كۇنشۋاقتىڭ شۋاعى...

شىعىستاعى ەڭ ءىرى بالاباقشا-بوبەكجاي مەملەكەتتىك ءتىلدىڭ ابىرويىن اسقاقتاتىپ كەلەدى... “كۇنشۋاق” بالاباقشا-بوبەك­جايىنىڭ اشىلعانىنا ءتورتىنشى جىل. قازىر وندا 500-گە جۋىق ءبو­بەك تاربيەلەنىپ جاتىر. بالاباق­شانى قر ءبىلىم بەرۋ ءىسىنىڭ ۇزدىگى, وسى سالادا 27 جىل بويى جەمىستى قىزمەت ەتىپ كەلە جاتقان, ىسكەر ۇستاز تىلەۋ­كەش ىسقاققىزى جانىبەكوۆا باس­قارادى. كەندى التايداعى ەڭ ءىرى ءبو­بەك­تەر مەكەنى “كۇنشۋاققا” ءسا­بيلەرىن ورنالاستىرعىسى كەلەتىندەر جىلدار بويى كەزەككە تۇرادى ەكەن. ونىڭ وزىندىك سەبەبى بار. اۋلاسى اتشاپتىرىم بالاباقشا-بوبەكجايى بىرنەشە گەكتار جەردى الىپ جاتىر. سول كەزدەگى وبلىس اكىمى ج. كارىبجانوۆ وسى مەكەمەنى الىپ بەرىپ, كۇردەلى جوندەۋ جاساتقىزىپ, ءوزى اشىلۋىنا كەلىپ قاتىسقانىنا كۋا بولعانبىز. سودان بەرى بوبەك­جايدىڭ ءىشى دە, سىرتى دا كوركىنە ساۋلەتى ساي, اسەم دە كورىكتى بولىپ بوي تۇزەپتى. بالاباقشا ديرەكتورى تىلەۋكەش ىسقاققىزى ءىشى سىرلانىپ, جاڭا وقۋ ماۋسىمىنا ءازىر تۇرعان بولمەلەردى كورسەتىپ شىقتى. قازاقتىڭ سالت-ءداستۇرىن, ادەت-عۇرپىن پاش ەتەتىن ءۇل­كەن بولمە, مۇراجاي ءىشى قاتتى ۇنادى. – ءبىز ەكى جاستان باستاپ ءسابي­لەردى قابىلدايمىز. ولاردىڭ ءتىلى ەندى عانا شىعا باستاعان. جاس ۇرپاق­قا مەملەكەتتىك ءتىلدى تەرەڭ ۇيرەتۋگە كوڭىل بولەمىز. جاقىندا عانا مەم­لەكەتتىك ءتىلدىڭ ونجىلدىق باعدارلا­ماسى قابىلدانعانى بەلگىلى. سول باع­دارلاماعا ساي قازاق ءتىلىن تەرەڭدەتىپ وقىتامىز. ال مىنا بولمەگە 13 توپ­تىڭ بالالارى جاستا­رىنا قاراي كە­زەك-كەزەك كەلىپ, نا­ۋ­­رىز, جاڭا جىل, باسقا دا ۇلتتىق مەرەكەلەردى اتاپ وتە­دى. جاقىندا اتا زاڭىمىزعا ارنال­عان ساباقتى ءوت­كى­زەمىز, – دەيدى ءبىلىم بەرۋ ءىسىنىڭ ۇزدىگى تىلەۋكەش ىسقاققىزى. ءبىرىنشى سىنىپقا باراتىن جەتى جاستاعى بالالارعا دەيىن 13 توپ قۇرىل­عان. ماسەلەن, ەكى جاسار ءسابي­لەردىڭ توبى تورتەۋ. مۇندا بارلىق جاعداي جاسالىنعان. قالالىق وقۋ ءبولىمىنىڭ باستىعى الەكساندر كۋزنەتسوۆ ۇنەمى كەلىپ, كومەكتەسىپ تۇرادى ەكەن. قازىر بالاباقشادا 67 ادام ەڭبەك ەتەدى. پسيحولوگ, ادىسكەر, دەنە تاربيەسى مەن ءجۇزۋ, باسقا دا سپورت تۇرلەرىنە باۋلي­تىن ۇيىرمەلەر جۇمىس جاساپ تۇر. 30 تاربيەشىنىڭ بارلىعى جىل سايىن ار­نايى ازىرلىك­تەن ءوتىپ تۇرادى, بىلىمدەرى مەن ءبى­لىك­تەرى ساي تاجىريبەلى جاندار كورىنەدى. ماسەلەن, ايناش مامىر­باەۆا سونداي ىسكەر تاربيەشى. ءوزىنىڭ شا­رۋاشىلىق ىستەرى جونىندەگى ورىنباسارى گۇلنار ساۋىربايقىزى سۇلەيمەنوۆا تىنىم تاپپايتىن, ىسكەر باسشى ەكەن. – بالاباقشانى جاڭا وقۋ جىلىنا ازىرلەۋدە ول كىسىنىڭ ەڭبەگى ەرەكشە, – دەيدى بالاباقشا ديرەكتورى. ادىسكەر دينارا ماسالوۆا, پسي­حولوگ جانسايا ابدراحمانوۆا, تاعى باسقالار سابيلەردىڭ ورىس جانە اعىلشىن ء(ۇش تۇعىرلى) تىلدەرىن دە جاقسى ۇيرەنىپ الۋلارىنا باسا نازار اۋدارادى. اتاپ وتەرلىك ماڭىزدى شارا – اتالمىش بوبەكجاي مەن شى­­­­­­عىس قازاقستان مەملەكەتتىك ۋنيۆەرسيتەتى اراسىندا يگى ءداستۇر قا­لىپتاسقان. ماسەلەن, كول­لەدج­دەر­دە العان ءبى­لىمدەرىن وسىندا قىزمەت ەتەتىن جاستار ۋنيۆەرسيتەتتە ودان ءارى جالعاستىرىپ جاتىر. اسەم مۇراتوۆا دەگەن قىز وسىندا تاربيەشى ءارى جو­عارى ءبىلىم الۋ ءۇشىن بيىل گرانتتى جەڭىپ الىپتى. تاماشا ءداستۇر ەمەس پە. – مەملەكەتتىك ءتىلدى ۇيرەنسەم, تەرەڭ ءبىلىم السام دەگەن باسقا ۇلت وكىلدەرىنىڭ بالالارى دا “كۇنشۋاق­قا” ورنالاسۋ ءۇشىن كەزەككە تۇرادى. بىزدە بۇل كۇندەرى وتىزدان استام باس­قا ۇلت وكىلدەرى تاربيەلەنىپ جا­تىر. ولار قازاق ءتىلىن تەز ۇيرەنۋدە. تالابى تاۋداي بالالاردىڭ قابىلەتىنە ەرىكسىز ريزا بولاسىز. بيىلعى ما­مىردا ءبىزدىڭ بوبەكجايدىڭ شاكىرت­تەرى وبلىس اكىمى ب. سا­پار­با­ەۆ­تىڭ باستاماسىمەن كەل­گەن “تۋعان ەل – التىن بەسىگىم” اياسىندا مەتاللۋرگ­تەردىڭ مادەنيەت سارايى الدىندا ءبىر جارىم ساعاتتىق كونتسەرت قويدى. سۋرەت, قولونەر تۇرلەرى بويىنشا بايقاۋ وتكىزدىك. كورمەلەر وتكىزىپ, بوبەكتەر سالعان سۋرەتتەردى ءتۇرلى بايقاۋلارعا قاتىس­تىرامىز. جەڭىم­پاز اتانعانداردى ماراپاتتاۋ جاعى دا قاراستىرىلعان. اتا-انالار دا بىزبەن تىعىز قارىم-قاتىناستا. ولار ءوز سابيلەرىنىڭ بولاشاعىنا الاڭ­دامايدى, سەبەبى, “كۇنشۋاقتىڭ” شۋاعى بارلىعىن نۇرلاندىرا بەر­مەك, – دەيدى بىلىكتى ۇستاز تىلەۋكەش ىسقاققىزى... وسكەمەن.