“توبىل” دەس بەرەر ەمەس

وتكەن اپتادا قازاقستان ۇلتتىق قۇراما­سىنىڭ ەۋروپا چەمپيوناتىنىڭ ىرىكتەۋ تۋرنيرىنە قاتىسقانىنا بايلانىستى جاريالانعان ۇزىلىستەن كەيىن فۋتبولدان ەل چەمپيوناتىنىڭ كەزەكتى تۋرى قايتا جالعاستى. بيىلعى ماۋسىمنىڭ ءبىرىنشى جارتىسىنان كەيىن چەمپيوندىق اتاققا ءۇمىتى بار دەگەن التى كوماندا ءبىر توپقا, ال تومەنگى ورىندارعا ورنالاسقان كوماندالار ەكىنشى توپقا اۋىسىپ, ماتچتار وتكىزدى. ءسويتىپ, ءبىرىنشى توپقا ەنگەن كوماندالار اراسىنداعى ويىندار مىناداي ناتيجەمەن اياقتالدى. “لوكوموتيۆ” (استانا) – “اقتوبە” 2:2. بۇل ماتچ اسا تارتىستى ءوتتى. استانانىڭ جاڭا ستا­ديو­نىنىڭ جاسىل الاڭىنا شىققان كوماندالار وي­ىننىڭ سوڭىنا دەيىن ءبىر-بىرىنە دەس بەرمەي ونەر كور­سەتتى. كەزدەسۋدە ءبىرىنشى بولىپ ەسەپتى اقتوبەلىكتەر اش­تى. ويىننىڭ 25 مينوتىندە مۇرات تىلەشوۆ گول سوق­سا, اراعا ءبىر ءمينوت سالىپ وستاپەنكو ەسەپتى تەڭەس­تىردى. ال ماتچتىڭ ەكىنشى جارتىسىندا استانالىقتار ساپىندا قايرات نۇرداۋلەتوۆ دوپتى نىساناعا ءدال تيگىزسە, قوناقتاردى جەڭىلىستەن ەميل كەنجەساريەۆ قۇتقارىپ قالدى. وسى تۋردا “اتىراۋ” مەن “شاحتەر” (قاراعاندى) اراسىنداعى ويىن دا وزىنشە تارتىستى دا قىزىقتى ءوتتى. كەزدەسۋ 1:1 ەسەبىمەن اياقتالدى. وندا اتىراۋ­لىق­تار ساپىندا اليەۆ 11 مەترلىك ايىپ دوبىن ور­ىن­داسا, قاراعاندىلىق تاتتىباەۆ ويىننىڭ اياقتالۋى­نا 10 ءمينوت قالعاندا ەسەپتى تەڭەستىردى. قوستانايدىڭ “توبىل” كومانداسى كەرەكۋلىك “ەرتىس” كلۋبىن قابىلداپ, 4:0 ەسەبىمەن ۇتتى. بۇل كەزدەسۋدە نۇربول جۇماسقاليەۆ ويىننىڭ 38 جانە 47 مينوتتەرىندە ەكى دوپ سوقسا, ودان كەيىن باكاەۆ 82 جانە 90 مينوتتە دۋبل جاسادى. ءسويتىپ, قوستا­ناي­لىقتار اسا ماڭىزدى ءۇش ۇپايدى يەلەنىپ, تۋرنير كەس­تە­سىندە ءوزىنىڭ وكشەسىن باسىپ كەلە جاتقان “ەرتىستەن” 10 ۇپاي ايىرماشىلىعىمەن وزىپ كەتتى. ال تۋرنير كەستەسىندەگى 7 – 12 ورىنداردا ورنا­لاس­قان كوماندالار اراسىنداعى ويىندار مىناداي ءنا­تي­جەمەن اياقتالدى. “جەتىسۋ” – “ورداباسى” 0:2, “وق­جەتپەس” – “تاراز” 0:0, “اقجايىق” – “قايرات” 2:0.