنىڭ بۇل يگى قادامىن تەك قۇپتاعان ءجون.
داۋلەت سەيسەن ۇلى, سەمەي.
مۇنايشىلار قايىرىمدىلىعى. وبلىستىق بالالاردىڭ قۇقىعىن قورعاۋ دەپارتامەنتىنىڭ تاپسىرماسىمەن “تورعاي پەترولەۋم” اكتسيونەرلىك قوعامى تۇرمىسى تومەن وتباسىلارىنىڭ 36 بالاسىنا كيىمدەر ۇلەستىرىپ, اق داستارقان جايدى. “تورعاي پەترولەۋم” اق-تىڭ اتقارۋشى ديرەكتورى ساعيت التىنبەكوۆ جاس وركەندەردى جاڭا وقۋ جىلىمەن شىن جۇرەكتەن قۇتتىقتاپ, سىي-سياپات ۇسىندى. ال وقۋشىلار مۇنايشىلارعا ءان مەن بيدەن شاشۋ شاشىپ, سابيلىك سەزىمدەرىن جەتكىزدى. سونداي-اق “وتانىمىز – قازاقستان” تاقىرىبىندا سۋرەتتەر سالىپ, مۇنايشىلارعا تارتۋ ەتتى. بالالاردىڭ تۋىندىلارى كومپانيانىڭ مۇراعاتىندا ساقتالاتىن بولماق.
ەركىن ءابىل, قىزىلوردا.
