بولار ەل “بولاشاعىن” ويلايدى

كەشە اقوردادا مەملەكەتتىك حاتشى – سىرتقى ىستەر ءمينيسترى قانات ساۋداباەۆتىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى. “بولاشاق” باعدارلاماسى بويىنشا الەمنىڭ الدىڭعى قاتارلى جوعارى وقۋ ورىندارىندا ءبىلىم الۋعا ۇمىتكەرلەر اراسىندا بيىل دارىندى بالالارعا ارنالعان ينتەللەكتۋالدى مەكتەپتەردىڭ تۇلەكتەرى بارىن ايرىقشا اتاپ وتكەن توراعا مۇنى جەتكىنشەكتەرگە ساپالى ءبىلىم بەرىپ كەلە جاتقان وقۋ وشاقتارىنىڭ ۇلكەن جەمىسى دەپ باعالادى. شەتەلدە كادرلار دايارلاۋ ءجو­نىن­دەگى رەسپۋبليكالىق كوميسسيا توراعاسىنىڭ ورىنباسارى, ءبىلىم جانە عىلىم ءمينيسترى جانسەيىت تۇيمەباەۆ كونكۋرستىق ىرىكتەۋدەن وتكەن ۇمىتكەرلەرگە “بولاشاق” حا­لىق­ارالىق ستيپەندياسىن تاعايىن­داۋ جانە ستيپەنديا يەگەرلەرىن ستيپەنديادان ايىرۋ, سونداي-اق قا­زاقستان ازاماتتارىنىڭ ءوتىنىش­تەرى تۋرالى مالىمدەدى. بۇگىنگى تاڭعا دەيىن الەمنىڭ تاڭداۋلى وقۋ ورىن­دارىندا ءبىلىم الۋعا 3408 ادام ءوتى­نىش بىلدىرسە, رەسپۋبليكالىق كو­ميس­سيانىڭ قاراۋىنا 816 ءۇمىت­كەر­دىڭ جەكە قۇجاتى ۇسىنىلعان. ونىڭ ىشىندە 720-سى شەتەلدىڭ جوعارى وقۋ ورىندارىنا ءوز بەتىمەن تۇسكەن ءۇمىت­كەر رەتىندە تىركەلسە, 96-سى جالپى كونكۋرس بويىنشا ىرىكتەۋ سىنىنا قاتىسقان. كوميسسيا وتى­رى­سىندا باعدارلامالار ءبولىنىسى سارالانىپ, باكالاۆريات بويىنشا – 187, ماگيستراتۋراعا – 578, كلي­نيكالىق ورديناتۋراعا –24, دوك­تو­ران­تۋراعا – 10, عىلىمي تاعىلىم­دا­ما بويىنشا 17 ۇمىتكەر ءبىلىم الۋعا ءوتىنىش بىلدىرگەنى ءمالىم بول­دى. ۇمىتكەرلەردىڭ كوپشىلىگى ۇلى­بريتانيا (474), امەريكا (131), شۆەي­تساريا (63), رەسەي (42) سياقتى وركەنيەتتى ەلدەردىڭ الدىڭعى قاتار­لى وقۋ ورىندارىندا وقۋعا نيەت­تەنسە, ءبىرازى مالايزيا, يرلانديا, كانادا, فرانتسيا, يتاليا, اۆس­ترا­ليا, قىتاي, سينگاپۋر, نيدەرلاند, نورۆەگيا,  گەرمانيا, چەحيا, شۆە­تسيا ەلدەرىندە ءبىلىم العىلارى كە­لەتىنى ايتىلدى. شەتەلدە كادرلار دايارلاۋ جونىندەگى رەسپۋبليكالىق كو­ميسسيا وتىرىسىنىڭ قورىتىن­دىسى بويىنشا 472 ۇمىتكەرگە “بو­لاشاق” حالىقارالىق ستيپەندياسىن تاعايىنداۋ تۋرالى شەشىم قا­بىلداندى. كوميسسيا وتىرىسىنىڭ سوڭىن­دا ءبىلىم جانە عىلىم ءمينيسترى جانسەيىت تۇيمەباەۆ بيىلعى وقۋ جى­لىنىڭ ەرەكشەلىكتەرى تۋرالى قىسقاشا وي تۇيىندەي كەلىپ: “مەم­لەكەتتىك كوميسسيانىڭ وتىرىسىندا بيىلعى وقۋ جىلىندا “بولاشاق” باعدارلاماسى بويىنشا شەتەلدە وقيتىن ۇمىتكەرلەردىڭ سانى انىق­تال­دى. قۇجات تاپسىرعان 3408 تا­لاپ­كەردىڭ 816-سى كوميسسيادا قا­رالىپ, 472 ۇمىتكەر شەتەلگە وقۋعا ۇسىنىلسا, ولاردىڭ دەنى نەگىزىنەن “ەكونوميكا”, “اقپاراتتىق تەحنو­لوگيالار جانە جۇيەلەر”, “تۋريزم سا­لاسىنداعى مەنەدجمەنت, مەي­مان­حانا مەنەدجمەنتى, سپورت مەنەد­جمەنتى”, “مۇناي جانە گاز ءىسى”, “تەحنولوگيالار مەنەدجمەنتى”, “ادام رەسۋرستارىن باسقارۋ”, “ما­تەماتيكا”, “ەلەكترونيكا”, “بۋح­گال­تەرلىك ەسەپ”, “وندىرىستىك ين­جي­نيرينگ”, “قۇرىلىس جانە ارحي­تەك­تۋرا”, “حيرۋرگيا” سىندى مامان­دىقتاردى تاڭدادى. كۆوتا بويىنشا قابىلداۋ مەرزىمى بيىل 30 قىر­كۇيەك­كە دەيىن ۇزارتىلىپ وتىر. سو­عان بايلانىستى الەمنىڭ تاڭداۋلى وقۋ ورىندارىندا وقىعىسى كەلەتىن جەتكىنشەكتەرىمىز ءالى دە قۇجات­تا­رىن تاپسىرۋلارىنا بولادى. مەم­لەكەت تاراپىنان اۋىل جاستارى ءۇشىن بولىنگەن ارنايى كۆوتا تاعى بار. ءبىر ايتا كەتەرلىگى – شەتەلدە كادر­لار دايارلاۋعا وبلىستار تارا­پى­نان بەلسەندىلىك بايقالمايدى. قاتىسۋ­شىلاردىڭ كوبى نەگىزىنەن استانا مەن الماتى قالالارىنان, ولاردىڭ ارقايسىسىنان 300-دەن اسا قۇجات تاپسىرىلعان. ال وبلىستاردا بۇل 20-30 وتىنىشتەن اسپايدى. وبلىستىق ءبىلىم بەرۋ باسقارمالارى مەن وبلىستىق اكىمدىكتەر “بولا­شاق” بويىنشا جاستاردى وقىتۋعا ايرىقشا كوڭىل بولگەندەرى ابزال”, – دەدى. قاراشاش توقسانباي.