بوساعان ءبىلىم گرانتتارى كىمدەرگە بەرىلەدى؟

جۋىردا ءبىلىم جانە عىلىم ءمينيسترى جانسەيىت تۇيمەباەۆ الماتىدا ءۇش بىردەي جيىن وتكىزدى. جاڭا وقۋ جىلى قارساڭىندا قاربالاس بولىپ جاتقان ءبىلىم سالاسىندا بيىل ەلەڭ ەتكىزەرلىك باستامالار مەن وزگەرىستەر بارشىلىق. وڭتۇستىك استانادا وتكەن جيىن­نىڭ ءبىرى بوساعان ءبىلىم گرانتتارىن بە­رۋدىڭ جاي-جاپسارىنا ارنالدى. رەس­پۋبليكالىق كونكۋرستىق كو­ميس­سيا ماجىلىسىنە ءبىلىم جانە عىلىم, دەنساۋلىق ساقتاۋ مينيسترلىكتەرىنىڭ باسشىلارىمەن قوسا, جوعارى وقۋ ورىندارىنىڭ رەكتورلارى قاتىستى. رەسپۋبليكالىق ءبىلىم ۆەدومست­ۆو­سىنىڭ باسشىسى كونكۋرس قورى­تىن­دىسىن شىعارا كەلە, اتالمىش مي­نيسترلىكتە ستۋدەنت جاستاردى قولداۋ جونىندە ايتارلىقتاي جۇمىستار ءجۇر­­گىزىلىپ جاتقانىن اتاپ ءوتتى. ەمتيحان سەسسيالارىنىڭ ناتيجەسى بويىنشا جىلىنا ەكى رەت بوساعان ءبىلىم گرانت­تارى بەرىلەدى. بۇل رەتتە ستۋدەنتتىڭ الەۋمەتتىك جاعدايى ەسكەرىلەدى. سونىمەن, 2010 جىلدىڭ تالاپ­كەر­لەرى دە بيىل مەملەكەت نازارىنان تىس قالىپ وتىرعان جوق. رەسپۋب­ليكالىق كونكۋرستىق كوميسسيانىڭ شەشىمىمەن 35 مىڭنان استام ءبىلىم گرانتتارى بە­رىلسە, جاڭا وقۋ جىل­ىن­داعى ءبىلىم گرانت­تارى وتكەن جىلمەن سالىس­تىر­عاندا, 1085-كە ارتىق. بۇل – تەگىن جوعا­رى ءبىلىم الۋدىڭ قوسىمشا مۇمكىندىگى دەگەن ءسوز. بوساعان ءبىلىم گرانتتارى ارالىق اتتەستاتسيالاۋدىڭ ناتيجەلەرى نە­گىزىندە تاعايىندالىپ وتىر. ادە­ت­تە­گىدەي, بوساعان ءبىلىم گرانتتارىن بولۋدە حالىقتىڭ الەۋمەتتىك ءالسىز توپ­تارىنا جاتاتىن اقىلى نەگىزدە ءبىلىم الۋشى جەتىم, مۇگەدەك ستۋ­دەنت­تەرگە, جالعىزباستى اتا-انالاردىڭ بالالارىنا كونكۋرستىق كوميسسيا­نىڭ شەشىمىمەن باسىمدىق بەرىلەدى. جوعارى ءبىلىم الۋ ۇدەرىسىندە بوساعان ءبىلىم گرانتتارىن تاعايىنداۋ ءۇشىن 76 جوعارى وقۋ ورنىنان 5547 ءبىلىم الۋشى قۇجاتتارىن تاپسىرعان. ال رەسپۋبليكالىق كونكۋرستىق كو­ميسسيا تومەندەگى ماماندىقتار بوي­ىشا 1670 بوس ءبىلىم گرانتىن تا­عاي­ىندادى. گۋمانيتارلىق عىلىم­دارعا – 35, قۇقىق – 8, ونەر – 84, الەۋم­ەتتىك عىلىمدار جانە بيزنەسكە – 19, جاراتىلىستانۋ عىلىمدارىنا – 48, تەحنيكالىق عىلىمدار مەن تەحنو­لوگيالارعا – 444, اۋىل شا­رۋاشى­لىعى عىلىمدارىنا – 144, قىز­مەت كور­سەتۋگە – 16, ۆەتەريناريا – 32, دەن­ساۋ­لىق ساقتاۋ جانە الەۋمەتتىك قام­تا­ماسىز ەتۋگە 467 گرانت ءبولىنىپ وتىر. كونكۋرستىق كوميسسيانىڭ شە­شى­مىمەن سوعىسقا قاتىسۋشىلار مەن سو­عىس مۇگەدەكتەرىنە تەڭەستىرىلگەن تۇل­عا­لار ءۇشىن كۆوتامەن قابىلداۋ بوي­ىنشا قاجەتتىلىكتەن تىس قالعان 82 ءبىلىم بەرۋ گرانتى, رەزەرۆتەگى 50 ءبىلىم بەرۋ گرانتى, جالپى 132 ءبىلىم بەرۋ گران­تى 103 جەتىم بالاعا جانە قى­زىلاعاشتان شىققان 29 تالاپ­كەرگە بەرىلگەن. ايناش ەسالي.