قۇنى شامامەن 15 مىڭ اقش دوللارىن قۇرايتىن مىسىردىڭ سۇلۋ حانشايىمى نەفەرتيتي كەۋىتىنىڭ ليتسەنزيوندىق كوشىرمەسى ەلورداداعى بەيبىتشىلىك جانە كەلىسىم سارايىندا جۋرناليستەرگە تانىستىرىلدى. اتى اڭىزعا اينالعان سۇلۋ حانشايىمنىڭ كەۋىتى مىسىرلىق پيراميدالار قازىنالارىنىڭ كوشىرمەلەرى كورمەسىنىڭ قارساڭىندا مىسىردىڭ الدىڭعى قاتارلى ارحەولوگى جانە تاريحشىسى, دوكتور زاحي حاۆاستىڭ تالىمگەرلىگىمەن ەلىمىزگە اكەلىنگەن العاشقى ەكسپوناتى بولىپ تابىلادى.
نەگىزىندە نەفەرتيتيدىڭ تۇپنۇسقاسى بۇگىنگى تاڭدا بەرليندە ساقتاۋلى. ماماندار ەلىمىزگە اكەلىنگەن نەفەرتيتي كوشىرمەسىنىڭ اۆتورى دا, جاسالۋ تەحنولوگياسى دا قۇپيا ەكەندىگىن ايتادى. جالپى ەلىمىزگە اكەلىنگەن سۇلۋ حانشايىم كەۋىتىنىڭ كوشىرمەسى قازاقستان مەن مىسىر اراسىنداعى دوستىق پەن ءوزارا قارىم-قاتىناستى نىعايتۋدىڭ بەلگىسى رەتىندە ەلورداداعى بەيبىتشىلىك جانە كەلىسىم سارايىنا سىيلانعان ەكەن.
ءبىر ايتا كەتەتىن جايت, بۇگىنگى كۇنگە دەيىن نەفەرتيتيدىڭ ومىردە بولعاندىعى جايلى ناقتى اقپارات تابىلعان جوق. راس, زەرتتەۋشىلەر حانشايىمنىڭ تۋعان جەرى تۋرالى بىرنەشە بولجامنىڭ تابىلعاندىعىن جانە ونىڭ ارقايسىسى از دا بولسا شىندىققا جاناساتىندىعىن ايتادى. ايتسە دە ونىڭ ءوزى دە ازىرگە بولجام عانا.
كەۋىتتىڭ تانىستىرىلىمى بارىسىندا بەيبىتشىلىك جانە كەلىسىم سارايىنىڭ باس ديرەكتورى بولات ماجاعۇلوۆ نەفەرتيتيدىڭ ەلورداعا اكەلىنۋ بارىسىنداعى ءبىراز قىزىقتى وقيعالاردى بايانداي كەلە: “الەم بويىنشا نەفەرتيتيدىڭ كوشىرمەسى ساناۋلى عانا مەملەكەتتەردە كەزدەسەدى. ءبىر جاعىنان قازاقستانعا سىيعا تارتىلعان بۇل كوشىرمە ەلىمىزدىڭ ابىرويىن دا پاش ەتكەندەي. تمد ەلدەرى ىشىندە اتالعان تاريحي جادىگەردىڭ ليتسەنزياسى بار كوشىرمەسى تەك قازاقستانعا عانا بەرىلىپ وتىر. ول ءۇشىن مىسىر ەلىنىڭ بەلگىلى ارحەولوگى, دوكتور زاحي حاۆاسقا ايتار العىسىمىز مول”, – دەدى.
نەفەرتيتيدىڭ كوشىرمەسىمەن تانىستىرۋ ءىس-شاراسى بارىسىندا وسى سارايعا قاراشا ايىندا 35-تەن استام تاريحي جادىگەرلەردىڭ كوشىرمەسى دە قويىلاتىندىعى بەلگىلى بولدى. اتاپ ايتقاندا, ەجەلگى پيراميدالاردىڭ قازىناسىنا ارنالعان كورمەگە رامزەس ءىى جانە تۋتانحامون سياقتى ەجەلگى مىسىر ەلىنىڭ تاريحي تۇلعالارىنىڭ مۇسىندەرى, سفينكستەر جانە ماسكالاردىڭ كوشىرمەلەرى كەلۋشىلەر نازارىنا ۇسىنىلماق.
اراي ۇيرەنىشبەكقىزى.
* * *
ستۋدەنت-قۇرىلىسشىلار ۇلەسى
قازىر كەندى التايدا ستۋدەنتتەردىڭ قۇرىلىس وتريادتارى قۇرامىندا ەكى مىڭنان استام ادام ەڭبەك ەتىپ جاتىر. بۇدان ءبىراز بۇرىن بەلارۋسكە ءبىر توپ ستۋدەنت-قۇرىلىسشىلار اتتانىپ كەتكەن-ءتىن. ستۋدەنتتەردىڭ قۇرىلىس جانە جاستاردىڭ ەڭبەك وتريادتارى وبلىستىق شتابىنىڭ توراعاسى يگور شاتسكيدىڭ ايتۋىنشا, جىگەرلى جاستار قالا ىرگەسىندەگى “نۇرلى كوش”, “100 مەكتەپ, 100 اۋرۋحانا”, “جول كارتاسى” باعدارلامالارى بويىنشا سالىنىپ جاتقان الەۋمەتتىك عيماراتتار قۇرىلىستارىنا بەلسەنە ارالاسۋدا. سونداي-اق قازاقستان مەن رەسەي ىنتىماقتاستىعى ايماقارالىق فورۋمىنا ازىرلىك بارىسى اياسىندا وسكەلەڭ وسكەمەننىڭ كوركەيۋىنە دە لايىقتى ۇلەستەرىن قوسىپ جاتىر. س.امانجولوۆ جانە د.سەرىكباەۆ اتىنداعى شىعىس قازاقستان مەملەكەتتىك جانە شىعىس قازاقستان مەملەكەتتىك تەحنيكالىق ۋنيۆەرسيتەتتەرىنىڭ ستۋدەنت-قۇرىلىسشىلارى سۋ تاسقىنى ورىن العان اۋدانداردا دا تۇرعىن ۇيلەردى سالۋعا بەلسەنە ارالاسۋدا. وڭداسىن ەلۋباي. ىعىس قازاقستان وبلىسى.
