باعدارلاما كاسىپكەرلىكتى دامىتۋعا قىزمەت ەتەدى

“دامۋ” كاسىپكەرلىكتى قولداۋ قورى اۋداندارداعى, اۋىلدارداعى شاعىن جانە ورتا بيزنەس سۋبەكتىلەرىنە بۋحگالتەرلىك قىزمەتتى جۇرگىزۋ جانە كەڭەس بەرۋ ماقساتىن­دا وسىنداي جاڭا باعدارلاما ۇسىنىپ وتىر. شىنى كەرەك, شاعىن جانە ورتا بيزنەس سۋبەكتىلەرى, سونىڭ ىشىندە, اۋىلدىق جەر­لەر­دەگى كاسىپكەرلەردىڭ باسىم بولىگى بۋحگال­تەرلىك ەسەپتى مۇلدە جۇرگىزبەيدى دەسە دە بولا­دى. سەبەبى, ولاردىڭ جۇمىسقا مامان ەسەپشى الاتىنداي مۇمكىندىگى جوق, اۋىلدىق جەردە جوعارى دارەجەلى ەسەپشى تابۋ دا وڭاي ەمەس. سوندىقتان ولاردىڭ اراسىندا سالىق كولە­مىن دۇرىس ەسەپتەي الماۋشىلىق, سالىق ەسە­بىن ۋاقتىلى تاپسىرماۋ­شىلىق جانە ونىڭ رەجىمىن دۇرىس تاڭداي الماۋشىلىق تا ءجيى كەزدەسەدى. وسىنى ەسكەرگەن “دامۋ” كاسىپ­كەرلىكتى قولداۋ قورى وسى باعدارلامانى ۇسىنۋ ارقى­لى اۋىلدىق جەرلەردەگى كاسىپكەر­لەردىڭ قارجى, بۋحگالتەرلىك ەسەپ جانە سالىق ماسەلەلەرى بويىنشا بىلىكتى مامان­داردان كومەك الۋىنا جاعداي تۋعىزباقشى. جاڭا باعدارلاما باستاپقىدا ايتەكە بي جانە مارتوك اۋداندارىندا جۇزەگە اسى­رىلادى. قازىر وسى ەكى اۋداندا كاسىپكەر­لەرگە قىزمەت كورسەتۋ جانە كەڭەس بەرۋ ورتا­­ل­ىقتارى جۇمىس ىستەيدى. مۇنداي بولا­شاعى باياندى باعدارلامانىڭ وپە­راتورى – بۋحگالتەرلىك قىزمەت سالا­سىندا وزىندىك قولتاڭباسى قالىپتاسقان “ەسەپ” قوعامدىق بىرلەستىگى. ورتا­لىق­تار ازىرگە اقىسىز قىزمەت كورسەتەدى, بولاشاقتا ول اقىلى بولۋى مۇمكىن. ساتىبالدى ءساۋىرباي. اقتوبە وبلىسى.