ءتۇرلى باعىتتاعى تۇشىمدى اڭگىمە

كەشە ەلىمىزدىڭ مەملەكەتتىك حاتشىسى – سىرتقى ىستەر مي­نيسترى قانات ساۋداباەۆ قازاق­ستانعا رەسمي ساپارمەن كەلگەن ءتا­جىكستان رەسپۋبليكاسىنىڭ سىرت­قى ىستەر ءمينيسترى حامروحون زاري­فيمەن كەزدەستى. كەزدەسۋ بارىسىندا تاراپتار ەكى­جاقتى قارىم-قاتىناستاردىڭ كوپ­تەگەن ماسەلەلەرىن تالقىلادى. سونىڭ ىشىندە حالىقارالىق بىرلەستىكتەر شەڭبەرىندەگى ەكىجاقتى ىنتىماق­تاستىق پەن ءوزارا ىقپالداستىقتىڭ پەرسپەكتيۆالارى, ورتالىق ازيا ايماعىنداعى قاۋىپسىزدىكتى قامتا­ماسىز ەتۋ ماسەلەلەرى قاراستىرىلدى. سوڭعى ماسەلە بويىنشا اۋعانستان پروبلەماتيكاسى تۋرالى دا پىكىر ال­ماسىلدى. حالىقارالىق ۇيىم شەڭ­بەرىندەگى ىنتىماقتاستىق ماسەلەسىن تالقىلاعاندا تاراپتار ۇستىمىزدەگى جىلدىڭ 1-2 جەلتوقسانىندا استانادا بولاتىن ەقىۇ ءسامميتى كۇن ءتار­تىبىنىڭ جوباسى تۋرالى دا ءسوز قوزعادى. كەزدەسۋدەن كەيىن جۋرناليستەرگە بەرگەن سۇحباتىندا قانات ساۋداباەۆ ەكىجاقتى قارىم-قاتىناستا شەشىل­مەگەن تۇيىندەر جوق ەكەنىن اتاپ ءوتتى. ءبىز بارلىق ماسەلەدە دە ورتاق كەلىسىمگە كەلىپ, ءبىر-بىرىمىزگە قولداۋ ءبىلدىرىپ كەلەمىز, دەدى ول. شاعىن قۇرامداعى كەزدەسۋدەن كەيىن كەلىسسوز قازاقستان مەن تاجىكستان سىرتقى ىستەر مينيسترلەرى كەڭەسىنىڭ (سىمك) 1-ءشى وتىرىسىندا جالعاستى. وندا ەكىجاقتى ساۋدا-ەكونوميكالىق جانە مادەني-گۋما­نيتارلىق ىنتىماقتاستىقتىڭ پەرس­پەكتيۆالارى قاراستىرىلدى. سونداي-اق قازاقستان مەن تاجىكستان ارا­سىنداعى مەملەكەتارالىق ۇيلەستىرۋ كەڭەسىنىڭ ءبىرىنشى وتىرىسىن قايدا جانە قاشان وتكىزۋ, كۇن تارتىبىنە قانداي ماسەلەلەر ەنگىزۋ تۋرالى پىكىر الماسىلدى. كەلىسسوزدەردەن كەيىن ەكىجاقتى ىنتىماقتاستىقتى دامىتۋ جولدارىن ناقتىلاعان سىمك حاتتاماسىنا جانە قازاقستان رەسپۋبليكاسى ۇكىمەتى مەن تاجىكستان رەسپۋبليكاسى ۇكىمەتى اراسىندا ديپلوماتيالىق وكىلدىكتەر عيماراتى قۇرىلىسىن سالۋعا جەر تەلىمدەرىن ءبولۋ جونىندەگى كەلىسىمگە قول قويىلدى. ال سىمك-ءنىڭ كەلەسى وتىرىسى دۋشانبەدە وتەتىن بولىپ بەلگىلەندى. جاقسىباي سامرات.